Bwa mbere Umujyi wa Kigali wahuje abahanzi bahimbaza Imana mu gitaramo ngarukakwezi utegura

Yanditswe na Uwiduhaye Theos
Kuya 28 Ugushyingo 2019 saa 09:16
Yasuwe :
0 0

Abahanzi Ashimwe Dominique, Alexis Dusabe, Bosco Nshuti na Korali Siloam ikorera umurimo w’Imana mu Itorero rya ADEPR Kumukenke batumiwe mu gitaramo ngarukakwezi cy’Umujyi wa Kigali kizaba kuri uyu wa 29 Ugushyingo 2019 muri Car Free Zone.

Iki gitaramo kiri mu rukurikirane rw’ibyatangijwe n’Umujyi wa Kigali muri Nyakanga uyu mwaka bigamije gususurutsa abawutuye.

Ni ku nshuro ya mbere cyatumiwemo gusa abahanzi baririmba umuziki uhimbaza Imana cyane ko ibyabanje byose byatumirwagamo abahanzi baririmba indirimbo zisanzwe.

Undi mwihariko iki gitaramo gifite ni uko abahanzi bose bagihurijwemo babarizwa mu Itorero rya ADEPR.

Tombola Felicie ushinzwe Itangazamakuru n’Itumanaho mu Mujyi wa Kigali, yabwiye IGIHE ko iki gitaramo cyateguwe kugira ngo buri wese yibone mu bimukorerwa n’ibyo ategurirwa.

Yakomeje avuga ko “Umujyi wa Kigali ni uw’abantu bose , abaririmba indirimo zisanzwe n’abaririmba izo guhimbaza Imana bose ni abaturage b’Umujyi. Buri wese rero azajya abona ibimushimisha mu bitaramo bitegurwa nawo.”

Abahanzi batumiwe muri iki gitaramo kuri iyi nshuro banditse ibihangano byahembuye imitima ya benshi bitewe n’ubutumwa bubirimo.

Alexis Dusabe ari mu bahanzi b’abahanga bafite ibihangano bihembura benshi, izina rye ryazamuwe n’indirimbo zirimo ‘Umuyoboro’, ‘Ninde Wamvuguruza’, ‘Njyana i Gologota’, ‘Tuzazamurwa’, ‘Igitambo Cyanjye’ n’izindi.

Ashimwe Dominique na we ari mu baramyi bo muri ADEPR ufite izina kuva mu myaka isaga icumi ishize. Azwi mu bihangano nka “Nemerewe kwinjira’’, “Ashimwe”, “Ndishimye”, “Azanyibuka’’, “Wambereye imfura’’ n’iyo yise “Akadomo ka nyuma’’.

Bazafatanya na Bosco Nshuti, uri mu bahanzi bazamukanye ingoga. Ni we wegukanye igihembo cy’umuhanzi mwiza muri Groove Awards Rwanda 2018. Indirimbo yatumagije izina rye ni iyitwa “Ibyo Ntunze” na “Umutima” iri mu zo aheruka gusohora. Uyu musore anabarizwa muri Korali Siloam nayo iri mu zifite igikundiro mu bakunzi b’indirimbo zihimbaza Imana.

Ku wa 26 Nyakanga 2019 nibwo Umujyi wa Kigali watangije gahunda yo gususurutsa abawutuye, utegura ibitaramo bizajya biba buri wa Gatanu wa nyuma w’ukwezi, aho abahanzi batandukanye bakunzwe mu Rwanda batanga ibyishimo bifashishije umuziki.

Kwinjira mu gitaramo kizabera mu gace kahariwe abanyamaguru mu Mujyi wa Kigali kuva saa Kumi n’imwe z’umugoroba ni ubuntu ku bantu bose bazacyitabira.

Alexis Dusabe uri mu bahanzi bafite ibihangano byakunzwe kuva mu myaka yo hambere mu bazataramira muri Car Free Zone
Ashimwe Dominique uri mu bahanzi bakunzwe yatumiwe muri iki gitaramo
Umuhanzi Nshuti Bosco azataramana n'abizatabira igitaramo ngarukakwezi gisoza Ugushyingo
Korali Siloam ikorera umurimo w’Imana mu Itorero ADEPR muri Paruwasi ya Kumukenke mu Murenge wa Gisozi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza