Uko Bmjizzo yakinnye ruhago i Burayi bikanga, akinjira mu byo gukora amashusho y’indirimbo

Yanditswe na Nsengiyumva Emmy
Kuya 20 Gashyantare 2021 saa 05:04
Yasuwe :
0 0

Julien Bmjizzo ni umwe mu bagezweho bakora amashusho y’indirimbo z’abahanzi by’umwihariko abakorera umuziki ku mugabane w’u Burayi, nyamara yigeze kuba i Burayi ari umukinnyi wa ruhago, ntiyahirwa.

Mu 2010, Julien Bmjizzo yagiye ku mugabane w’u Burayi asanzeyo umuryango we wari usanzwe utuye.

Icyo gihe uyu musore uvuga ko yakundaga ruhago akaba n’umuhanga mu kuyiconga. Yari amaze gutoranywa mu bakinnyi bato ba APR FC ariko agenda atayikiniye.

Kujya i Burayi ngo yumvaga ari inzozi zibaye impamo. Julien wari ufite imyaka 16 yagiye yizeye guhita abona ikipe yo gukinamo ku mugabane w’u Burayi kuko zari inzozi ze. Akigerayo byahise bimubana ikibazo, yasanze umubyeyi we adakunda ibintu byo gukina umupira, atangira kubimubuza kuko yatekerezaga ko byatuma atakaza umwanya wo kwiga.

Ati “Mama wanjye ni umuntu w’umunyamasengesho, hari ukuntu atakundaga ibyo gukina umupira. Kenshi yarambuzaga kuko yari afite impungenge ko nshobora kureka ishuri.”

Kutumvikana n’umubyeyi we ku bijyanye no gukina umupira w’amaguru, byatumye atangira kujyayo yiyibye, agakora urugendo rutari ruto n’amaguru agana aho yarabutswe ikibuga.

Impano ye yatumye umutoza amushima atangira kujya amufasha iby’ingenzi bituma akina.

Yakinnye mu makipe atandukanye y’uturere, uko yagendaga azamuka niko yagendaga abura umwanya wo kubanza mu kibuga bituma atangira kugenda yanga umupira.

Ati “Kugira ngo nkine ndi umunyafurika byari kunsaba kuba mbarusha bose kandi cyane, bitewe nuko abo twakinanaga bose twasaga nk’abanganya byari bigoye ko naba nkibonye umwanya.”

Icyo gihe Julien wari watangiye kwihugura ibyo gufata amashusho y’indirimbo kandi akaba atari ashyigikiwe n’umuryango we ku bijyanye no gukina umupira, yahisemo kuwureka burundu.

Akireka umupira yihebeye gutunganya amashusho y’indirimbo

Uyu musore wari ufite inyota yo kumenya gukora amashusho y’indirimbo, yahereye ku ndirimbo ya mukuru we aba ari nayo yigiraho.

Uko yagendaga afata amashusho y’indirimbo zimwe na zimwe z’abahanzi bakizamuka akanayatunganya, niko yiyunguraga ubumenyi ku byo yigaga yifashishije ikoranabuhanga.

Mu 2014 nibwo yafashe icyemezo cyo kwinjira mu byo gufata no gutunganya amashusho y’indirimbo n’ibindi birori. Mu 2016 uyu musore yaganishije ubuzima bwe mu muziki akorera abahanzi indirimbo.

Mu 2016-2017 ubwo yari amaze gufata no gutunganya amashusho y’indirimbo ‘Only you’ ya Ben Kayiranga na The Ben, avuga ko aribwo yatangiye kwiyumva nk’umunyamwuga mu gukora amashusho y’indirimbo z’abahanzi.

Amafaranga yinjizaga mu bijyanye no gufata no gutunganya amashusho y’ibirori bitandukanye n’indirimbo z’abahanzi, yatumye umubyeyi we abona ko uyu ari umurimo watunga umwana we amuha rugari.

Kwita ku mirimo yo gufata no gutunganya amashusho y’ibirori binyuranye n’indirimbo z’abahanzi, byatumye ahagarika amasomo ye ava mu ishuri ageze mu wa kabiri wa kaminuza.

Muri iyi minsi uyu musore ari gukora amashusho ya zimwe mu ndirimbo zigezweho nka Ndabazi, Warokoso na Madede za Marina, Aba People ya Kevin Mbanda, Katerina ya Bruce Melodie, Bombe ya DJ Lenzo&Phil Peter n’izindi.

Ikiganiro na Julien Bmjizzo

Reba zimwe mu ndirimbo zakozwe na Julien Bmjizzo

Julien Bmjizzo watangiye aconga ruhago asigaye ari mu bagezweho mu gutunganya amashusho y'indirimbo
Julien Bmjizzo nubwo ntaho yabyize, amaze gukorera abahanzi bakomeye indirimbo
Uyu musore ni umuhanga mu gutunganya amashusho y'indirimbo by'umwihariko ku bahanzi batuye i Burayi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .