Video: Teta Diana yavuze birambuye ibyerekeye ubuzima bwe

Yanditswe na Dusabimana Aimable
Kuya 19 Gicurasi 2017 saa 12:11
Yasuwe :
2 0

Teta Diana uherutse gutungurana akaririmbira i Kigali nyuma y’umwaka abarizwa i Burayi, yavuze birambuye ku buzima bwe nk’umuhanzi, akomoza kuri byinshi bitavuzwe mu byo yanyuzemo abyiruka n’uko abayeho muri iki gihe.

Teta Diana avuga ko mu buzima bwe umuntu yishimira ndetse akanamwubaha ari Madamu Jeannette Kagame wigeze no kumuha igihembo muri 2015, nk’umwe mu rubyiruko rwageze ku bikorwa by’indashyikirwa (CYRWA: Celebrating Young Rwandan Achievers), bigahindura imibereho yarwo n’iy’umuryango nyarwanda.

Mu kiganiro kirambuye IGIHE yagiranye n’uyu muhanzi wari umaze igihe aba ku Mugabane w’u Burayi aho yari yaragiye gutunganyiriza album yitegura gusohora, yagarutse ku mibereho nk’umuhanzi anakomoza ku bitangaje byagiye bimubaho mu buzima bwe.

Teta Diana avuga ko ikintu adashobora gutakazaho umwanya n’amafaranga mu buzima bwe ari ’ukwihindura uko ataremwe’ cyangwa kwisiga amavuta runaka ahindura imimerere y’uruhu rwe, ibyo ab’iki gihe bakunze kwita ’kwisiga mukorogo’.

Yagize ati "Ikintu ntatakazaho amafaranga ni ukwihindura uko ntari, nko kwitukuza wenda nkigira mwiza cyane birenze kwisiga no gusa neza mu buryo karemano uko nsa."

Muri iki kiganiro uyu muhanzi yagarutse ku bihe byiza yumva yagize mu buzima, akomoza ku mpano yifuza ariko adafite yo gusimbuka urukiramende ariko nubwo bimeze gutyo ahamya ko nta kintu yifuza guhindura mu buzima bwe kuko ibyiza n’ibibi yanyuzemo ari byo byatumye aba uwo ari we magingo aya.

Mu kuvuga ku byo yakoze mu buto atazibagirwa, Teta agira ati "Ntabwo ndi bwibuke ngo umwaka wari uyu ariko ndumva nari mfite nk’imyaka umunani i Butare. Iwacu bazanye urwagwa rw’ubuki noneho ndarunywa, ibyishimo birandenga, nariye ikiro cy’umunyu muri avoka. Ni ibintu ntashobora kwibagirwa."

Teta Diana aritegura gusohora album yise ’Iwanyu’, izasohokaho indirimbo zirimo izo yasohoye mbere ndetse n’izo yakoreye mu Burayi mu gihe yamazeyo.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244