Bigirimana yasobanuye ibye n’umugore wamuhetse mu mugongo amuhanurira

Yanditswe na Bukuru JC
Kuya 9 Gicurasi 2017 saa 12:12
Yasuwe :
1 0

Ni bake batabonye amashusho atangaje amaze iminsi acicikana ku mbuga nkoranyambaga mu Rwanda aho umugore w’umuvugabutumwa yashyize mu mugongo umugabo w’igikwerere amuvugira isengesho ryamaze iminota igera kuri itanu.

Ku batamenyereye imbaraga z’abahanuzi bavuga iby’Imana yabatumye ku bwoko bwayo batangariye aya mashusho bamwe bakayaherekeza amagambo yumvikanishaga ko ‘uyu mugore ari umuhanuzi w’ibinyoma’ kubera uburyo yasukiranyaga amagambo y’Ikinyarwanda akavangamo andi yo mu ndimi zitazwi.

Uyu mugore w’umuhanuzi yahuriye n’uyu mugabo yahetse mu masengesho baheruka gukorera ku musozi w’amasengesho muri Uganda witwa Kampala Prayer Mountain. Umugore ntaramenyekana izina gusa umugabo wasengewe ari mu mugongo we yitwa Bigirimana Egide.

Bigirimana Egide yagiranye ikiganiro n’ikinyamakuru cyandika inkuru z’iyobokamana Ibyishimo.com asobanura byimbitse uko yahetswe n’uyu muhanuzi anavuga ku bibazo bivugwa ko byakuruye umwuka mubi mu rugo rwe.

Yagize ati “Hariya hantu twari turi ni ku musozi w’amasengesho wa Kampala Prayer Mountain muri Uganda, twari twahagurutse tugiye gusenga tujyanye ibyifuzo byacu ndi kumwe na madamu ndetse n’abandi bantu nka babiri. Umudamu wanjye twari turi kumwe dusengana yitwa Bazizane Salamu . Niba mwarabonye umuntu wari wicaye wambaye umupira wa orange, umuntu wari umuryamye iruhande ni we mudamu wanjye.”

Bigirimana Egide avuga ko atari asanzwe aziranye n’uriya muhanuzi w’umugore ndetse ngo babonanye bwa mbere ku munsi wasoje amasengesho aheruka kugirira muri Uganda.

Ati “Uriya muhanuzi wampetse ntawe nzi, twahuriye hariya ku munsi wa nyuma adusanze aho twari turi gusengera , araza turasengana. Ni Umunyarwanda , nyuma yaho namubonye aje kumbaza ukuntu ako ka video kageze ahantu hose, ariko njyewe ntawe nari nzi. N’uyu munsi ntabwo nakubwira amazina ye , nta nimero za telefone ye mfite , byari buriya hariya, tukarangizanya kuko nta kindi twari gukurikirana.”

Inkuru zimaze iminsi zicicikana ko umugore wa Bigirimana yaba yarahukanye akisubirira iwabo nyuma yo kubona umugabo we yaragiye mu masengesho agahekwa n’undi mugore. Ibi ngo byakuruye umwuka mubi gusa Bigirimana arabihakana.

Yagize ati “Nta na kimwe byangije kuko umugore wanjye twari kumwe, twagiye gusenga ibintu byose abireba kandi yemera ubuhanuzi . Ni byinshi byagiye bihanurwa kandi bigasohora akabibonesha amaso ye. Hari ibyo bamuhanuriye arabizi bigasohora , arabizi rero. Nta na kimwe byangije mu muryango wanjye kuko nari najyanye nawe kandi ndi kumwe na Pasiteri unyobora.”

Bigirimana Egide wahetswe mu mugongo n'umugore w'umuhanuzi. Photo/Ibyishimo.com

Iyi video imaze iminsi isakazwa ku mbuga nkoranyambaga, bivugwa ko yafashwe na Pasiteri uyobora Egide Bigirimana mu rusengero gusa we ashimangira ko atazi neza umuntu wayifashe kuko ubwo bamuhanuriraga hari ikivunge cy’abantu.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza