00:00:00 IGIHE NETWORK KN KINYARWANDA EN ENGLISH FR FRANCAIS

Urujijo ku isubirana rya Kanye West na Kim Kardashian

Yanditswe na Uwiduhaye Theos
Kuya 29 Kanama 2021 saa 03:17
Yasuwe :
0 0

Umunyamideli Kimberly Noel Kardashian West, wamamaye nka Kim Kardashian n’umuraperi Kanye Omari West wamenyekanye nka Kanye West biravugwa ko bongeye gusubirana nyuma y’igihe cyari gishize batse gatanya.

Ikinyamakuru Pagesix cyatangaje inkuru igaragaza ko aba bombi bongeye kunga ubumwe ndetse basubiranye bucece. Cyavuze ko hari amakuru cyakuye mu bantu ba hafi ba Kanye West avuga ko agenda abwira inshuti ze ko yongeye kunga ubumwe n’umugore we ariko benshi ntibabyizere.

Gusubirana kw’aba bombi kwatangiye gukekwa nyuma y’aho Kim Kardashian agaragaye mu birori byo kumva album nshya ya Kanye West yise ‘Donda’.

Umwe mu bantu ba hafi yagize ati “Kanye abwira abandi baraperi ko we na Kim basubiranye. Ariko buri wese ntabwo abyemera. Bamaze amezi menshi batavugana ariko bongeye kuvugana mu ntangiro z’uku kwezi kubera abana babo. Kim ni umuntu mwiza n’ubwo batasubirana ariko azakomeza gushyigikira uwahoze ari umugabo we. Ashaka ko babana neza kubera abana.”

Undi waganirije PageSix yavuze ko bamaze igihe bari kugerageza kongera kubaka ubumwe bwabo, ndetse bakaba bashyigikirana cyane. Ikindi ngo bamaze igihe bahura bagasangira nk’umuryango bari kumwe n’abana babo.

Kim Kardashian ngo ari gushaka guhagarika icyemezo yari yafashe cyo kwaka gatanya.

Mu ntangiriro za 2021 ni bwo urugo rwa Kanye West na Kim Kardashian rwavuzwemo urunturuntu, amakuru yashyiraga ku kuba bashobora gutandukana. Byari nyuma y’imyaka isaga itandatu aba bombi basezeranye kubana akaramata.

Icyo gihe Kim Kardashian bavugaga ko yenda gutandukana n’uwari umugabo we yahisemo gushaka umunyamategeko usanzwe uburanira ibyamamare witwa Laura Wasse, wagombaga kumufasha kwitabaza inkiko mu gihe cyo gutandukana na Kanye West bafitanye abana bane.

Muri uko kwezi, TMZ izwiho gutangaza amakuru y’ubwiru ku byamamare, yanditse inkuru igaragaza ko Kim Kardashian na Kanye West, bari kugirwa inama n’abantu ba hafi yabo ngo barebe ko umwuka mubi waje mu mubano wabo washira ariko icyo gihe ntacyo byatanze.

Aba bombi bari bamaze amezi make buri wese aba ukwe, kuko Kanye West yari muri Wyoming mu gihe umugore we yabaga muri Calabasas muri Leta ya California n’abana. Kim Kardashian yahise afasha hasi impeta y’isezerano rye na Kanye West.

Guhera muri Nyakanga 2020, Kanye West yashinje umugore we Kim Kardashian kumuca inyuma muri hoteli hamwe n’umuraperi Meek Mill, avuga ko amaze igihe kinini yifuza ko batandukana.

Hashize amasaha make Kim Kardashin na we yanditse kuri Instagram agaragaza ko umugabo we ibyo ari gukora muri iyi minsi ari kubiterwa n’uburwayi bwo mu mutwe asanganywe buzwi nka ‘Bipolar Disorder’, butuma amarangamutima y’umuntu ahindagurika mu buryo butitezwe.

Muri Gashyantare uyu mwaka ni bwo Kim Kardashian yasabye gatanya ashaka gutandukana na Kanye West, undi na we arayemeza. Muri Kamena yasutse amarira avuga ko yananiwe kumvikana na Kanye West kuko akeneye umuntu umuba iruhande kandi we akaba atabibasha.

Kanye West na Kim Kardashian barushinze nyuma yaho Kim Kardashian yari yaramaze gutandukana n’abandi bagabo barimo Kris Humphries basezeranye mu 2011 bagatandukana mu 2013 na Damon Thomas barushinze mu 2000 bagatandukana mu 2004.

Kim Kardashian biravugwa ko yasubiranye bucece na Kanye West wahoze ari umugabo we

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .