Chameleone yunamiye sebukwe wapfuye

Yanditswe na Munyengabe Murungi Sabin
Kuya 5 Ukwakira 2016 saa 08:59
Yasuwe : XX
0 0

Jose Chameleone ari mu kababaro gakomeye kubera urupfu rwa Padiri John Scalabrini uhagarariye umuryango wa sebukwe, yitabye Imana mu gitondo cyo kuri uyu wa Kabiri tariki ya 4 Ukwakira 2016.

John Scalabrini, ni umupadiri ukomoka mu Butaliyani, yari amaze imyaka irenga 40 aba muri Uganda. Ni nyirarume wa Daniela Atim Mayanja, umugore wa Chameleone.

Chameleone yanditse kuri Facebook agaragaza ko urupfu rwa Padiri John Scalabrini rusize icyuho mu muryango. Yamufataga nk’inyangamugayo, akarangwa no gufasha no kwita ku bababaye.

Yanditse ati “Ruhukira mu mahoro mubyeyi kandi nshuti. Imana ishobora byose ikwiteho kandi natwe idukomoze. Tuzahora tukwibuka kandi tuzagusengera.”

“Ngushimiye urukundo n’ineza watugaragararije. Ubuzima bwawe bwose warabuduhaye.”

Padiri John Scalabrini yitabye Imana aguye mu bitaro bya Nsambya aho yari amaze igihe arwariye kanseri.

Uyu mupadiri ni we ufatwa nka sebukwe wa Chameleone kuko wareze Daniela Atim kuva akivuka kugeza arushinze. Daniela Atim yamenyanye na Chameleone muri 2003 ubwo yari i Kampala aho yari yaraje gusura Padiri John Scalabrini.

John Scalabrini yakoze ibikorwa bitabarika by’urukundo birimo kubaka amashuri, gufasha abatishoboye, kwita ku bana batishoboye cyane cyane abavurirwaga mu bitaro bya Mulago n’ahandi. Azwi kandi nk’uwakoze ibikomeye mu kwita ku buzima bw’abaturiye gereza ya Luzira.

Padiri John Scalabrini ni we wagobotse Chameleone ubwo yakoreraga impanuka muri Tanzania, yamwoherereje indege imusubiza iwabo Kampala.

Padiri John Scalabrini yavutse mu 1934, ahitwa Limido Comasco mu Butaliyani. Yageze muri Uganda mu 1964 gusa Idi Amin yaje kumwirukana amusubiza iwabo mu 1975 aza kuhagaruka avuye ku butegetsi. Perezida Museveni amaze kugera ku butegetsi na we yirukanye uyu mupadiri mu 1988 amushinja gukorana n’abashaka kumuhirika.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE