Urukiko rwisumbuye rwa Nyarugenge rwashimangiye ko Bushali n’abo bareganwa bakomeza kuburana bafunzwe

Yanditswe na Nsengiyumva Emmy
Kuya 28 Ugushyingo 2019 saa 01:45
Yasuwe :
0 0

Urukiko rwisumbuye rwa Nyarugenge rwashimangiye ko Hagenimana Jean Paul [Bushali] na Nizeyimana Slum [Slum Drip] bazwi mu njyana ya Kinyatrap ndetse na Uwizeye Carine bakurikiranyweho icyaha cyo gukoresha ibiyobyabwenge bazakomeza kuburana bafunze.

Ni nyuma y’uko urukiko rw’ibanze rwari rwategetse ko bafungwa iminsi 30 y’agateganyo mu isomwa ry’urubanza ryabaye tariki 4 Ugushyingo 2019.

Nyuma yo kutanyurwa n’imyanzuro y’Urukiko rwibanze rwa Nyarugenge Bushali nabo bareganwa bahisemo kujurira Urukiko rwisumbuye rwa Nyarugenge, ku wa Mbere tariki 25 Ugushyingo 2019 nibwo baburanye ubujurire.

Ku wa Gatatu tariki 27 Ugushyingo 2019, Urukiko rwisumbuye rwa Nyarugenge rwongeye gushimangira ko Bushali n’abo bareganwa bakomeza gufungwa by’agateganyo mu gihe bategereje kuburana mu mizi.

Bushali na bagenzi be bakaba bafungiwe muri Gereza ya Nyarugenge iri i Mageragere mu gihe ubushinjacyaha bugikusanya ibimenyetso bizifashishwa ubwo bazaba baburana mu mizi mu gihe kiri imbere.

Bushali ni umwe baraperi bari bameze neza, yatawe muri yombi tariki 18 Ukwakira 2019 ubwo yari akurikiranweho icyaha cyo gukoresha ibiyobyabwenge afatanwa n’abandi batatu barimo Slum Drip baririmbana ndetse n’abakobwa babiri.

Umwe mu bakobwa babiri bafatanywe, witwa Uwase Nadia yahise arekurwa nyuma yuko ubushinjacyaha bubuze ibimenyetso byo gukoresha ibiyobyabwenge mu mubiri we.

Bushali uri mu bahanzi bari bagezweho yatangiye umuziki mu mpera za 2013. Yafashwe yari aherutse kumurika album ya kabiri yise ‘Ku gasima’ yagiye hanze nyuma y’iya mbere yari yasohoye muri Gashyantare mu 2018 yitwa ‘Nyiramubande’.

Izina rya Bushali The Trigger riherutse kuzamurwa cyane n’indirimbo yise ‘Nituebue’ yahuriyemo na B-Threy n’uwitwa Slum Drip. Nyuma yo kugera i Mageragere hasohotse indirimbo ya Bushali yise “Niyibizi” yasohokanye n’amashusho yayo.

Bushali n'abo bareganwa ubwo baburanaga ifungwa n'ifungurwa mu rukiko rw'ibanze rwa Nyarugenge

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza