Urwibutso Chameleone afite ku buzima bukomeye yabayemo i Kigali

Yanditswe na Muvunyi Arsène
Kuya 5 Nyakanga 2019 saa 09:27
Yasuwe :
0 0

Umuhanzi uri mu bakomeye muri Uganda, Jose Chameleone, yibutse ibihe yanyuzemo akirwana n’ubuzima bw’i Kigali mu Rwanda.

Joseph Mayanja wiyise Dr Jose Chameleone ni umwe mu bahanzi bakunzwe kandi bubashywe muri Uganda, mu Karere ka Afurika y’Uburasirazuba na Afurika muri rusange.

Urahando rwa muzika amazemo imyaka ikabakaba 20 rwaramuhiriye akuramo imitungo itubutse kugera n’aho aguze inzu muri Leta Zunze Ubumwe z’Amerika.

N’ubwo abaririrwa mu bahanzi bakize muri Afurika, uyu mugabo yahoze mu buzima bubi nyuma Imana imutunga inkoni yicarana n’abakomeye abikesha ijwi rye.

Ubu yatangiye urugendo rwo kuzahatana mu matora y’umuyobozi w’Umujyi wa Kampala ateganyijwe kuba mu 2021.

Mu kugaragaza ko yahoze mu cyiciro cy’abaciriritse, Chameleone yashyize ifoto kuri Instagram yafatiwe i Kigali mu gace ka Kacyiru mu 1998.

Agaragara yambaye ingofero y’ubudodo y’umukara, ikote ry’uruhu ry’umukara n’ipantalo y’umutuku akandagije ikirenge kimwe mu ntebe yegamirwa yari yicayemo, imbere ye hari umwana uri kumuha fanta ya orange.

Yavuze ko icyo gihe yasengaga akanigirira icyizere cyamwumvishaga ko umunsi umwe izuba rizamurasira, ubuzima bugahinduka.

Abazi Chameleone aba mu Rwanda ngo icyo gihe mu 1998 yari umukanishi w’imodoka muri Kacyiru ahazwi nko kuri Minisiteri, naho mu ijoro yajyaga gucuranga mu kabyiniro ka Cadillac kabicaga bigacika icyo gihe.

Iby’umuziki yari ataribyinjiramo nk’umunyamwuga. Mu 2000 nibwo yashyize hanze indirimbo ye ya mbere yise Mbegaya akomereza kuri Mambo Bado, Mama Mia, Njo Karibu n’izindi zatumye amenyekana cyane mu Karere.

Nyuma yo kuva mu Rwanda, Chameleone yakoze indirimbo yise Angelina iri mu rurimi rw’ikinyarwanda bishimangira ko yahabaye.

Chameleone ubwo yari agituye mu Rwanda ari umukanishi
Chameleone ubu ari mu bahanzi bakunzwe muri Uganda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza