Uwangiwe kwitabira Miss World kubera ko afite umwana agiye kwitabaza inkiko

Yanditswe na Uwiduhaye Theos
Kuya 3 Ukuboza 2019 saa 04:06
Yasuwe :
0 0

Umunya-Ukraine witwa Veronika Didusenko wabaye nyampinga w’iki gihugu akamburwa ikamba nyuma y’amasaha make, yavuze ko agiye kugana inkiko kuko yabangamiwe bikomeye.

Uyu mutegarugori w’imyaka 24 yambitswe ikamba rya Miss Ukraine mu birori byabaye mu 2018 ariko ahita aryamburwa nyuma y’uko byari bimaze kumenyekana ko afite umwana w’imyaka ine, icyo gihe yasimbujwe uwitwa Leonila Huz aba ari nawe witabira irushanwa rya Miss World uwo mwaka.

Abari bateguye irushanwa bavugaga ko bakurikiza amategeko ya Miss World uyu mukobwa yagombaga kwitabira kandi akaba atemerera umuntu ufite umwana cyangwa se watandukanye n’umugabo guhatanira iri kamba.

Mu kiganiro yagiranye na Radio 1 Newsbeat yagize ati “Nshaka kubahindura no kubakebura. Nshaka ko amategeko ya Miss World agendana n’igihe. Nshaka gutuma biyumva mu buzima bw’iki gihe bakanatekereza ku buzima bw’ukuri bw’abari.”

Veronika ngo yagiye muri Miss Ukraine ari ukugira ngo arebe ko yagira abantu bake bamumenya abe yabona ubufasha ku mushinga w’ubugiraneza afite, ariko yaje gutungurwa n’uko ikamba yegukanye yamaranye iminsi ine gusa agahita aryamburwa.

Yavuze ko yababaye cyane icyo gihe, ati “Numvise meze nabi atari ukubera inkuru yanjye ahubwo ariko ari n’inkuru y’ibihumbi by’abagore mu bice bitandukanye by’Isi baba bashaka kwitabira amarushanwa nk’aya ariko bakaba batemerewe kwitabira kubera ko ari ababyeyi.”

Ngo yabonye itegeko ku mpapuro zo kwiyandikisha ribuza abafite abana kujya mu irushanwa ariko araryirengagiza kuko yibazaga ukuntu abagore babuzwa kwitabira akumva nta shingiro bifite.

Ati “Kuba mfite umwana ntacyo byahungabanya ku mikorere yanjye ku ntaba umunyamwuga cyangwa se ngo umurika imideli wageze kuri byinshi. Rero ayo mategeko ntabwo yumvikana kuri njye.”

Mu 2018, Julia Morley uhagarariye irushanwa rya Miss World, mu kiganiro yagiranye na Good Morning Britain yabajijwe ku mategeko y’iri rushanwa mu gusubiza ati “ Iyo ugerageza kugeza sosiyete yawe ku Isi yose bakayemera, uba ugomba kureba kuri buri wese kandi baba bagomba gutora bakurikijwe ibintu byemewe.”

“Icyo niyumvamo cyangwa se icyo u Burayi bwiyumvamo ni ikintu kimwe, icyo abandi ku Isi yose basigaye baba biyumvamo bishobora guterwa n’amadini atandukanye yabo n’ibindi bintu byinshi […] niba ubyumva neza ntabwo dukurikiza ibyiyumviro byacu gusa, icyo turi kugerageza gukora ni ukuringaniza ibintu.”

Mu 2014, umuyobozi wa Miss England Angie Beasley yavuze ko bikomeye k’uwaba yatorewe kuba nyampinga afite umwana, gutandukanya inshingano ze nka Miss n’izo kuba umubyeyi.

Ati “Byose sibyo ku mwana no ku muryango kujyana nyina w’umwana kure ye mu gihe cy’umwaka akora ibikorwa bitandukanye, azenguruka Isi mu bikorwa byo gufasha.”

Veronika we avuga ko ku muhungu we nta kibazo kuko n’ubundi basanzwe batemberana isi ubwo uyu mugore aba ari mu bikorwa bye bitandukanye bijyanye n’ibyo akora.

Ati “Yabonye ibihugu byinshi mu myaka ye. Ntekereza ko akerebutse kurusha abandi bana. Ibyo abo muri Miss World bagaragaza bavuga ko bahangayishijwe n’imibereho y’abana bacu, ni amahomvu kuri njye.”

Veronika avuga ko agiye kugana inkiko ku buryo Miss World izakuraho iri tegeko bidatinze.

Ati “Nshaka ko Miss World ihindura ayo mategeko kugira ngo iri rushanwa ry’ubwiza ribe ryakwitabirwa na buri wese. Kubera ko irushanwa ridaheza rizatuma hatabaho ubusumbane, habeho amahirwe ku bahatana ndetse ateze imbere abagore.”

Yatanze urugero rw’inzu z’imideli zikoresha abagore batwite, abafite ibiro by’umurengera n’abamurika imideli b’imyaka iyo ariyo yose mu bikobwa bitandukanye.

Arangije ati “N’amarushanwa akwiriye kugendera muri uyu mujyo agafata abategarugori bose kimwe.”

Muri Nzeri 2018 nibwo Veronika Didusenko yabaye Nyampinga wa Ukraine, aho yari kuba yemerewe kujya mu marushanwa mpuzamahanga arimo na Miss World. Uretse uko agaragara, akanama nkemurampaka kari kanyuzwe n’umushinga we wo gufasha yise ‘Young Einsteins Ukraine’ ugamije gufasha abana b’imfubyi bafite ubuhanga mu mibare n’ubundi bumenyi rusange.

Veronika Didusenko afite umwana umwe w’umuhungu witwa Alexander, yabyaranye na Gennadiy Kurochka.

Ubwo Veronika yambikwaga ikamba akaryamburwa hashize iminsi mike
Veronika n'umuhungu we watumye yamburwa ikamba rya Miss Ukraine 2018 akanangirwa kwitabira Miss World uyu mwaka

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza