Video: Ibisobanuro ku buriganya buvugwa mu isoko rya Miss Rwanda 2017

Yanditswe na Munyengabe Murungi Sabin
Kuya 10 Nzeri 2016 saa 10:53
Yasuwe : XX
0

Isoko ryo gutegura amatora ya Nyampinga w’u Rwanda 2017 riherutse gupiganirwa ryavuzwemo akarengane no gutangaza uwatsinze bitanyuze mu mucyo nk’uko byagaragajwe n’ubujurire bwa Rwanda Inspiration Back Up yari isanzwe itegura iri rushanwa.

Umunyamabanga Nshingwabikorwa w’Inteko Nyarwanda y’Ururimi n’Umuco[ari nayo yatanze isoko], Dr Vuningoma James yavuze ko “nta karengane kabayeho, ndetse ko amategeko yakurikijwe isoko ritsindirwa binyuze mu mucyo”.

Minisiteri y’Umuco na Siporo ibinyujije mu Nteko Nyarwanda y’Ururimi n’Umuco [RALC] iherutse gutanga isoko ryo gushakisha rwiyemezamirimo ubishoboye uzategura itorwa rya Nyampinga wa 2017.

Isoko ryo gutegura irushanwa rya Nyampinga w’u Rwanda muri 2017 ryahataniwe n’ibigo bine, naho mu cyiciro cya nyuma hemerwa bibiri icyitwa General Logistic Services na Rwanda Inspiration Back Up.

General Logistic Services yatangajwe ko yatsinze gusa ubuyobozi bwa Rwanda Inspiration Back Up butanga ubujurire mu Kigo cy’Igihugu gishinzwe imitangire y’amasoko ya Leta (RPPA). Yagaragaje ko yarenganyijwe bikomeye kuko yari yatanze ingengo y’imari[budget] iri hejuru mu gihe uwahawe isoko yatanze igitabo kirimo amafaranga make.

Ishimwe Dieudonne[Prince Kid] uyobora Rwanda Inspiration Back Up yajuriye avuga ko atumva impamvu yimwe isoko aryozwa ingengo y’imari nini yatanze mu gihe utsinze ari we wishakira abaterankunga kugira ngo abone amafaranga yo gutegura Miss Rwanda.

Umunyamabanga Nshingwabikorwa w’Inteko Nyarwanda y’Ururimi n’Umuco[ari nayo yatanze isoko], Dr Vuningoma James yasobanuye byeruye ko mu gutanga isoko rya Miss Rwanda nta karengane kabayeho ahubwo ko ‘uwatanze ubujurire yumvaga ko ari we ugomba kongera gutsinda nyamara yirengagiza nkana’.

Yagize ati “Ndongera mbisubiremo amategeko yarakurikijwe, isoko ryaratanzwe, abatsinze bavayo bemye hanyuma umwe wari usanzwe ubitegura abona ko ari we wari ukwiye kubitsindira.”

Dr. Vuningoma James yavuze ko Miss Rwanda yabaye ihagaze mu gihe bategereje kumva umwanzuro w’Ikigo cy’Igihugu gishinzwe imitangire y’amasoko ya Leta (RPPA).

Ati “Iyo dukurikije amategeko ariko hari umunyarwanda wumva ko yahohotewe ni byiza ko yitotomba, ni byiza ko akurikiza amategeko akajurira, iyo rero ajuriye turabihagarika kugira ngo tubanze turebe urwego rwajuririwe icyo rubivugaho.”

Abajijwe niba koko nta karengane Rwanda Inspiration Back Up yakorewe yasubije ati “Ntabwo yarenganye bitewe n’amategeko, namwe ubwanyu mubishatse mwaza tukabibereka.”

Umunyamabanga Nshingwabikorwa w’Inteko Nyarwanda y’Ururimi n’Umuco, Dr Vuningoma James. IFOTO/Mahoro Luqman

“Kuki mwibwira ko harimo akarengane, muzaze tubibereke, ibyo mwibwira ko birimo akarengane mubirebe maze muzatubwirire Abanyarwanda ko nta karengane ko amategeko yubahirijwe. N’uwo uvuga ko yarenganye yaraje turabimwereka…”

Ku mpungenge z’uko itorwa rya Miss Rwanda rishobora kuzazamo ibibazo no kuba ritinze cyane, Dr. Vuningoma James yavuze ko hakiri igihe gihagije cyo kwitegura bityo ko nta kizabuza irushanwa kuba ku matariki yagenwe.

Yagize ati “Ntabwo bitinda, dufite igihe gihagihe, ntimugire impungenge muzabona indi Miss Rwanda.”


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE