Kwamamaza

Abantu b’ibyamamare biyemeje kubaho badashinze urugo

Yanditswe kuya 7-09-2016 saa 15:06' na Bajecteur Zigiranyirazo


Ibirori by’ubukwe bifatwa nk’umunsi uhetse iyindi mu mibereho ya muntu ku batarahisemo kwiyegurira Imana, buri muhango ujyanye no kurushinga uba ibyishimo byiyongera ku bindi bikaryoha kurushaho mu kwambikana impeta.

Ushobora kuba wibwira ko buri muntu aba afite inzozi zo kuzibona umunsi umwe na we yambitswe impeta y’urudashira ku rutoki rwe rwa mukuru wa meme ariko si ko biri kuko hari abandi bahitamo kutazigera bahura n’urushako kugeza bavuye ku Isi.

Urubuga rwa Redbook Mag rwakusanyije bamwe mu byamamare bahisemo kurangiza urugendo rw’ubuzima badashinze urugo. Abari kuri uru rutonde ni ibyamamare bikomeye ku Isi mu ngeri zinyuranye ndetse bafite amafaranga y’umurengera ariko ntibakeneye kurema umuryango ngo babyare bororoke babone abo bazaraga ibyo baruhiye bakiri ku Isi.

Kuri uru rutonde hariho bamwe mu byamamare batigeze babyara n’abandi babana n’abakunzi babo [ibyo mu Rwanda bita kubana bitemewe n’amategeko] ariko bo ntibabifata nk’umubano w’umugabo n’umugore.

1. Eva Mendes

Eva de la Caridad Méndez ni Umunyamerikakazi ukina filme akaba n’umunyamideli yavutse mu 1974 . Nubwo yakundanye na Ryan Gosling kuva muri 2011 ari na we akomoraho abana babiri b’abakobwa [Esmeralda Amada muri 2014 hamwe na Amada Lee yibarutse muri Mata 2016], Mendes yabwiye ikinyamakuru ‘Glamour’ ati “rwose simbibonamo umunyenga kubana n’umugabo ku myaka 50 cyangwa 60 ngo njye mubwira utugambo nka gacuti kanjye , mbese ibintu byo kubana nk’umugore n’umugabo simbifata nk’ibintu bishamaje”.

Ibi ni na byo byatumye ibye na Ryan atabyerura ngo bijye ku mugaragaro no mu mategeko ngo babeho byemewe nk’umugore n’umugabo.

2. Jon Hamm

Yitwa Jonathan Daniel azwi ku izina rya Jon Hamm akaba ari umukinnyi wa filime uzwi cyane muri ‘Mad Men’ yabayemo umukinnyi mukuru ndetse anakora ibijyanye no kwamamaza kuri televiziyo .

Mbere yo gutandukana na Jennifer Westfeldt, Hamm mu mwaka ushize bari [bamaze imyaka 18 bakundana] yagize ati “Nta maraso yo gukora ubukwe nifitemo kandi no kuri Jennifer ni uko kuko nta byitegererezo byiza dufite dukomora mu miryango yacu”.

Hamm kandi yari yaranigeze kuvuga ngo “ku bwanjye ntidukeneye gusinya ku mpapuro ngo tumenyeshe abantu ko tubana nk’umugore n’umugabo kuko ibyo bikorwa n’abateganya kubyara abana kandi njye sibyo binshishikaje, ubwo rero ibyanjye na Jennifer birenze ibyo kubana turebana akana ko mu jisho gusa kandi na we arabizi”

3. Charlize Theron

Theron kuri ubu ufite imyaka 41, nyuma yo gukundana na benshi ari na ko bagenda batandukana yahisemo gufata abana babiri abarera nk’abe kandi ngo ntari mu rugamba rwo gushakisha umugabo ngo babane.

Yagize ati “Ibyo kurongorwa sinigeze rwose mbifata nk’ikintu cy’ingenzi nanjye ubwanjye sinzi impamvu”. Yongeraho agira ati “ Bibaho nkumva nakikundanira n’umuntu ariko rwose ibyo byo gukora ibirori n’ubukwe simbyiyumvamo gusa ku bandi bantu babikunda bikanabashishikaza ndabumva cyane”.

4.Diane Kruger

Diane Kruger ni umunyamideli akaba n’umukinnyi wa filime w’Umudage yigeze gukundana na Guillaume Canet ndetse babana igihe gito ariko bititwa ko barushinze, nyuma yo gutandukana kwabo Diane yahise atsemba arahira ko atazongera gushaka umugabo ukundi.

Icyo gihe yagize ati “Rwose bitari ugushaka kwica intege, sinkizerera mu gushaka umugabo.”

5. Hugh Grant

Uyu mugabo wamamaye cyane mu gusetsa nubwo afite abana batatu ariko mu mwaka ushize ni bwo yeruye avuga atarya iminwa ati “Mu by’ukuri sinizerera mu byo gukora ubukwe, nabonye ingero nyinshi zifatika zigera kuri eshanu zanteye kubizinukwa, mu bundi buryo ibintu byo gushaka mbifata nk’inkomoko nyamukuru y’agahinda”.

6. Oprah Winfrey

Winfrey azwi ku biganiro byo kuri televiziyo cyane cyane mu cye bwite yise ‘The Oprah Winfrey Show’ afite amateka akora ku mutima mu by’urukundo kuko na we ubwe hari igihe yigeze guturika ararira kuri Radio ubwo yari arimo kuvuga inkuru ze z’ahashize mu rukundo rwe na Stedman Graham.

Mu kuvuga iby’ubuzima bwe n’urukundo rwe na Stedman hari aho yageze aravuga ati “Uko yarushagaho kungira intabwa ni ko narushagaho kumva mushaka.”

Oprah avuga ko we na Stedman Graham batarushinze nk’umugore n’umugabo mu myaka igera kuri 30 bamaze bari kumwe.

Ati “Na we mumubajije yababwira ko tutari kumwe kuko n’ubundi tutigeze dushyingiranwa nk’umugore n’umugabo. Ndamutse mfite iyo nyito y’umugore byaba bivuze ko hari ibindi bintegereje, nyine bimwe umugore agomba umugabo”.

7. Naomi Watts

Naomi Ellen Watts yavutse mu 1968 akaba ari Umwongereza utunganya akanakina filime , afitanye abana babiri na Live Schreiber bari kumwe kuva mu 2005 . Naomi mu mvugo ye yumvikanisha ko yishimiye urubyaro yabonye n’uwo bari kumwe ariko umutima we utamusaba gukora ubukwe.

Yagize ati “Ni byo turi kumwe rwose ariko ntabwo tubikenereye impapuro zibyemeza kandi uyu ni umwanzuro utunyuze twembi.”

8. Mindy Kaling

Vera Mindy Chokalingam ukoresha izina rya Mindy Kaling mu mwuga we, ni umwanditsi, umukinnyi wa filime ndetse akaba anazwi nk’umunyarwenya ukomeye.

Yavuze byeruye ko kera yumvaga igihe kimwe kizagera agashaka umugabo bakabyara abana mu buryo bwihuse gusa uyu mukobwa ukiri ingaragu ku myaka 37 ngo yaje kubona ibintu mu bundi buryo.

Yagize ati “Sinkeneye gushaka, nta muntu nkeneye wo kujya agenzura akanasuzuma ibyifuzo byanjye, nimereye neza kandi ndihagije njye ubwanjye”.

[email protected]


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 10 Ukuboza 2016
Copyright © 2009 -2014 - IGIHE Ltd - All Rights Reserved