Chameleone yavuze kuri gatanya itutumba mu rugo rwe rumaze imyaka icyenda

Yanditswe na IGIHE
Kuya 20 Mata 2017 saa 08:01
Yasuwe :
0 0

Chameleone yamaganiye kure inkuru zacicikanye kuri uyu wa Gatatu zishimangira ko urugo rwe na Daniella Atim rugeze ku ndunduro nyuma y’uko uyu mugore yatanze ikirego mu rukiko asaba gatanya.

New Vision, ikinyamakuru kiri mu bya mbere bitangaza amakuru yizewe muri Uganda ni cyo cyasohoye bwa mbere inkuru yavugaga ko Daniella Atim Mayanja yandikiye urukiko asaba gatanya. Ngo yashinje Chameleone kumutoteza, kumukorera iyicarubozo no gushaka kumuhitana.

Chameleone na Daniella bamaze imyaka icyenda barushinze, basezeranye kuwa 7 Kamena 2008 muri Kiliziya ya Biina Catholic Church muri Mutungo. Icyo gihe bakoze ibirori bikomeye ndetse mu myaka bamaranye bafatwaga nk’urugo rw’intangarugero mu byamamare mu karere nyamara buri wese yagendanaga igisebe ku mutima.

Uyu muririmbyi amaze kubona iyi nkuru yasakaye hose mu binyamakuru bya Afurika y’Uburasirazuba hafi ya byose yahise ajya kuri Facebook yandikaho ko akiri kumwe na Daniella. Yifashe na video ari kumwe na Daniella ndetse n’umwana wabo muto witwa Ama Christian ashaka kwerekana ko umutuzo ukiri wose mu rugo rwe.

Ntiyahakanye ko umugore we yatanze ikirego ndetse yasobanuye ko ‘atari umumarayika ndetse ngo gukora amakosa atari igitangaza ku kiremwamuntu’. Ibi Chameleone yakoze bijya gusa n’ibyo umugore we yanditse mu kirego avuga ko umugabo we yihindura intama iyo ari mu ruhame nyamara bagera ahiherereye akamushyira ku nkeke.

Yagize ati “Ntabwo turi abamarayika kandi turi abantu, rero amakosa turayakora ariko ntabwo bisobanuye ko tugiye gutandukana. Ndi gusoma ibinyamakuru by’uyu munsi nkumirwa. Kuba Daniella yagiye mu rukiko, nyine yagiyeyo. Urukiko ni ahantu umuturage wese yemerewe kujya kuko rubereyeho guha serivise abantu bose.”

Chameleone yifashe aya mashusho ari kumwe n’umugore we mu modoka bagiye gufata abana babo aho biga ku ishuri rya Galaxy International School. Yavuze ko ibyo ibinyamakuru byavuga byose adateze gutandukana na Daniella.

Yagize ati “…Turacyari kumwe, byaba mu kuri cyangwa mu buryo butanoze. Ubu turi hano kugira ngo dukosore ibintu. Gahunda z’umuryango ntabwo zikwiye kuba iza rusange.”

Nubwo Chameleone yivugaga imyato yihimura ku itangazamakuru ryasohoye iyi nkuru ashaka kwerekana ko akiri kumwe n’umugore we, Daniella yasaga nk’udashishikajwe no kureba muri camera ubwo iyi video yafatwaga ndetse yageze ubwo amusaba kuzamura ikiganza akerekana impeta y’isezerano ariko undi akabikora ubona umutima we utari hamwe.

Daniella yashinje umugabo we kumukubita, kumutoteza no gushaka kumwica

Mu kirego cye, Daniella yagaragaje ko mu myaka ine ishize Chameleone yagiye amutoteza kenshi ndetse ngo ntiyatinyaga no kumwuka inabi mu maso y’abana babyaranye.

Chameleone yahamije ko umubano we na Daniella ukiriho

Mu ngingo ikomeye yumvikanisha uburemere bw’ikirego cye, Daniella yabwiye urukiko ko Chameleone yagiye amukorera iyicarubozo mu bihe bitandukanye kuva mu mwaka wa 2013 ndetse aho bigeze ngo yari atangiye kumugaragariza ko azamwica.

Uyu mugore yasabye urukiko ko rwahita rumutandukanya na Chameleone ndetse rukamutegeka ko amugendera kure kuko ngo isaha iyo ariyo yose uyu muhanzi ashobora kumwica.

Daniella yasobanuye ko mu myaka yamaranye na Chameleone yabagaho mu buzima bwo kwihangana no gushinyiriza. Chameleone ngo yari umusinzi wok u rwego rwo hejuru, amushinja ko yararaga mu nzoga ntiyite ku muryango, iyo yabaga yihaye akabanga ngo yaranywaga agataha mu museso inkoko zatangiye kubika.

Chimpreports yavuze ko nubwo Chameleone yamaganye inkuru zatangajwe ikirego cya Daniella kiracyari mu rukiko ndetse rwandikiye uyu muhanzi rumusaba ko agomba kuba yasubije ibikubiye mu kirego umugore we yatanze mu gihe kitarenze iminsi 15.

Chameleone na Daniella bari bamaranye imyaka ikabakaba icyenda, bakoze ubukwe bw’agatangaza muri 2007. Mu guhamya isezerano ryabo imbere y’Imana, basezeranyijwe na Padiri John Scalabrini [nyirarume wa Daniella, uyu musaza yitabye Imana mu Ukwakira 2016].

Daniella Atim yatanze ikirego mu rukiko rwa Nakawa kuri uyu wa 18 Mata 2017. Yanditse agaragaza ko atagishoboye kwihanganira kubana na Chameleone bityo asaba ko ubutabera bwamuha gatanya agaca inzira ze.

Ubwo Daniella yambikaga impeta Chameleone
Aba bombi basezeranyijwe na Padiri John Scalabrini wafatwaga nka se wa Daniella

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza