Israel Mbonyi yakoze indirimbo ifite n’amashusho ku nshuro ya mbere

Yanditswe na Muvunyi Arsène
Kuya 1 Kanama 2019 saa 03:24
Yasuwe :
0 0

Umuhanzi w’indirimbo zo kuramya no guhimbaza Imana, Israel Mbonyi, yashyize hanze indirimbo ye nshya yise “Karame” yafashe amajwi n’amashusho imbonankubone.

“Karame” irimo amagambo yo kuva mu byaha, kwiyegurira Imana no kunezerwa mu buntu bwayo.

Mu gitero cya mbere agira ati “Anyemeza ko ndi umunyabyaha ngo ninze, negere aho ari ku gicaniro, ngo mbabarirwe ndirimbe indirimbo z’urukundo.”

Ni yo ndirimbo ya mbere Israel Mbonyi akoze agaragara mu mashusho yayo, bakaba barayafashe imbonankubone ari kuririmba [live recording].

Israel Mbonyi yabwiye IGIHE ko kuririmbira abantu, anafata amashusho byari akazi gakomeye kuri we n’abo bafatanyije, kuko byabasaga kwigengesera mu byo bakoraga byose.

Ati “Biragoye, hano ntabwo tujya tubikora neza ariko twifashishije imbaraga nyinshi z’abantu batandukanye, wari umushinga munini cyane. Twari dufite abantu nka 400 mu cyumba, byasabaga ko ubataramira ukanamenya ko uri gufata amashusho, wagomba kwitonda ariko udakuye abantu mu mwuka ngo ubashyire muri gahunda yo gufata amashusho.”

Mu busanzwe “Karame” ni indirimbo ifite amagambo make, ku buryo irimbwe mu buryo busanzwe itarenza iminota itanu ariko yasohotse ifite iminota 12 n’amasegonda 54. Mbonyi avuga ko byatewe n’uko bagiye mu mwuka bakisanga yamaze icyo gihe cyose.

Ati “Hari umunezero mwinshi ku buryo indirimbo twayigize ndende ariko ubwayo urebye amagambo ni make cyane, twagiye dusubiramo.”

Uyu muhanzi ukunzwe na benshi mu muziki wo kuramya no guhimbaza Imana, yatangaje ko yafashe amashusho y’indirimbo ze zitandukanye akaba yitegura kuyamurika.

N’ubwo yatangiye gukora amashusho yafashwe bacuranga imbonakubone, Israel Mbonyi avuga ateganya no kuzakora amashusho mu buryo busanzwe ibintu yari atarakora mu gihe cyose amaze mu muziki.

Israel Mbonyi yakoze indirimbo ifite amashusho bwa mbere
Karame yafashwe amashusho mu gikorwa gisa n'igitaramo cyabaga imbonankubone
Abaririmbyi bafashije Israel Mbonyi mu ndirimbo ye yise Karame

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza