Itorero Redeemed Gospel Church ryakoze igiterane cyo gusengera u Rwanda

Yanditswe na Munyengabe Murungi Sabin
Kuya 12 Nzeri 2016 saa 07:41
Yasuwe : XX
0

Itorero rya Redeemed Gospel Church Rwanda ryongeye gutegura igiterane ngarukamwaka kizamara iminsi 40 , kuwa Gatandatu tariki ya 10 Nzeri 2016 bibanze ku nyigisho n’amasengesho yo gusabira igihugu.

Iki giterane cy’amasengesho cyatangiye kuwa 1 Nzeri kizasozwa kuwa 10 Ukwakira 2016. Ku munsi wa cumi cyabereye aho iri torero ryimukiye mu Mujyi wa Kigali mu nyubako yahoze ikoreramo Banki ya Kigali.

Mu nyigisho zatanzwe ku munsi wa cumi, Bishop Rugagi Innocent uyoboye itorero Redeemed Gospel Church yasengeye u Rwanda arusabira amahoro ndetse n’inzego zose z’ubuyobozi yazisabiye umugisha mu mikorere ya buri munsi ngo bagire imbaraga zikomeza gukora ibizamura igihugu.

Yavuze ko yizeye neza ko Imana igiye guha umugisha u Rwanda nk’uko yabigiriye Abayisiraheli. Yagize ati “Imigisha Imana yasezeranyije Isirayeli natwe tuyiboneho. Imana ya Isirayeli ni Imana y’u Rwada, ni iy’Abanyarwanda»

Mu buhanuzi bwe kuri uwo munsi, Bishop Rugagi Innocent yavuze ko ibibazo byose u Burundi burimo bigiye gukemuka ndetse n’imipaka ikongera igafunguka. Yasabye impunzi z’Abarundi aho ziri hose kudacibwa intege n’akaduruvayo kari mu gihugu cyabo kuko ngo “Imana igiye kubakorera ibitangaza.”

Yagize ati “Imana igiye guha umugisha Abarundi, Igiye guha amahoro abarundi, mpagaze mu mavuta y’ubuhanuzi ndasengera u Burundi. Ndashimira ko mbonye imipaka y’igihugu ifungutse. Aho AbaruNdi bose bari mbatuyeho umugisha.”

Igiterane cyaranzwe n’ibihe bidasanzwe birimo ubutumwa bwo mu ndirimbo no mu ijambo ry’Imana buherekejwe n’ubuhanuzi Bishop Rugagi avuga ko “Imana yanyujije mu mukozi wayo kugira ngo bugere ku bantu.”

Mu bakirisitu Bishop Rugagi yahanuriye harimo umukobwa yabwiye ko Imana yabwiye ko Imana igiye kumuhindurira amateka ikamuvana mu kazi kamuteshaga agaciro yakoraga ikamuha akandi ko gucuruza. Hari n’undi mukobwa yabwiye ko Imana yamubwiye ko ikuyeho impanuka yashoboraga kuzahitana mukuru we uba i Nairobi.

Iki giterane cyitabiriwe n’abantu bari baturutse mu ntara zose z’igihugu n’abashumba b’amatorero yo mu Rwanda n’abavugabutumwa banyuranye barimo n’abaturutse hanze y’igihugu.

Yasengeye u Rwanda afashe ibendera ry'igihugu

Mu gihe cy’iminsi 40 y’iki giterane kizabonekamo abakozi b’Imana bavuye hirya no hino ku isi nka Apôtre Peter Nyaga wo muri Tanzania , Juliane Kyula wo muri Kenya, Bishop Ashili wo muri mu Afurika y’Epfo, Pastor Jacob wo muri Australia n’abandi.

Bishop Rugagi Innocent ubwo yigishaga muri iki giterane
Umukobwa wahanuriwe iby'impanuka

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza