00:00:00 IGIHE NETWORK KN KINYARWANDA EN ENGLISH FR FRANCAIS

Dorcas, Vestine n’umubyeyi wabo bahuye na Murindahabi basiga abantu mu rujijo

Yanditswe na Nsengiyumva Emmy
Kuya 10 Nyakanga 2021 saa 02:47
Yasuwe :
0 0

Nyuma y’iminsi havugwa umwuka mubi hagati y’umunyamakuru Murindahabi Irénée n’umubyeyi wa Dorcas na Vestine, impande zombi zahuye icyakora ikiganiro cyabo cyongera gusiga urujijo mu bagikurikiye.

Mu kiganiro Murindahabi yanyujije kuri shene ye ya Youtube, yaganiriye n’aba bahanzikazi asanzwe afasha, bahamiriza abari babakurikiye ko nta kibazo na kimwe bafitanye ndetse n’umubyeyi wabo bamaze kwiyunga.

Ni ikiganiro cyibanze cyane ku gukemura ikibazo cyari hagati y’uyu munyamakuru n’umubyeyi w’aba bana, icyakora cyarangiye nta cyemezo runaka cy’imikoranire cyafashwe.

Mu kiganiro na IGIHE, Murindahabi yagize ati "Ikintu cyihutirwaga cyari ukugira ngo ducubye aya magambo n’ibibazo byabayeho nyuma y’ibi ubu tugiye kureba ibyakorwa kugira ngo ibikorwa bikomeze."

Uyu munyamakuru yavuze ko yamaze kumvikana n’ababyeyi b’aba bahanzikazi, ibijyanye n’ibikorwa bya muzika Murindahabi yavuze ko mu minsi iri imbere ari bwo azabigarukaho.

Ubwo uyu munyamakuru yaganiraga n’aba bahanzikazi, umubyeyi wabo wari wabaherekeje yaryumyeho amubwira ko we atameze neza, arwaye bityo ko ntacyo yifuza kuvuga.

Ni ikiganiro cyagarutse ku kuba aba bahanzikazi batarishimiye ibimaze iminsi bivugwa, by’umwihariko abantu bari bakomeje kwibasira umubyeyi wabo.

Vestine na Dorcas bavuze ko batigeze batandukana na Murindahabi, bati “Ibi bintu ukuntu byaje ni Satani wabizanye harimo ibintu byinshi byo kubeshya! Ukuri ni uko icyo Imana yifatanyirije nta muntu washobora kugitandukanya.”

Bakomeje bavuga ko byinshi byabaye atari bo babigizemo uruhare ndetse n’umubyeyi wabo ntarwo yigeze abigiramo.

Bati “Ubundi umubyeyi wacu nta gahunda yari afite yo kukuvuga nabi (bavugaga Murindahabi), ibintu by’itangazamakuru ntabwo ari ibintu yari amenyereye, ntabwo yari afite gahunda yo kubijyamo! Yaje i Kigali aje gufata shene ya Youtube, n’uwamuzanye yamubwiye ko ari yo aje gufata.”

Aba bana bavuze ko batashimishijwe na mba n’ibintu umubyeyi wabo yakoreshejwe, bahamya ko yababwiye ko yahisemo kuvuga kugira ngo abantu barekere gutuka uwitwa Aimable wari wakomeje kwijundikwa ku mbuga nkoranyambaga.

Dorcas na Vestine basabye abantu kurekera aho gutuka umubyeyi wabo, bavuga ko bababajwe n’ibyabaye.

Ni ikiganiro cyarangiye yaba Murindahabi ndetse n’aba bahanzikazi batavuze niba inyandiko yasohotse ibatandukanya iteshejwe agaciro cyangwa bakomoje ku kibazo cy’uko bazakomeza muri Rwanda Gospel Stars Live cyangwa niba ari ibintu bari busezere.

Icyakora bongeye gushimangira ko byinshi bibi byavuzwe kuri Murindahabi biturutse ku mubyeyi wabo, byari ibyo yashutswe n’abantu batakunze kugarukaho.

Murindahabi asoza yagize ati “Sinifuza kubabaza ibintu byinshi kuko turi kumwe tuzaganiriza abantu, ni uku birangiye yaba abana barahari ntaho bagiye. Umuziki barawukomeje, yaba ibirego bandegaga namenye ko umubyeyi atari we wabyanditse! Ibindi byose nabisubiramo ikibazo ntabwo cyari umubyeyi ahubwo ni bariya bantu.”

Dorcas na Vestine bo basoza ikiganiro bemeje ko bakiri kumwe na Murindahabi ndetse nta n’igiteze kubatandukanya.

Dorcas na Vestine beherekejwe n’umubyeyi wabo bahuye n’umunyamakuru Murindahabi Irénée

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .