Young Grace yavuze uko afata nyina ushyigikiye injyana ya Hip Hop

Yanditswe na Munyengabe Murungi Sabin
Kuya 5 Nyakanga 2018 saa 11:46
Yasuwe :
0 0

Young Grace yongeye gutorwa mu bahanzi icumi bakunzwe bahataniye irushanwa rya Primus Guma Guma Super Star, mu bamwifuriza intsinzi ku isonga haza umubyeyi we wifuza ko Hip Hop yahindura amateka uyu mwaka.

Igitaramo cya Primus Guma Guma Super Star giherutse kubera mu Mujyi wa Rubavu ku itariki ya 30 Kamena 2018. Young Grace yongeye kuririmbira imbere y’abakunzi ba muzika ye muri aka karere nyuma y’uko mu mwaka wa 2017 bitamushobokeye.

Yabwiye IGIHE ko, mu bitaramo bya Primus Guma Guma byagiye bibera hirya no hino mu Rwanda igiheruka kubera mu Mujyi wa Rubavu ari cyo yishimiye kurusha ibindi. Ati “Iwacu i Rubavu banyakiriye neza, mu bitaramo byose twakoze uyu mwaka, abafana banjye mu Mujyi wa Rubavu mbakuriye ingofero.”

Yankurije Immaculée [nyina wa Young Grace] yagaragaye mu itsinda ry’abafana bari bashishikajwe no gushyigikira uyu mukobwa ubwo yaririmbaga. Young Grace wari wambaye agakabutura gato gacikaguritse yemeza ko byamwongereye imbaraga mu buryo bukomeye.

Uyu mubyeyi kandi akunda mu buryo bukomeye injyana ya Hip Hop, by’akarusho akunda cyane umuziki wa Young Grace ndetse yifuza ko yatsinda agahabwa igikombe uyu mwaka Hip Hop y’abakobwa igahindura ibintu muri PGGSS.

Kuri Young Grace, nyina amufata nk’umufana wa mbere ukomeye wa muzika ye; ngo nubwo yabwira abafana kuzamura amaboko kugira ngo arebe abashyigikiye umuziki we bakanga hakazamura nyina gusa byaba bihagije.

Yagize ati “Mama ni umufana wanjye ukomeye cyane, ni uwa mbere ku Isi, nubwo navuga ngo amaboko hejuru ntibamanike we akamanika wenyine mba numva bose bamanitse kuko ni we muntu w’agaciro kuri njyewe kurenza abandi bose ku Isi.”

Yongeyeho ati “Iyo mubona imbere yanjye ndishima, iyo ngiye ku rubyiniro akambwira ati ‘humura mwana wanjye ngufatiye iry’uburyo’ ibyo bimpa imbaraga.”

Akenshi, nyina wa Young Grace ni we wakunze kugaragara mu kivunge cy’abafana b’uyu mukobwa ndetse yagiye aherekeza kenshi umwana we mu gihe se adakunze kubijyamo.

Young Grace yabwiye IGIHE ko umuryango we wose umushyigikira mu buryo bungana gusa nyina agaragara cyane kuko amaze kwamamara. Ati “Na Papa aranshyigikiye, ni uko wenda mutamuzi, wenda impamvu mubona cyane mama ni uko ari we umaze kuba umusitari ariko na papa na we andi inyuma.”

Nyina wa Young Grace na we yagaragaye mu bafana ashyigikiye umukobwa we

Young Grace ni umwe mu bahataniye irushanwa rya Primus Guma Guma Super Star, ajemo ku nshuro ya kane. Yaryitabiriye bwa mbere muri 2012, icyo gihe yageze mu bahanzi bane bageze mu cyiciro cya nyuma cyatoranyijwemo uwatsinze. Yaviriyemo ku munota wa nyuma aho yari ahanganye na King James, Knowless na Jay Polly.

Young Grace yemeza ko nyina aza ku isonga mu bakunda muzika ye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza