Bobi Wine yimwe stade yagombaga gukoreramo igitaramo

Yanditswe na Uwiduhaye Theos
Kuya 14 Ukwakira 2018 saa 03:17
Yasuwe :
0 0

Depite Robert Kyagulanyi Ssentamu uzwi nka Bobi Wine yimwe Stade ya Namboole yari kuzakoreramo igitaramo cyiswe ‘Kyarenga’ ku wa 20 Ukwakira.

Iki gitaramo cyatangajwe mu minsi ishize gitangira kuvugisha benshi kubera uko polisi yaje kuvuga ko Bobi Wine agomba kuzitwararika ntagaragaze igikorwa na kimwe gifitanye isano na politiki.

Mbere cyari kubera ahitwa Busabala Beach biza guhindurwa n’abajyanama ba Bobi Wine kubera umuriri w’abafana uyu mudepite w’umunyamuziki amaze kwigwizaho.

Mu ibaruwa Jamil Ssewanyana Mpagi uyobora Stade ya Namboole yagombaga kuberamo igitaramo yandikiye uruhande rwa Bobi Wine, yatangaje ko kitazahabera kuko hamaze gufatwa n’abandi bantu.

Muri iyo baruwa yo ku wa 11 Ukwakira nk’uko Daily Monitor yabitangaje, Jamil yagize ati “Ndabamenyesha ko stade yafashwe mbere n’ibikorwa bibiri, birimo umwiherero w’Ishyirahamwe ry’umukino wo gusiganwa n’amaguru ku wa 15-20 Ukwakira n’ubukwe ku wa 20 Ukwakira 2018.”

Jamil yavuze ko uyu mugabo akwiriye gushaka ahandi hantu iminsi itaramusiga ndetse agashaka n’ibyangombwa bimwemerera gukora igitaramo.

Bamwe mu bakurikirana ibya politiki ya Uganda bazamuye ijwi bavuga ko kwangirwa gukorera igitaramo i Namboole kub byatewe n’amabwiriza yaturutse mu nzego za leta zo hejuru.

Ibyapa byamamaza iki gitaramo i Namboole byari byaramaze kujya hanze ndetse n’abantu baratangiye kugura amatike.

Umuvugizi wungirije wa Polisi ua Uganda, Patrick Onyango, muri iki cyumweru yatangaje ko Bobi Wine n’itsinda rye batarahabwa uruhushya rwo gukora icyo gitaramo.

Bobi Wine amaze iminsi ahanganye n’ubutegetsi bwa Yoweri Museveni abushinja imiyoborere mibi, mu minsi ishize bukaba bwaramukoreye iyicarubozo ku buryo byasabye ko ajya kwivuza muri Leta Zunze Ubumwe za Amerika.

Umuhanzi Bobi Wine yimwe stade ya Namboole yifuzaga gukoreramo igitaramo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza