Nabonibo uririmba indirimbo zihimbaza Imana yashize amanga avuga ko aryamana n’abo bahuje igitsina

Yanditswe na Uwiduhaye Theos
Kuya 27 Kanama 2019 saa 08:54
Yasuwe :
0 0

Umuhanzi Albert Nabonibo uvuka mu Karere ka Gicumbi, yatunguranye avuga yeruye ko ari umutinganyi, yemeza ko yatangiye kubikora ubwo yigaga mu mashuri yisumbuye.

Abaryamana bahuje ibitsina bakunze kwita ‘Abatinganyi’ ntabwo bakunze kubyemerera mu ruhame ahubwo abenshi babikora babigira ibanga ku buryo bukomeye.

Mu Rwanda abantu bavuga ko babikora wababarira ku mitwe y’intoki ariko ni ibintu bisigaye bikorwa cyane cyane.

Umuhanzi witwa Albert Nabonibo uririmba indirimbo zo kuramya no guhimbaza Imana yavugiye imbere ya camera y’umunyamakuru Ayabba Paulin yitwa Umugisha TV ko ari umutinganyi kandi ko abishimira Imana.

Uyu musore yabivuze ubwo umunyamakuru yari amubajije ibijyanye n’ubuzima budasanzwe abamo bwo kuba aryamana nabo bahuje ibitsina.

Undi mu gusubiza ati “Ntabwo nzi uko babyita kose ariko birahari kandi ni ubuzima busanzwe uko wabyita kose. Nanjye ndi umwe mu babayeho muri ubwo buzima ndyamana nabo duhuje igitsina cyane rwose ndabikora.”

Yakomeje abazwa uko byaje mu gusubiza Nabonibo yavuze ko akiri mu mashuri abanza mu 1995 yari umwana utuje udasabana n’abandi atazi neza Isi arimo, ngo yageze mu mashuri yisumbuye akomeza guceceka ntiyakunda gusabana gusa ntiyari yakamenye niba koko ari ‘umutinganyi’.

Ati “Niyo mpamvu nkubwiye ngo uko babyita kose ni ubuzima busanzwe kuko niko umuntu aba ameze, niko aba ateye kandi niko umuntu yisanze nta gishya kirimo. Ni uko navutse, nta wabinyigishije.”

Arongera ati “Nkiri muto mu mashuri abanza nko mu 1995 nari mfite imyaka icyenda, mu buto bwanjye nakuze ntavuga nitonda ncecetse ariko ntabwo nari cya bakobwa bitewe n’uko umuntu aba afite amateka atandukanye ntabwo nari nishimye.”

“Amashuri abanza nayize meze gutyo kandi icyo gihe sinari nakamenye icyo ndicyo niba ndi umutinganyi. Ngeze mu mashuri yisumbuye nibwo natangiye kumva ko mfite ibyiyumviro byo kuryamana n’abahungu bagenzi banjye ntabwo nabigaragazaga cyane kuko nari ncecetse kandi ndi n’umuririmbyi muri korali ariko bindimo.”

Ngo Nabonibo yaryamanye n’abasore benshi icyo gihe ari mu mashuri yisumbuye, ayasoje yatangiye akazi nibwo kwiyumvamo bya nyabyo ko ari ‘umutinganyi’ byaje ahura n’abantu bateye nkawe.

Uyu muhanzi yakomeje avuga ko aba yumva ari umugabo ku buryo iyo abonye undi wiyumvamo ko ari umugore baryamana nta kabuza.

Ku bwa Nabonibo ngo kuba yaririmbiraga Imana ari umutinganyi ntaho bihuriye kuko ibyo ari ubuzima bwe bwite kandi ubutinganyi bukaba bushobora gukorwa n’abakozi b’Imana batandukanye.

Ati “Ushobora kuba uri Pasiteri ukaba umutinganyi, ushobora kuba uri Padiri ukabikora ushobora kuba uri umutinganyi ukaba Minisitiri, ubuzima bwawe ufite butandukanye nibyo ukora kuko ibyo dukora hari igihe tubikora kuko twabyigiye ariko ntaho bihuriye n’ubuzima bwacu.”

Uyu musore avuga ko yumva ko ari ibintu bisanzwe kuba ari umutinganyi kuko yize kandi akaba ahura na benshi bize. Ababifata gutyo ngo ni imyumvire yabo, we ngo ajya kubikora yagishije inama aza kubona ko kuba ari umutinganyi ari ubuzima busanzwe.

Kuri we ngo ntabwo yavuga yego cyangwa oya ku byo gukora ubukwe n’umugore.

Nabonibo yakoze indirimbo zitandukanye zirimo ‘Umenipenda’, “Sogongera” n’izindi. Yatangiye kumenyekana mu 2014.

Reba Sogongera, indirimbo ya Nabonibo

Ikiganiro Nabonibo yagiranye n’Umunyamakuru Ayaba Paulin

Uyu muhanzi w'indirimbo zihimbaza Imana yemeje ko aryamana n'abagabo bagenzi be, aho asobanura ko nawe ariko yisanze atari ibintu yigishijwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza