Urukiko rwahagaritse ikirego cya Mobeto wasabaga indezo Diamond

Yanditswe na Munyengabe Murungi Sabin
Kuya 15 Gashyantare 2018 saa 05:48
Yasuwe :
0 0

Diamond Platnumz yatangiye umwaka ahangana n’uruhuri rw’ibibazo, yari amaze iminsi aburana na Hamisa Mobeto babyaranye budacyeye kabiri Zari Hassan aramuta yigira kuba muri Afurika y’Epfo.

Diamond yitabye urukiko rwa Kisutu bwa mbere tariki ya 8 Gashyantare 2018, yarezwe n’umunyamideli Hamisa Mobeto wasabaga ko ubutabera bwamufasha gusaba indezo kugira ngo abashe kurera umuhungu babyaranye.

Ibibazo bimaze gukomera, Diamond yagiye mu muryango wa Hamisa Mobeto asaba ko ibijyanye n’indezo y’umwana byakemurwa mu bwumvikane hatabanje kwitabazwa inkiko.

Kuri uyu wa Gatatu tariki ya 14 Gashyantare, Diamond na Hamisa Mobeto bongeye kugaragara ku rukiko rwa Kisutu rusanzwe ruburanisha imanza zirebana n’ibibazo by’abana. Bongo5 yatangaje ko bakigera imbere y’urukiko basabye ko bakwemererwa urubanza rwabo rugahagarikwa ‘kuko bakemuye ibibazo mu bwumvikane’.

Umwunganizi wa Diamond Platnumz yabwiye itangazamakuru ko banyuzwe n’uko ikibazo cyakemuwe mu buryo bwumvikanyweho. Yashimangiye ko na Diamond yiteguye gufatanya bya hafi na Mobeto bakarera umwana babyaranye.

Yanze kuvuga umubare w’amafaranga Diamond azajya agenera Mobeto buri kwezi mu gihe ubwo bitabaga urukiko bwa mbere bamuciye amashilingi ya Tanzania miliyoni eshanu buri kwezi kugeza igihe umwana azakurira.

Yagize ati “Ibijyanye n’igiciro ubwabo babyumvikanye, babyemeranyijeho nk’abavandimwe ariko babyemeranyije bahitamo ko biguma hagati mu muryango. Kuba bemeranyije ko bazafatanya kurera umwana nibyo by’ingenzi, Diamond yiteguye ko bafatanya bakarera umwana babyaranye.”

Mobeto yanze kugira byinshi avuga ku byifuzo yari yagaragaje mu rukiko birimo ‘gusaba ko Diamond yakubakira umwana babyaranye inzu n’amashilingi arenga miliyoni eshanu buri kwezi’.

Diamond na Mobeto bakemuye ibibazo mu bwumvikane

Uyu munyamideli yashimangiye ko yanyuzwe. Yagize ati “ Umwanzuro nawishimiye kuko ni ibintu twaganiriyeho impande zombi, ndizera ko buri muntu yanyuzwe n’uko byagenze.”

Ibi byabaye mbere y’amasaha make ngo Zari yerure ko yahisemo gushyira iherezo ku rukundo rwe na Diamond. Aba bombi bari bamaze kubyarana abana babiri ari bo Nillan Dangote na Latifah Dangote. Zari yari asanzwe afite abandi bana batatu yabyaranye na Ssemwanga ari bo Pinto, Quincy n’uwitwa Didy.

Hamisa Mobetto yari yasabye ko Diamond azajya atanga miliyoni eshanu z'amashilingi buri kwezi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza