Weasel yashyizwe mu majwi mu byatumye Teta Sandra yirukanwa aho yakoraga i Kampala

Yanditswe na Nsengiyumva Emmy
Kuya 23 Nzeri 2019 saa 09:54
Yasuwe :
0 0

Biravugwa ko umunyamideli akaba umushabitsi Miss Teta Sandra yirukanywe ku kazi yakoraga muri Uganda kubera umubano afitanye n’umuhanzi Weasel wo mu itsinda rya Good Life.

Muri 2018 nibwo Teta Sandra yabonye akazi ahitwa Hideout Lounge, akabari kari mu mujyi wa Kampala. Yari amaze umwaka urenga ahategura ibitaramo binyuranye, by’umwihariko yamenyekanye mu cyabaga buri wa gatatu yari yarise “Wednesday Boss Lady”.

Ibi bitaramo yari amaze igihe abikorera muri aka kabari ari naho yahereye kuva yagera i Kampala.

Amakuru mashya avugwa kuri uyu mukobwa ni uko mu mpera z’icyumweru turangije uyu mukobwa yamenyeshejwe ko atemerewe kongera kuhakorera.

Ubuyobozi bwa Hideout bwabwiye IGIHE ko nta kindi bapfuye na Teta usibye kuba asigaye afite imyitwarire itajyanye n’ibyo bamukeneyeho.

Aha ngo harimo kuba asigaye akundana na Weasel kandi abakiriya b’aka kabari batinya cyane uyu muhanzi uzwiho kugira amahane akomeye.

Umwe mu bayobozi b’aka kabari waduhaye amakuru ati” Urumva iyo umukobwa ategura ibitaramo kuriya aba ahura n’abakiriya bacu, kenshi bakifotozanya bagasangira n’ibindi binyuranye. Teta kuva yajya mu rukundo na Weasel bisa n’ibyasubiye irudubi.”

Yongeyeho ko abakiriya baka kabari bari basigaye batinya kuvugisha Teta igihe yabaga yateguye igitaramo kuko bikangaga ko baramutse bamuvugishije bagirana ibibazo na Weasel umukunzi we uzwiho kugira amahane.

Teta yemereye IGIHE ko koko yatandukanye n’aka kabari yakoreyemo kuva yagera i Kampala, icyakora ahakana ibyo bamushinjaga byo kuba umukunzi we agira amahane.

Yavuze ko ibyo ari amagambo bivugira cyane ko nta rundi rwitwazo babona bamuvugaho mu gihe batandukanye.

Yagize ati” Njye njya gusinya nabo amasezerano ntabwo bambujije kugira umukunzi, yewe nta nubwo bigeze bantegeka uwo nzakundana na we cyangwa ngo bambuze kugira uwo dukundana. Barabeshya urwo ni urwitwazo. Ukuri guhari ni uko hari hasigaye hari amatiku ku buryo byari bigoye gukomeza gukorera muri aka kabari.”

Teta yamaganye ibyo kuba abakiriya bamutinyaga bikanga ko bamerana nabi n’umukunzi we Weasel.

Ati” Maze igihe kinini nkundana na Weasel, yahasohokeraga kenshi ariko nta muntu bari bakavuganye nabi. Ahubwo se ko yahageraga kenshi bwije mu masaha y’igicuku yari kuba avugana nabo nabi gute? Barabeshya urwo ni urwitwazo.”

Uyu mukobwa yatangaje ko we yamaze gufata icyemezo cyo gukura “Wednesday Boss Lady” muri aka kabari ka Hideout Lounge mu gihe ategereje kumenya ahandi agiye gukorera.

Teta amaze igihe mu rukundo na Weasel ndetse no mu minsi ishize Weasel yifashishije Teta mu mashusho y’indirimbo ye nshya yise “Guwooma”.

Teta Sandra yatangaje ko yasubitse gukorera ibitaramo mu kabari ka Hideout Lounge
Teta na Weasel bakunze kugaragara kenshi bari kumwe
Teta Sandra amaze igihe mu rukundo na Weasel

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza