Angelina Jolie aravugwaho gukundana n’undi mugabo nyuma ya gatanya ye na Brad Pitt

Yanditswe na Dusabimana Aimable
Kuya 29 Werurwe 2018 saa 07:33
Yasuwe :
2 3

Angelina Jolie, icyamamare mu mwuga wo gukina filime aravugwaho kubona umukunzi mushya nyuma y’igihe atandukanye na Brad Pitt mu 2016.

Urukundo hagati ya Brad Pitt w’imyaka 53 na Angelina Jolie ufite 41 rwatangiye kwamamara kuva mu 2004, ariko baza gushyingiranwa muri Kanama 2014. Aba bombi batandukanye muri Nzeri 2016.

Nyuma y’igihe bombi batumvikana mu itangazamakuru ku bijyanye n’urukundo, ikinyamakuru ET cyahishuye yaba yaratangiye umubano mushya hagati ya Angelina Jolie n’umunyemari utamenyerewe cyane mu ruganda rw’iby’imyidagaduro cyangwa urwa sinema.

Uwatanze amakuru yagize ati “Brad na Angie bombi bagira ibanga rikomeye ku bijyanye n’imibereho yabo mu byo gukundana. Angie yabwiye inshuti zimwe ko atiteguye kongera kubyinjiramo vuba aha, ariko hari umuntu bamaze igihe babonana, umugabo usa n’ushaje ukora iby’ubukomisiyoneri bw’amazu. Ntabwo ari icyamamare cyangwa umuntu uzwi mu buryo ubwo ari bwo bwose.”

Yakomeje ati “Angie ntiyari amerewe neza na gato nyuma y’ibya gatanya. Kugira undi muntu ukuze bamarana igihe kuri ubu byaramufashije.” Yavuze ko Brad Pitt kuri ubu yamaze gukomeza ubuzima bwe busanzwe ndetse ngo kuzasubirana kwabo bikaba atari ibyo kwitega.

Ati “Abantu bavuga ibyo kwiyunga kwabo gusa ntibiteze kubaho, batandukanye mu buryo bubi n’iyo bagerageje gufatanya n’abana babo batandatu ngo bajye ku mujyanama wo kubunga ni gacye cyane bashobora guhurira mu cyumba kimwe.”

Nubwo hari amwe mu makuru avuga ko Angelina Jolie yaba yarabonye umukunzi mushya, zimwe mu nshuti ze zabinyomoje ubwo zaganiraga na US Weekly zivuga ko ibyo kwishimana n’abagabo kuri we byarangiranye n’umwaka ushize muri iki gihe akaba nta muntu bari kubonana nk’uko bivugwa kuko ngo n’ibiganiro kuri gatanya yasabye ‘bigikomeje’.

Angelina Jolie uvugwaho kwishumbusha umugabo w’igikwerere nyuma ya Brad Pitt basanzwe afite abana batandatu barimo Maddox, Pax, Zahara arera mu muryango na Shiloh, n’impanga Knox na Vivienne yabyaranye n’uyu mukinnyi wa filime babanaga.

Angelina Jolie ni we wari wasabye gatanya avuga ko Brad Pitt yahohoteye umwana bafatanya kurera witwa Maddox, yamushinjaga no kurangwa n’imyafatire ’idakwiye umugabo imbere y’urubyaro’.

Muri Mutarama umwaka ushize basohoye itangazo ry’umwanzuro bahuriyeho wo gukomeza urubanza rwabo mu buryo bw’ibanga ‘kugira ngo habungabungwe uburenganzira ku buzima bwite bw’abana babo ndetse n’umuryango’.

Angelina Jolie aravugwaho gukundana n'umugabo utari icyamamare
Angelina Jolie na Brad Pitt batandukanye
Angelina Jolie ni we urera abana be na Brad Pitt

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza