Kwamamaza

Amateka ya Patmos Choir yatangiriye umurimo wo kuririmba mu bukwe

Yanditswe kuya 16-11-2016 saa 10:52' na Emma-Marie Umurerwa


Patmos Choir, ni imwe muri korali zifite amateka akomeye mu Rwanda, yashingiwe mu bukwe n’itsinda ry’abantu batandatu biganye, none imyaka 20 irashize bavuga ubutumwa bwiza mu ndirimbo zo guhimbaza Imana.

Mu 1996, nibwo itsinda ry’abantu batandatu bo mu Itorero ry’Abadiventisite b’umunsi wa Karindwi biganye mu Repubulika Iharanira Demokarasi ya Congo batashye ubukwe bw’umwe muri bo i Nyamirambo mu Mujyi wa Kigali, baramuririmbira, bahita bashinga korali imaze kuba ubukombe mu Rwanda no mu mahanga.

Niyonzima Aimable, umutoza akaba na Perezida wa Patmos Choir yatangarije IGIHE ko bose umugambi batangiranye wari umwe ari nacyo cyabashoboje kuba bamaze kugera kuri byinshi bishimishije.

Yagize ati “Hari umwe muri twe witwa Gatoya Samuel yari afite ubukwe, turatekereza dusanga ikintu twamukorera mu bukwe bwe ari ukumuririmbira. Icyo gihe twararimbye bigenda neza duhita twiyemeza gushinga korali ari yo yitwa Patmos uyu munsi.”

Akomeza avuga ko nubwo igitekerezo cyagizwe n’abantu batandatu, bahise babona abandi bagera kuri 30 bahuza imyumvire. Ati “Mu gihe gito twahise tubona abandi 30 badusabye ko twafatanya , ariko ubu turi 18 gusa kubera ko abandi bagiye bajya mu bice bitandukanye by’Isi, bamwe barashatse abandi bajya kwiga ndetse no mu kazi.”

Ntibigaya ubuke

Mu gihe izindi korali usanga zifite abaririmbyi bakabakaba mu magana, abayobozi ba Patmos Choir bo bavuga ko kuba bagizwe n’umubare muto bitababuza gukora nk’ibyo abenshi bakora.

Niyonzima ati “Dufite album eshatu z’amashusho hamwe na album zirindwi z’amajwi, tukaba dufite n’indirimbo nyinshi zishobora kujya kuri album esheshatu, turirimba mu Kinyarwanda, Igifaransa, Icyongerezwa ndetse n’Igiswahili. Kuba tutari umubare munini ntibitubuza gukora nk’ibyo izindi choral zifite umubare munini w’abaririmbyi zikora.”

Akomeza avuga ko muri izi ndirimbo bafite zirimo ubutumwa bwiza harimo zimwe zikundwa cyane kurusha izindi, atanga urugero ku yitwa ‘Ndagutakambira’ na ‘Nzi Yesu’.

‘Patmos Choir yavuze ubutumwa mu Rwanda no mu mahanga’

Uwimpuhwe Chantal, ushinzwe imibanire y’abaririmbyi, avuga ko mu myaka 20 ishize, bakoze umurimo w’Imana mu Rwanda no mu mahanga.

Ati “Twagiye kuririmba Uganda, i Goma, hamwe na Nairobi kandi n’abaririmbyi bacu bari muri Amerika na Canada iyo bahuye baririmba indirimbo za chorale. Ntibyari byoroshye ariko twafashijwe n’Imana kandi twizeye ko izakomeza kudufasha.”

Akomeza avuga ko bafite inzozi zo kuvuga ubutumwa ku Isi yose. Ati “Niyo tutahagera n’amaguru yacu, twifuza ko ibihimbano byacu byagera mu bihugu bitandukanye byo ku Isi.”

Uretse kuvuga ubutumwa mu ndirimbo, abaririmbyi ba Chorale Patmos, bakora n’ibikorwa by’urukundo, bagafashanya hagati yabo, bafasha abatishoboye, imfubyi ndetse n’abapfakazi.

Umujyanama mukuru w’iyi korali, Edourd Barema, avuga ko mu myaka ibiri iri imbere bafite imishinga itandukanye. Ati “Duteganya gushinga ishuri ryigisha abana b’incuke, duteganya kandi gushyiraho ikigega tuzajya dushyiramo amafaranga yo kudufasha mu ivugabutumwa n’indi mishinga.”

Nyuma y’imyaka 20 Chorale Patmos imaze ivuga ubutumwa, ubuyobozi bwayo buvuga ko iri gutegura ibirori byo kwizihiza iyo sabukuru, baboneraho no gufata ingamba z’indi myaka iri imbere.

[email protected]


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Monday 5 Ukuboza 2016
Copyright © 2009 -2014 - IGIHE Ltd - All Rights Reserved