Kwamamaza

Video: Inzozi za Ntagara Djamal utunzwe n’impano yo gushushanya

Yanditswe kuya 15-09-2016 saa 16:55' na Munyengabe Murungi Sabin


Ku myaka 26 y’amavuko, Ntagara Djamal abeshwejweho n’umwuga wo gushushanya n’ubundi bugeni akora nk’akazi ka buri munsi, afite inzozi uruhuri yifuza kuzakabya mu myaka iri imbere.

Ntagara, ni umushushanyi wabigize umwuga ariko utarabyize mu ishuri nk’abandi. Yatangiye kubikora akiri umwana muto ubwo yigaga mu mashuri abanza, ababyeyi ntibumvaga iby’impano ye kuko bamuhozaga ku nkeke bamubuza kuzana amarangi mu rugo kuko yarwanduzaga ashushanya.

Ni umwuga yiyigishije, ni impano yivumbuyemo kuva mu bwana arayikurana kugeza mu mashuri yisumbuye. Ntagara uvuka i Remera mu Mujyi wa Kigali yavuye mu ishuri ageze mu mwaka wa Gatanu, yigaga ubumenyamuntu akabifatanya no gushushanya kugeza ubwo iyi mpano yamutwaye roho acikiriza amashuri.

Ati “Nashushanyaga nkiri umwana, wasangaga mu rugo nahanduje kubera amarangi nazanaga ab’iwacu bikababaza. Narabyiyigishije, sinabyize mu ishuri…”

Amaze imyaka itatu mu bugeni…

Ntagara avuga ko amaze imyaka isaga gato itatu akora ubugeni nk’umwuga gusa akemeza ko yabitangiye akiri umwana muto. Ni ubumenyi yishatsemo ndetse kugeza ubu ibyo ashushanya ngo ni ukuvumbura gusa adakopeye ku bandi.

Ati “Natangiye gukora ubugeni nkiri umwana ariko bwari ku rwego rwo hasi, nabitangiye nk’umwuga mu mwaka wa 2013 […] Natangiye nkora ibinigi n’ibikomo by’abagore, mu myaka itatu isaga mbimazemo mfite ubumenyi bwo gushushanya ikintu cyose uko ngishaka.”

Atunzwe no gushushanya

Ntagara Djamal wibana mu nzu akodesha mu Rugando ku Kimihurura muri Uburanga Arts Studio ari naho akorera, avuga ko nta kandi kazi agira ku ruhande uretse gushushanya.

Ibyo akenera byose nk’umusore wibeshejeho i Kigali abikura mu mafaranga abyaza ubugeni, akazi yubaha cyane ndetse abonamo ahazaza h’ubuzima bwe.

Ati “Ni byo bintunze, ni byo bimbeshejeho, binyishyurira inzu, ikintu cyose nkenera ni byo mbikesha. Ikindi gikomeye ni uko bisaba gukora cyane, kuvumbura no guhimba ku buryo ikintu cyose ukoze kiba gifite umwimerere utandukanye n’ibindi bihangano.”

Yongeraho ati “Imibereho yanjye yarahindutse, kugeza izi saha simbura amafaranga kuri konti, mbasha kwikemurira ibibazo no kwiteza imbere ku buryo uko iminsi ishira ngenda mbona ko nazamutse mva ku rwego rumwe nkagera ku rundi.”

Inzozi z’umunyabugeni Ntagara

Ati “Icyerekezo mfite ni uko nifuza gukora ubuhanzi bwanjye ku rugero ruri hejuru ku buryo nshobora gukora igihangano cyajya mu nzu ndangamurage y’u Rwanda nk’igihangano cyanjye.”

Ntagara Djamal aba ashushanya, amanywa n'ijoro

Yongeraho ati “Mu bintu bikomeye numva nnifuza kugeraho ni uko nyuma y’imyaka itarenze nk’itanu kuba mfite ikusanyirizo ry’ibishushanyo biri ku rwego mpuzamahanga nkayishyira mu Mujyi wa Kigali.”

Ntateganya gusubukura amasomo mu by’ubumenyamuntu[Sciences Humaines] ahubwo ngo igihe azayakomereza yifuza kwihugura mu byo gushushanya akazavamo umunyabugeni uri ku rwego mpuzamahanga.

Ntabwo nagize amahirwe yo kwiga, si uko nabuze amafaranga y’ishuri, ni njye waryivanyemo […] Navuga ko navuye mu ishuri kubera gushushanya, ni ibintu nakundaga cyane bikantwara umwanya munini kugeza ubwo navuye mu ishuri.

Ni umunyamwuga mu bugeni akora
Abakiri bato abatoza uyu mwuga
Bimwe mu bihangano bya Ntagara Djamal

Camera&Editing: Kazungu Armand


Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 1 Ukwakira 2016
Copyright © 2009 -2014 - IGIHE Ltd - All Rights Reserved