Adele agiye kwigisha umuziki mu ishuri yizeho

Yanditswe na Munyengabe Murungi Sabin
Kuya 29 Ugushyingo 2016 saa 10:05
Yasuwe : XX
91 54

Umuririmbyi Adele ateganya gutangira akazi ko kwigisha muzika mu kigo yizeho afata nk’icyatumye amenya impano ye agatangira kwandika indirimbo zatumye aba icyamamare ku Isi.

Uyu muhanzi w’imyaka 28 y’amavuko amaze kuba ikirangirire ku Isi abikesha zimwe mu ndirimbo ze zakunzwe cyane nka “Hello”, “When We Were Young”, “Send My Love” n’izindi zitandukanye. Yatangiye kuririmba muri 2006, amenyekana ku rwego rw’Isi muri 2011 ubwo yasohoraga album ye ya kabiri iriho indirimbo zatumye yigarurira abafana nka “Someone Like You” n’izindi.

Kugeza ubu Adele ni umwe mu bahanzi bubashywe cyane mu Bwongereza aho akomoka ndetse no ku Isi muri rusange. Umuvugizi w’uyu muririmbyi yabwiye ikinyamakuru The Sun ko amaze iminsi atekereza kuba yatangira akazi k’ubwarimu ku ishuri yizeho, agasangiza ubumenyi yahakuye barumuna be bahiga muri iki gihe.

Ati “Adele yishimira cyane urwego rwiza amaze kugeraho kandi amaze iminsi avuga cyane ku buryo yatangiye mu bitaramo agenda akora.”

“Iyo avuga uburyo abarimu bahinduye intekerezo ze, agaruka cyane ku buryo batumye atekereza cyane uko yakwiyigisha we ubwe [...] Narangiza urugendo rw’ibitaramo afite, azashimishwa no kwigisha.”

Adele arashaka kujya kwigisha umuziki

Adele akunze cyane kugaruka ku mwarimu witwa Tony Castro wayoboraga amasomo y’umuziki ku ishuri rya Brit School yizeho, amufata nk’umuntu w’icyitegererezo watumye amenya icyo yashakaga kugeraho kuko ngo “yatumaga abanyeshuri yigisha biyandikira indirimbo zabo ku giti cyabo”.

Adele yahawe impamyabumenyi muri iri shuri ryisumbuye ryo mu Bwongereza muri 2006 ari nacyo gihe yahise atangirira gukora umuziki. Yiganye n’abandi bahanzi bakomeye mu Bwongereza barimo Jessie J. na Leona Lewis.

Muri iki gihe Adele akomeje no kugarukwaho cyane mu itangazamakuru bitewe n’amagambo aherutse gutangaza ahishura ko ateganya kongera kubyara undi mwana mu gihe mu minsi ishize yavugaga ko yagowe cyane no kumenya kwita ku mfura ye bigatuma atekereza ku bijyanye no kutongera kubyara.

Adele afite umwana umwe witwa Angelo James yabyaranye n’umukunzi we witwa Simon Konecki, aba bombi batangiye gukundana muri 2011, hari amakuru avuga ko baba bararushinze mu buryo bw’ibanga mu ntangiriro z’uyu mwaka wa 2016.

Jessie J umwe mu bahanzi bize ku ishuri Adele agiye kwigishamo
Ishuri rya Brit School Adele ateganya kujya kwigishamo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE