Kwamamaza

Yaririmbye agahinda ke akirwaye amavunja mu biganza

Yanditswe kuya 28-09-2016 saa 15:24' na IGIHE


Umuhanzi Nizeyimana Didier [Muchoma] yakoze indirimbo ikubiyemo agahinda n’umubabaro utazibagirana yanyuzemo kuva akiri mayibobo, ubuzima bwo kurwara amavunja n’ibibazo by’urusobe yabayemo kugeza ageze muri Amerika.

Muchoma w’imyaka 27 y’amavuko, yavutse ku itariki ya 28 Ugushyingo 1988. Iwabo ni mu Karere ka Rubavu ahitwa i Rwerere, avuga ko ubuzima yabayemo kuva akivuka "ari nk’inzira y’umusaraba wamugoye cyane".

Ati “Nabayeho ubuzima bubi cyane, iwacu turi abana barindwi, mfite mama gusa kuko Data yadutaye nkiri muto. Byagoye mama cyane kuturera, ni nacyo cyatumye mba mayibobo.”

Ati “Narwaye amavunja mu ntoki no mu birenge nkajya nanirwa kugenda, mba umukozi mu rugo nta mafaranga mpembwa ahubwo ari ukugirango mbone uko nabaho. Ni mama wantanze kugira ngo inzara ntizatwicire mu nzu twese, kuba umukozi birandambira mpitamo kujya ku muhanda.”

Ibibazo yita ‘isomo ry’ubuzima’ yanyuzemo mu buto bwe yabikozemo indirimbo yahuriyemo na Mico The Best “Kugira ngo byigishe abandi bashobora kuba baragize ukwiheba gukomeye no gucika intege”.

Ati “Nk’umuhanzi nahisemo ko ubwo buhamya nabukoramo indirimbo mfatanyije na Mico The Best kugirango ubwo butumwa burimo bugere ku bandi. Indirimbo yararangiye ariko ubu turi muri gahunda yo guhitamo neza itariki twayisohorera.”

Yavuze agahinda abinyujije mu nganzo

Uyu muhanzi avuga ko yatangiye umuziki mu mwaka wa 2008, icyo gihe yari mayibobo muri Kenya. Yabaye mayibobo iwabo i Rubavu, abivamo by’igihe gito ajya gukora akazi ko mu rugo i Huye naho ntiyahamara kabiri asubira ku muhanda kubera uburyo yatotezwaga na nyirabuja.

Muchoma yaje kwerekeza muri Uganda aho yavuye ajya gukomereza ubuzima bwo kuba mayibobo muri Kenya. Kuva agica akenge kugeza agize amahirwe yo kujyanwa muri Amerika, ngo nta cyiza yabonaga uretse ibibabaza umubiri we gusa ngo yabyigoboye abikesha ‘kwihangana’.

Yavuze ko yaririmbye ibyo yanyuzemo nk’umuyoboro yifashishije kugira ngo ubuhamya bwe bwigishe n’abandi bashobora gucika intege mu buzima.

Yigishijwe n’imibabaro…

Ati “Ubuzima bugoye nanyuzemo ni bwo butuma niyita umugabo kuko bwanyigishije byinshi nko kudacika intege kuko nta n’impamvu yo kwiheba ukiriho. Iyo mbyutse ngatekereza imyaka icyenda ihise bituma ngira imbaraga mu byo nkora byose ngatinya ko nazongera kwisanga mu bihe byahise. Ni yo mpamvu ntazigera ndeka kuvuga ubuhamya bwanjye kuko nta n’isoni bijya bintera iyo mbivuga.”

Yongeraho ati “Ikindi mba nifuza ko na wa wundi nasize muri ubwo buzima bubi na we yihe icyizere cy’ejo hazaza. Yego nanjye ndacyafite urugendo rurerure kugirango mbe uwo nifuza kuba we ariko kandi nshimira Imana ku ntambwe imaze kungezaho.”

Muchoma amaze gukora indirimbo nyinshi mu majwi n’amashusho, mu gace atuyemo muri Austin,Texas ari mu bahanzi batumiwe kuzaririmba mu birori byo kwizihiza ubwigenge bwa Nigeria kuwa 1 Ukwakira 2016. Ni igitaramo cyatumiwemo Iyanya wigeze gukorana indirimbo na Urban Boyz.

Ati “Buriya hari cyizere bambonyemo, ni imwe mu ntambwe ikomeye nteye kuko guhurira na Iyanya mu gitaramo birakomeye kuri njyewe, hari ibyo nzamwigiraho.”

Muchoma aheruka gusohora indi ndirimbo yise ’Mtoto’


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Wednesday 7 Ukuboza 2016
Copyright © 2009 -2014 - IGIHE Ltd - All Rights Reserved