Urukerereza rwaserukanye umucyo muri Rwanda Day (Amafoto)

Yanditswe na Philbert Girinema
Kuya 25 Nzeri 2016 saa 01:45
Yasuwe :
0 0

Itorero ry’Igihugu ‘Urukerereza’ ryaserukanye umucyo mu munsi wuje ubudasa ‘Rwanda Curtural Day’ wabereye i San Francisco muri Leta ya California.

Ku ikubitiro itorero urukerereza n’abahanzi Muyango na Mariya Yohana baserutse ku rubyiniro imbere y’imbaga irenga ibihumbi bitatu bakina umukino werekana indangagaciro z’ibanze z’umuco Nyarwanda nk’ibirango bwite by’Abanyarwanda.

Iri torero ryagaragaje ibyiza by’u Rwanda binyuze mu mbyino zihariye arizo intwatwa n’ikinimba, rikurikizaho imibereho y’umuryango Nyarwanda wo hambere, uko bakiraga umwana mu muryango binyuze mu kubyara no guhemba ababyeyi.

Kuri iki cyiciro iyo umwana yavukaga imiryango yarabimenyeshwaga abandi bana bagatumirwa nu muhango wo kumwita izina mu birori byitwa ‘Kurya ubunnyano’. ku munsi wa munani se w’umwana yamwitaga izina, ibyitwaga ‘guterura umwana’, nyina w’umwana yambikwaga urugori nk’ikimenyetso cy’uko yabaye umubyeyi.

Banerekanye uko Abanyarwanda ba kera babagaho, uburyo bwo kwigisha abana indangagaciro binyuze mu itorero ku bahungu no mu rubohero ku bakobwa.

Kuva ku myaka 12 kugeza kuri 17 umukobwa yajyanaga n’abandi mu rubohero bakamwigisha kuboha ibiseke, imisambi n’ibijyanye bakanamuha n’inyigisho zijyanye n’imyanya myibarukiro, ndetse n’uburyo azitwara ku mugabo amaze gushaka.

Abahungu bajyanwaga mu itorero bagatozwa gutabarira urugo n’igihugu. Muri rusange umwana wajyaga mu itorero yabaga ari mu kigero kiri hagati y’imyaka 12 na 17. Mu itorero kandi bahigiraga byinshi bijyanye n’umuco na politiki y’igihugu. Bahigiraga imbyino n’imihamirizo, kumasha ndetse n’indi mikino y’ubwenge, kurwana, kwivuga cyane cyane ibyivugo by’ingabo ndetse bakiga n’imvugo nziza.

Itorero urukerereza ryanibukije imbaga yitabiriye Rwanda Curtural Day imihango y’ubukwe bwa Kinyarwanda nko kurambagiza, gufata irembo, gusaba, gushyingirwa no gutwikurura.

Itorero urukerereza ryanibukije imbaga yitabiriye Rwanda Cutural Day imihango y’ubukwe bwa Kinyarwanda nko kurambagiza, gufata irembo, gusaba, gushyingirwa no gutwikurura.

Mu gice cya kabiri itorero Urukerereza ryerekanye uko Abanyarwanda bataramaga, bagahiga, bakivuga by’umwihariko uko bicaraga muri Gacaca bagakemura amakimbirane. Mu gitaramo kandi Abanyarwanda bajyaga inama zo kwishakamo ibisubizo nk’umuganda n’ubudehe bagafashanya, bakazamurana.

Nyuma yo gukora ibikorwa byo kwishakamo ibisubizo, Abanyarwanda basangiriraga ku ntango imwe nk’ikimenyetso cyo gushyira hamwe no gusangira byose.

Muri iki gice habyinwe "Rusanga Nizayo", indirimbo y’intsinzi yabyinirwaga mu rukiko rw’i Bwami nyuma y’uko umwami atsinze umwanzi.

Igice cya nyuma cyaranzwe n’umuhamirizo w’Intore zambaye umugara w’intare nk’ikimenyetso cy’imbaraga n’umurava.

Mazimpaka Jean Pierre - San Francisco na Cyprien Niyomwungeri - Kigali

Amafoto: Mazimpaka Jean Pierre


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza