Yemi Alade na Sauti Sol bagiye kuririmbira i Kigali mu gitaramo giherekeza 2017

Yanditswe na Munyengabe Murungi Sabin
Kuya 11 Ukuboza 2017 saa 08:38
Yasuwe :
0 0

Yemi Alade, umwe mu bakobwa bafite izina rikomeye mu muziki wa Nigeria agiye gutaramira Abanyarwanda mu gitaramo giherekeza umwaka wa 2017 kizabera kuri Convention Center.

Igitaramo Yemi Alade yatumiwemo cyiswe ‘New Year Count Down’, cyateguwe na Rwanda Events. Ni ku nshuro ya kabiri kigiye kubera mu Rwanda, ubushize cyatumiwemo umuraperi wo muri Uganda Mungi Emmanuel Matovu [Mun G] waririmbiye imbere y’inyubako ya Kigali Heights; abiyubashye icyo gihe bataramiwe na Koffi Olomide muri Convention Center.

Ni ku nshuro ya mbere Yemi Alade[ubusanzwe witwa Yemi Eberechi Alade] agiye gukorera igitaramo mu Rwanda ndetse ahafite umubare munini w’abakunda ibihangano yakoze guhera mu mwaka wa 2005.

Muri iki gitaramo Yemi Alade w’imyaka 28 azafatanya n’itsinda Sauti Sol rikunzwe muri iyi minsi mu ndirimbo ‘Melanin’ ryahuriyemo na Patoranking wo muri Nigeria. Sauti Sol yo yari inaherutse kwandika ko “yiteguye igitaramo gikomeye mu Rwanda”.

Sauti Sol igizwe na Bien-Aimé Baraza , Delvin Mudigi, Polycarp Otieno na Willis Austin Chimano, ifite indirimbo zakunzwe muri Afurika nka “Live and Die in Africa”, “Nerea” , “Isabella”, “Unconditionally Bae”, “Nishike”, “Shake Yo Bam Bam” n’izindi.

Yemi Alade azaririmbana na Sauti Sol mu gitaramo gisoza umwaka wa 2017

Yemi Alade na we afite nyinshi yakoze zikamuhesha kumenyakana zirimo nka ‘Johnny’, ‘Na Gobe’ n’izindi.

Igitaramo aba bahanzi bombi bazahuriramo kizabera muri Kigali Convention Center[Village A] mu ijoro ryo ku itariki ya 31 Ukuboza 2017.

Abantu bazagura amatike mbere bazayabona ku giciro cyo hasi, mu myanya isanzwe ni amafaranga 20,000 naho muri VIP ni 40,000. Abifuza kugura amatike ubu araboneka kuri Jumia, Meze Fresh, Pilipili, Trophy’s, Choma’d no kuri Kigali Convention Center. Kwinjira bizatangira saa kumi n’ebyiri.

Yemi Alade wakunzwe bikomeye mu ndirimbo 'Johnny'
Sauti Sol, itsinda rikunzwe bikomeye muri Afurika

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza