00:00:00 IGIHE NETWORK KN KINYARWANDA EN ENGLISH FR FRANCAIS

Yakuranye inzozi zo gutwara indege, aminuza muri Farumasi! Ibitaramenyekanye kuri Israel Mbonyi

Yanditswe na Nsengiyumva Emmy
Kuya 30 Nyakanga 2021 saa 08:28
Yasuwe :
0 0

Israel Mbonyi uri mu bayoboye abandi mu muziki wo kuramya no guhimbaza Imana, yakuranye inzozi zo gutwara indege cyangwa kuba umuganga, icyakora aza kwisanga yaminuje muri Farumasi nubwo atunzwe n’umuziki.

Benshi nubwo bakunda umuziki we, hari byinshi batari bazi kuri uyu muhanzi wigaruriye imitima y’abatari bake.

Mu kiganiro na IGIHE, Israel Mbonyi, yavuye imuzi byinshi ku buzima bwe kuva mu bwana kugeza abaye icyamamare.

Israel Mbonyi kugeza ubu ari gukora kuri album ye ya kane byitezwe ko izasohoka mu minsi ya vuba.

Izi album zabimburiwe n’iyitwa "Number one", yasohoye mu 2014 iya kabiri yitwa "Intashyo" yo mu 2017 mu gihe iya gatatu ari na yo aheruka gusohora yitwa "Mbwira".

Incamake ku buzima bwa Israel Mbonyi mu buto

Israel Mbonyi yavukiye muri Repubulika Iharanira Demokarasi ya Congo, i Mulenge. Ni umwana wa gatatu muri barindwi bavukana barimo abakobwa batatu n’abahungu bane, uretse murumuna we ubwiriza ijambo ry’Imana n’undi ucuranga, nta wigeze ahitamo inzira ya muzika.

Afite imyaka itanu ni bwo we n’umuryango bavuye muri RDC bajya gutura mu Rwanda, bahise bajya kuba ku Kimisagara ho mu Mujyi wa Kigali, nyuma baza kwimukira i Musanze kuko ari ho se yari yabonye akazi.

Nyuma y’uko kari karangiye, umuryango wa Israel Mbonyi wasubiye gutura mu Mujyi wa Kigali ari na ho abarizwa kugeza ubu.

Israel Mbonyi yatangiriye amashuri abanza ku Kamuhoza akomereza Kabusunzu hanyuma aza kuyasoreza i Musanze muri EER.

Icyiciro rusange yacyize muri Ecole d’Art de Nyundo, asoreza ayisumbuye i Nyanza muri Ecole Des Science St Louis De Montfort aho yize Imibare, Ubugenge n’Ubutabire.

Nyuma yo kurangiza ayisumbuye yagiye kwiga mu Ishami rya Farumasi mu Buhinde nubwo atari yo yashakaga.

Israel Mbonyi yavuze ko mu bwana bwe yakuze yifuzaga kwiga gutwara indege cyangwa kuba umuganga nubwo bitamuhiriye. Ni umusore wakuranye impano zitandukanye zirimo gukina umupira na karate yavanyemo umukandara w’ubururu.

Yatangiye umuziki yiga mu mashuri abanza, yigishijwe n’umupolisi

Kuva yiga mu mashuri abanza, Israel Mbonyi yakundaga umuziki aza kugira amahirwe yo guhura n’umupolisi witwa Gad wamwigishije gucuranga piano.

Nyuma yo kugira ubumenyi ku gucuranga, yatangiye kujya abikorera mu rusengero yasengeragamo mu Karere ka Musanze.

Umunsi umwe uyu muhanzi wari usanzwe ari umucuranzi, yisanze ari we ugomba kujya atera indirimbo muri korali ye, bagenzi be barabikunda cyane mu rusengero.

Ng’uko uko uyu muhanzi yatangiye urugendo rwe mu muziki akiri umwana ariko atazi ikizavamo.

Indirimbo ye ya mbere ntabwo yigeze imenyekana

Mu 2012 Israel Mbonyi yagiye muri studio akora indirimbo yise "Yanyomoye ibikomere", icyakora ntabwo yigeze ashaka kuyimenyekanisha.

Nyuma yo gukora iyi ndirimbo Mbonyi wari utarafa umuziki nk’icyerekezo cy’ubuzima bwe, yahisemo kujya kwiga mu Buhinde adakoze indirimbo ya kabiri.

Ati “Numvaga nishimye kuba nagiye muri studio, inzozi zanjye zabaye impamo mpita nigira ku ishuri mu Buhinde.”

Mu Buhinde niho Israel Mbonyi yatangiriye no gukora indirimbo kuko abo basenganaga mu Banyarwanda bari batuye muri kiriya gihugu bakundaga uko yaririmbaga.

Israel Mbonyi avuga ko yatunguwe bikomeye n’uburyo indirimbo zari kuri album ye ya mbere yakoreye mu Buhinde zaje kwamamara mu Rwanda.

Igitaramo cya mbere yakoreye mu Rwanda ntacyo yagikuyemo

Ubwo yari arangije amasomo aho yize ibya Farumasi mu Buhinde, Israel Mbonyi wari umaze kugira umubare munini w’abakunda indirimbo ze, yateguriwe igitaramo gikomeye cyo kumwakira mu Rwanda.

Ni igitaramo cyabaye muri Kanama 2015, uyu muhanzi avuga ko ashimira buri wese wagize uruhare ngo kibe ndetse n’abacyitabiriye, iyo muganira ahamya ko nubwo cyari cyiza ariko mu buryo bw’amafaranga ntacyo yakuyemo.

Ati “Ubundi iyo winjiye mu murimo utarasobanukirwa, utariga neza hari igihe abantu bakubeshya, icyo nshimira Imana ni uko twigira mu bintu byose. Igitaramo cya mbere rero ndashimira abantu baje kunshyigikira ariko rwose nta kintu gifatika nakuyemo.”

Avuga ko nubwo nta mafaranga yabonye muri icyo gitaramo ariko yigiyemo ibintu byinshi byamufashije gutegura ibindi byakurikiye kandi Imana yari imuhaye uburyo bwo kwigaragaza.

Kuva kuminuza muri Farumasi akiyegurira umuziki ababyeyi be babyakiriye gute?

Israel Mbonyi yavuze ko mu buzima yagize amahirwe yo kugira ababyeyi bamukunda kandi bamushyigikira. Yemeza ko batigeze bagira impungenge kuko yatangiye umuziki ari ku ishuri mu mahanga atangira kuba icyamamare batamuri hafi.

Ibi byatumye ubwo yari agarutse mu Rwanda bahisemo kumushyigikira, nubwo igitaramo cya mbere yakoze agahomba mu buryo bw’amafaranga cyabanje kubatera amakenga.

Icyakora ku rundi ruhande uyu muhanzi avuga ko ababyeyi be bagiye bifuza ko yashinga Farumasi kuko ari byo yari amaze kuminuzamo ariko ntabashe kubikora kuko umuziki wakomeje kumubana ikintu kinini birangira ahisemo kwikorera.

Ibijyanye n’inkuru z’urukundo rwe ntakunda kubiganira

Kuva yatangira umuziki, Israel Mbonyi ntiyakunze kumvikana mu nkuru z’urukundo, nubwo na we ahamya ko hari igihe ajya ahura n’inkumi, nk’umusore wese akumva agiye kugwa mu mutego ariko ntibijya bibaho.

Israel Mbonyi wemeza ko nta mukunzi afite avuga ko igihe nikigera azamwerekana. Icyakora ngo yigeze kumugira ariko kugeza ubu baratandukanye.

Ati “Nta wuhari ariko naboneka nzamubereka! Kutagira umuntu ntibiba bivuze ko utamugize cyangwa utazamugira, hari igihe muba mwaratandukanye cyangwa hari n’uwo ubona ukavuga uti bizaza ariko nta bihari. Mba numva nzabisubiramo mu gihe nabonye umuntu nkumva umutima uramwishimiye.”

Reba ikiganiro kirambuye na Israel Mbonyi

Israel Mbonyi ni umwe mu bahanzi bazwiho impano yo gucuranga
Nubwo yaje kuvamo umuhanzi w'icyamamare, Israel Mbonyi yakuze yifuza gutwara indege cyangwa kuba umuganga
Israel Mbonyi ni umwe mu bahanzi bakomeye mu muziki wo kuramya no guhimbaza Imana mu Rwanda
Israel Mbonyi mu gitaramo yakoze mu 2017
Akigera mu Rwanda mu 2015 yegukanye ibihembo byinshi muri Groove Awards
Uretse kwiga hanze Israel Mbonyi ajya anatumirwa mu bitaramo bibera hanze y'u Rwanda kuko ni umwe mu bakunzwe muri Diaspora

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .