Igiterane cya Pentecôte cyahuruje abatari bake i Kigali

Yanditswe na Sengurebe Joel
Kuya 21 Gicurasi 2018 saa 08:20
Yasuwe :
1 0

Itorero rya ADEPR ururembo rw’Umujyi wa Kigali ryakoze igiterane gikomeye cyo kwizihiza umunsi mukuru wa Pentecôte, cyabaye mu mpera z’icyumweru gishize gihuruza abatari bake.

Iki giterane cyo kwizihiza imanuka ry’umwuka wera [Pentecôte] cyabaye ku wa Gatandatu tariki ya 19 Gicurasi 2018 kuri Stade ya Kaminuza Yigenga ya Kigali [ULK] ku Gisozi.

Ni igiterane cyaranzwe n’ibyishimo bikomeye ku bacyitabiriye ndetse cyagaragayemo udushya twinshi harimo ubuhanuzi, kwishimira indirimbo z’amakorali, kubatizwa mu mwuka wera, abarenga 50 bakiriye agakiza n’ibindi.

Muri iki giterane, abayobozi bakuru b’itorero batanze inyigisho zibanda ku kwibutsa abakirisitu ko badakwiye kwizihiza uyu munsi nk’ikimenyetso ahubwo bakwiye kubikorana intego iberekeza heza.

Rev. Karuranga Ephrem, Umuvugizi w’iri torero yasabye abakirisitu ko badakwiriye kwizihiza Pentecôte by’umuhango gusa.

Yagize ati “Abakirisitu benshi bibuka ko umwuka wera akorera mu itorero ku munsi wa Pentecôte gusa. Itorero ry’Imana dukwiye kumenya ko Pentecôte atari umuhango, ahubwo ko igomba guhora mu mitima yacu no mu bikorwa byacu kuko umwuka wera ari wo udushoboza gukora umurimo w’Imana umunsi ku munsi."

Yongeyeho ko abakirisitu bagomba gukomeza kugirira icyizere umwuka wera, kuko agikora nk’uko yakoraga. Ati “Umwuka wera aracyahari mu itorero, aracyafasha itorero, nabashishikariza rero gushaka no gukomeza kubana nawo, ndetse no kuyoborwa nawo kuko ijambo ry’Imana rivuga ngo ababana n’umwuka w’Imana nibo bana b’Imana."

Rev. Kalisa Emmanuel, Umuyobozi wa ADEPR mu Rurembo rw’Umujyi wa Kigali yumvikanye asa n’ushimangira ko kuri bo Pentecôte ari ishingiro rikomeye ry’itorero ryabo.

Yagize ati “Pantekote niyo yabyaye itorero, kandi n’imbaraga zashyigikiye ijambo ry’imana, rituma umuntu yizera kandi akabaho ubuzima bwubaha Imana buri munsi."

Korali Hoziana ibarizwa muri ADEPR Nyarugenge imaze kuba ubukombe mu ndirimbo zihimbaza Imana

Muri iki giterane korali zatumiwe zose zishimiwe ku rwego rukomeye uhereye kuri Hoziana imaze kuba ubukombe mu murimo w’Imana ndetse na mugenzi wayo Shalom zibarizwa muri Nyarugenge.

Izindi zataramiye abatari bake bari bitabiriye iki giterane, harimo Jehovah Jileh CEP ULK , Besarel ya ADEPR Murambi, Siloam ya ADEPR Kumukenke, Sauni yo mu Cyahafi, Ijwi ry’umwami Yesu ya ADEPR Kacyiru, Elayo ya ADEPR Gatenga, Abakorera Yesu ya Rukurazo, Duhuzumutima ya ADEPR Muhima, Faradja ya ADEPR Kimihurura na Garedi ya ADEPR Kicukiro Shell.

Igiterane cyabaye kuwa Gatandatu tariki ya 19 Gicurasi 2018 mu gihe umunsi mukuru wa Pentecôte wizihijwe bucyeye bwaho ku Cyumweru. Abateguye iki giterane bavuze ko cyitabiriwe n’abagera ku bihumbi bitatu.

Umuvugizi wungirije wa ADEPR, Rev. Karangwa John n'Ushinzwe Ubutegetsi n’Imari, Umuhoza Aurélie, bitabiriye igitaramo cya Pentecôte
Abayobozi bakuru mu Itorero rya ADEPR bitabiriye igitaramo cyo kwibuka imanuka ry'Umwuka Wera
Korali Shalom yo muri ADEPR Nyarugenge yahembuye abitabiriye igitaramo
Umuvugizi wa ADEPR, Rev. Karuranga Ephrem (ibumoso) n'abandi bayobozi mu itorero bahimbaza Imana
Igiterane cya Pentecôte cyahuruje abatari bake i Kigali
Umuvugizi wungirije wa ADEPR, Rev. Karangwa John, yatanze ubutumwa bushimangira akamaro k'Umwuka Wera ku buzima bw'umukirisitu
Uhereye ibumoso: Umuvugizi wa ADEPR, Rev. Karuranga Ephrem; Umuyobozi wungirije w’Ururembo rw’Umujyi wa Kigali, Rev Muntu Benjamin n'Umuvugizi wungirije wa ADEPR, Rev. Karangwa John bari mu mwuka baramya
Umuvugizi wa ADEPR, Rev. Karuranga Ephrem, yasabye abakirisitu kutizihiza Pentecôte by’umuhango gusa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza