Zahara ufite ubuhanga bwihariye mu kugorora ijwi agiye gutaramira i Kigali

Yanditswe na Dusabimana Aimable
Kuya 24 Gicurasi 2018 saa 06:37
Yasuwe :
0 0

Umuririmbyi Zahara ukomoka muri Afurika y’Epfo yaje mu Rwanda kwitabira igitaramo gikomeye kiri mu ruhererekane rw’ibya Kigali Jazz Junction, azaririmbana na Social Mula ufite igikundiro mu bakunda umuziki mu gihugu.

Bulelwa Mkutukana, witwa Zahara mu muziki, ni umunyempano ukomeye mu kugorora ijwi no kuriha umuyoboro bijyanye n’amarangamutima y’ubutumwa yifuza gutambutsa. Yamamaye mu ndirimbo "Loliwe" n’izindi nyinshi zamuhaye ikuzo ryo gukundwa n’abakomeye barimo Nelson Mandela wayoboye Afurika y’Epfo.

Igitaramo cya Zahara i Kigali gitegerejwe mu ijoro ryo ku wa Gatanu, 25 Gicurasi 2018 muri Serena Hotel. Yatumiwe na RG Consults itegura Kigali Jazz Junction itewe inkunga n’ibigo bikomeye mu Rwanda birimo Airtel na Bralirwa binyuze mu kinyobwa cya Mützig.

Mu kiganiro Zahara yagiranye n’itangazamakuru kuri uyu wa Kane, yavuze ko mu byo akora yibanda ku muziki ufite ubutumwa n’inyandiko zifite ireme kuko umuziki nubwo ari ubucuruzi ukwiye gukorwa mu buryo buhindura imibereho y’abantu. Yijeje Abanyarwanda igitaramo cy’umwimerere.

Yagize ati “Umuziki ni ugutera abantu ishyaka ry’icyiza, na hano naje ngo ntere ishyaka abantu, mbanza kubikora mu bihugu byose, habe Kenya, habe Uganda, na hano mu Rwanda ni uko. Imana ishimwe nahageze muri Kigali.”

Yatanze urugero rw’uburyo agitangira umuziki benshi bagiye bashaka kumwinjiza mu muziki wo kuvuga ibigezweho ariko bitigisha akabyanga kuko yifuza kugira impano ye umurage no ku hazaza.

Yavuze ko yagize umugisha wo kwishimirwa n’abakomeye barimo Nelson Mandela na Winnie Mandela uherutse kwitaba Imana wamubwiye ko ari umunyempano ukomeye bikamutera imbaraga zo gukora umuziki uhindura Isi bitandukanye no kurarura abantu.

Umuyobozi ushinzwe Imenyekanishabikorwa muri Bralirwa, Patricia Garuka Mugume, yavuze ko urugendo mu mikoranire yo gutegura Kigali Jazz Junction ruhora ari rwiza nk’abafatanyabikorwa bayo bityo bakaba bishimiye kwakira uyu muhanzi wiyongereye ku bandi bakomeye muri Afurika y’Epfo bagiye bakorana barimo Mafikizolo n’abandi.

Ati “Nk’uko bisanzwe twishimiye cyane kuba muri Kigali Jazz Junction kuva mu myaka ibiri ishize, kuri iyi nshuro ariko ni umwihariko kuko tubahishiye n’agashya twabateguriye […] Umwihariko ni ukuryoherwa n’umuziki w’umwimerere wa Jazz nk’injyana ya mbere dushyigikiye.”

Muneza Claire ushinzwe Imenyekanishabikorwa muri Airtel-Tigo, yavuze ko yo yahisemo gushyigikira iki gitaramo by’umwihariko kuko bizera ko imyidagaduro ihuza abantu, bakifuza ko n’abakiliya bayo banyurwa n’ibikorwa nk’ibi nyuma yo kwihuza kw’ibigo byombi.

Yagize ati “Airtel-Tigo turi hano. Twishimiye kuba muri iki gikorwa by’umwihariko kuri iyi nshuro turi kumwe na Zahara. Dufite ishyaka ryo gushyigikira iki gikorwa kuko twizerera muri Jazz, mu myidagaduro ariko dufatanyije n’abakiliya bacu.”

Remmy Lubega ukuriye RG Consults yazanye Zahara mu Rwanda yavuze ko azaririmbana na Social Mula nubwo atabashije kwitabira ikiganiro n’itangazamakuru biturutse ku “munaniro yatewe n’ikindi gitaramo yakoze mu ijoro.”

Uretse Zahara na Social Mula, abazitabira iki gitaramo bazataramirwa na Neptunez Band izwiho ubuhanga mu gucuranga. Kwinjira ni ibihumbi icumi (10,000Rwf), ibihumbi makumyabiri muri VIP (20,000Rwf) naho ameza y’abantu umunani ni ibihumbi ijana na mirongo itandatu (160,000Rwf).

Zahara afite ubuhanga bwihariye mu kugorora ijwi
Zahara na Muneza Claire ushinzwe Imenyekanishabikorwa muri Airtel-Tigo basubiza ibibazo by'abanyamakuru
Umuyobozi ushinzwe Imenyekanishabikorwa muri Bralirwa, Patricia Garuka Mugume, yavuze ko urugendo mu mikoranire yo gutegura Kigali Jazz Junction ari rwiza
Kuri uyu wa Kane habaye ikiganiro n'itangazamakuru ku gitaramo Zahara azakorera i Kigali
Umuyobozi wa RG Consults yateguye igitaramo, Umuhanzi Zahara na Muneza Claire ushinzwe Imenyekanishabikorwa muri Airtel-Tigo bari bafite akanyamuneza

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza