Yasazwe n’ibyishimo ahuye na Mico wakoze indirimbo yateretesheje umugore we

Yanditswe na Dusabimana Aimable
Kuya 20 Mata 2018 saa 07:57
Yasuwe :
0 0

Akayezu Alex uri mu ngabo zamugariye ku rugamba utuye mu Karere ka Rwamagana yagaragaje ibyishimo bidasanzwe ahuye na Mico The Best, amushimira ko yakoze indirimbo yatumye abona umugore akubaka urugo.

Akayezu utuye mu Kagari ka Murehe, Umurenge wa Muyumbu mu Karere ka Rwamagana yabonanye na Mico The Best ubwo abahanzi bahatanye muri Primus Guma Guma Superstar bari bagiye mu gikorwa cyo gutanga ubwisungane mu kwivuza ku bamugariye ku rugamba n’abarokotse Jenoside yakorewe Abatutsi, kuri uyu wa Gatanu.

Yahamije ko indirimbo ‘Umutaka’ ya Mico The Best ari yo yamuhesheje umugore babana kugeza ubu, avuga ko n’umwana bibarutse bamwise "Abanezerewe" biturutse ku byishimo by’ikirenga iyi ndirimbo ibaha mu muryango wabo.

Yagize ati “Nayitereteyeho umugore wanjye nkunda, iyo ndirimbo yaramfashije, ubu tumaranye imyaka itandatu ndetse twanabyaranye umwana w‘umukobwa umaze kugira imyaka ine n’andi mezi arengaho.”

Yongeyeho ati “Ubu duhuye hari byinshi nari namubwiye, gusa mwifuriza ishya n’ihirwe. Imana izamufashe na we azagire umwana kandi hari benshi bamukunda atazi kuko natwe ntidushobora kwinjira nk’iyo yakoresheje igitaramo, bitewe n’impamvu zitandukanye nk’ubushobozi, ariko ajye amenya ko afite abafana kandi bamukunda atazi.”

Mico The Best yavuze ko yakozwe ku mutima n’ubuhamya bw’uyu mugabo by’umwihariko bikamushimisha kubona indirimbo ye yaragize uruhare mu kubaka abantu n’urugo rwabo bakaba bamufitiye ishimwe.

Yongeyeho ko mu bihe bitandukanye nk’umuhanzi ngo ajya ahura n’abantu bakunze ibyo akora b’ingeri zinyuranye kuva ku bato kugeza ku basheshe akanguhe bikamutera imbaraga zo gukomeza gukora umuziki.

Yagize ati “Ni ikintu cyankoze ku mutima cyane, natangajwe n’uburyo yambwiye ko afite umwana n’umugore akesha ubuhanzi bwanjye. Nabanje kutabyumva neza ayo magambo akiyambwira ariko ansobanurira ko yatereteye ku ndirimbo yanjye. Twahanye nimero hari ibyo wenda azambwira n’ibyo nanjye nzamubwira ariko namwishimiye cyane.”

Indirimbo “Umutaka” yubakiye urugo umufana wa Mico The Best, yayisohoye mu 2012. Iyi izwiho kuba yaragaruye uyu muhanzi mu ruhando rw’abagezweho, agakomereza ku zo yakoze mu myaka ya vuba nyuma y’iyitwa “Umuzungu” yabanje gutuma amenyekana cyane agikomeye ku izina rye “Mico Prosper.”

Mico The Best uri mu batoranyijwe muri Primus Guma Guma Superstar ya munani ahatanye n’abahanzi batandukanye barimo Jay C, Bruce Melodie, Queen Cha, Khalfan, Active, Christopher, Just Family, Young Grace na Uncle Austin.

Akayezu Alex yagaragaje ibyishimo ahuye na Mico The Best wakoze indirimbo yifashishije atereta umugore bafitanye umwana w'imyaka ine

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza