Patient Bizimana yatumiye abahanzi bakomeye mu Burundi na Kenya mu gitaramo cya Pasika

Yanditswe na Munyengabe Murungi Sabin
Kuya 21 Werurwe 2017 saa 09:46
Yasuwe :
0 0

Umuririmbyi ukunzwe mu ndirimbo zo kuramya no guhimbaza mu Rwanda yongeye gutegura igitaramo cyo kwizihiza pasika, azaririmbana n’abahanzi bakomeye muri Afurika y’Uburasirazuba.

Igitaramo ngarukamwaka Patient Bizimana asanzwe ategura cyitwa ‘Easter Celebration’ kuri iyi nshuro ya gatatu kizabera muri Radisson Blu Hotel ku Kimihurura ku itariki ya 16 Mata 2017.

Patient Bizimana yaherukaga gukora iki gitaramo mu mwaka ushize wa 2016, icyo gihe yari yatumiye umuhanzi w’umuvugabutumwa uri mu bakomeye muri Afurika Solly Mahlangu wahuruje abatari bake kuko icyo gihe haje abantu basaga gato ibihumbi bitatu na magana atanu.

Mu kiganiro na IGIHE, Patient Bizimana yavuze ko mu gitaramo cy’uyu mwaka yatumiye abahanzi bakunzwe muri Afurika y’Uburasirazuba naho mu mwaka utaha akazatumira undi ukomeye cyane muri Afurika hanyuma muri 2019 akazazana umuhanzi umwe mu bubatse izina ku Isi.

Yatumiye Apollinaire Habonimana [asanzwe ari umuhanzi w’umuvugabutumwa mu Burundi] ndetse na Marion Shako wo muri Kenya. Apollinaire azwi cyane mu Rwanda mu ndirimbo zakunzwe na benshi nka “Nama Ntangara” , “Umva icatumye mpinduka” , “Mbega Ubuntu” n’izindi.

Yagize ati “Igitaramo cy’uyu mwaka natumiye abahanzi bakomeye Marion Shako wo muri Kenya na Apollinaire wo mu Burundi, mu mwaka ushize nabwo twari twatumiye umukozi w’Imana ukomeye cyane muri Afurika Solly Mahlangu n’itsinda rye; ni intego nihaye nka Patient Bizimana kuzakora ibishoboka byose Abanyarwanda bakajya bizihiza izuka rya Yesu babifashijwemo n’abakozi b’Imana bakomeye ku Isi.”

Mu gitaramo cya ‘Easter Celebration’ mu mwaka wa 2019 ngo yihaye intego yo kuzatumira umwe mu bahanzi bakomeye mu murimo w’Imana ku Isi nka Darlene cyangwa Don Moen.

Apollinaire Habonimana asanzwe ari umuhanzi w’umuvugabutumwa mu Burundi

Igitaramo cy’uyu mwaka Patient Bizimana n’itsinda rimufasha kugitegura ngo biteze kuzabona abantu benshi kurusha abaje mu mwaka washize[3500] kuko ngo ‘kuva Easter Celebration yatangira gutegurwa ubwitabire bugenda buzamuka’.

Kwinjira mu gitaramo cy’uyu mwaka bizaba ari ukwishyura amafaranga ibihumbi bitanu[5,000frw] mu myanya isanzwe ndetse n’amafaranga ibuhumbi icumi[10,000frw] mu myanya y’icyubahiro.

Marion Shako wo muri Kenya

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza