Diamond na Zari mu buryohe bw’urukundo ku kirwa cya Zanzibar (Amafoto)

Yanditswe na Munyengabe Murungi Sabin
Kuya 26 Nzeri 2016 saa 08:25
Yasuwe :
0 0

Umuririmbyi Diamond Platnumz yishimanye bidasanzwe n’umugore we Zari Hassan mu buryohe bw’urukundo ku kirwa cya Zanzibar mu gihe hari hashize iminsi inkuru zicicikana ko urugo rwabo ruri mu nzira zo gusenyuka.

Zari yizihije isabukuru y’imyaka 36 amaze avutse kuri uyu wa 24 Nzeri 2016, umugabo we Diamond Platnumz yamukoreye ibirori bikomeye aho bari bagiye kuruhukira muri Zanzibar bivanaho urujijo ko ‘aba bombi bari bagiye gutandukana kubera gucana inyuma’.

Diamond na Zari bari baherekejwe n’inshuti nke za hafi gusa, baratembereye, barasangira ndetse bifotozanya mu buryo bwo kwerekana inda y’imvutsi uyu mugore atwite.

Mbere y’uko iyi sabukuru igera, Diamond yerekanye inzu nshya aherutse kugura muri Afurika y’Epfo anaca intege abatega iminsi urukundo rwe na Zari Hassan bagaragaza ibimenyetso byerekana ko ‘bafitanye amakimbirane’.

Icyo gihe Diamond yikomeye abirirwa bakwirakwiza inkuru z’impuha ku muryango we anahishura ko agiye kujyana Zari Hassan [Mama Tiffah] muri Zanzibar mu birori bikomeye by’isabukuru ye.

Amafoto bashyize hanze agaragaza ko Mama Tiffah akuriwe ndetse ko mu gihe gito azibaruka umwana wa kabiri wa Diamond. Aba bombi kandi baherukaga kujya gutemberana muri Zanzibar kuri Saint Valentin y’umwaka wa 2015, icyo gihe nabwo Zari yari atwite inda ya mbere.

Zari wizihije isabukuru y’amavuko yavutse kuwa 23 Nzeri 1980 ku babyeyi bafite inkomoko zitandukanye. Nyina ni umuhindekazi naho se akaba umusomali. Yakuriye ahitwa Jinja ari naho yize amashuri yisumbuye muri Jinja girls high School gusa yakomereje Kaminuza mu Bwongereza.

Mu mwaka wa 2007 yigeze gukora indirimbo ayita ‘Oliwange’ yanacuranzwe bikomeye muri 2009 kuri Channel O. Mbere yo kujya gutura muri Afurika y’Epfo yari umuririmbyi wa Karaoke muri Uganda.

Ubu amaze kubyara abana bane barimo batatu yabyaye akiba muri Uganda [Pinto, Didy na Quincy], nyuma yo gushakana na Diamond bafitanye umukobwa umwe bise ‘Tiffah’ ndetse baritegura kubyara undi mu minsi ya vuba.

Diamond na Zari bari bamaze iminsi bavugwaho inkuru ko bagiye gutandukana
Zari aritegura kubyara undi mwana
Muri Zanzibar bari baherekejwe n'inshuti za hafi gusa
Diamond na Zari bari bagiye kwishimana muri Zanzibar

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza