Amasomo akomeye Clarisse Karasira yigiye mu muziki mu mwaka umwe awumazemo

Yanditswe na Nsengiyumva Emmy
Kuya 31 Ukwakira 2019 saa 02:01
Yasuwe :
0 0

Tariki 30 Ukwakira 2018 nibwo Clarisse Karasira yashyize hasi mikoro z’itangazamakuru yinjira mu buhanzi ahereye ku ndirimbo ye “Giraneza”, mu gihe yujuje umwaka mu muziki avuga ko hari ibyiza n’ibibi yahuye nabyo .

Karasira yakunzwe cyane kubera injyana gakondo yinjiriyemo mu muziki mu gihe ari imwe mu zikundwa n’abatari bake ariko na none ikaririmbwa na bake mu bahanzi nyarwanda.

Atangira umuziki yahereye ku ndirimbo yise “Giraneza” ikundwa n’abantu bake bakunze bikomeye ubutumwa bwo kubibutsa guharanira kugira neza mu buzima bwa buri munsi.

Nyuma yakurikijeho indirimbo zinyuranye nka Ntizagushuke, Twapfaga iki, Imitamenwa n’izindi zagiye zikundwa.

Mu gihe cy’umwaka umwe aretse itangazamakuru akihebera umuziki, ni umwe mu bahanzi bagezweho muri iki gihe bitewe n’indirimbo ze kimwe n’ibitaramo atumirwamo binyuranye.

Mu kiganiro yagiranye na IGIHE, Karasira yavuze ko mu gihe amaze mu muziki hari ibyo yahuye nabyo bikamushimisha nubwo hari n’ibyamubabaje.

Ahereye ku bikomeye yahuye nabyo Karasira yavuze ko yagowe cyane no kuba icyamamare.

Ati”Ukumenyekana hari uburyo bitabaye byiza ku mibereho yanjye. Narimenyereye kubaho bisanzwe bitansaba byinshi, mu by’ukuri kwamamara nubwo ari byiza ariko biri mu byangoye.”

Ikindi cyagoye Karasira ni inkuru yagiye avugwaho zitandukanye. Avuga ko amakuru atariyo kibazo ahubwo ibihuha byayihishaga inyuma kubimenyera byamugoye.

Ati” Abantu bakabaye bagushyigikira akenshi usanga aribo baguca intege, icyakora ibyo byaranyigishije.”

Ibibera ku mbuga nkoranyambaga biri mu byakoze ku mutima Karasira, avuga ko abakoresha imbuga nkoranyambaga baba bashaka ko uwo bafana abaho uko babishaka kandi rimwe binagoye.

Karasira yishimira ko yagize Imana yamuhaye igikundiro n’izina rikomeye akaba umwana w’Imana n’Igihugu (Nkuko akunda kubyiyita).

Yemeza ko byari bigoye k’umwana w’imyaka 20 winjiye mu muziki gakondo ariko nanone agashimira Imana yamubaye hafi.

Yongeyeho ko umuziki wamuhaye amafaranga nubwo atavuga umubare wayo ariko ahamya ko mu mwaka umwe gusa awumazemo wamuhaye ubuzima atigeze atekereza kuzabaho.

Ati” Umuziki wampaye ubuzima, wampaye amafaranga reka mbivuge gutyo, umpa imibereho mu buryo butangaje ntatekerezaga kandi mu gihe gito, mbishimira Imana.”

Karasira akomeza avuga ko yishimira uburyo abantu bakira indirimbo ze ndetse akabona ubutumwa bw’abantu bafashwa nazo.

Karasira yavukiye i Masaka mu mujyi wa Kigali, yiga amashuri mu bigo binyuranye arangiza ayisumbuye mu ndimi, kaminuza yize itangazamakuru muri Mount Kenya University. Nyuma y’umwaka umwe yaje kurisubika atangira kwiga ibijyanye na Politike mpuzamahanga muri ULK ubu ari mu mwaka wa kabiri.

Uyu mukobwa yatangiriye itangazamakuru i Gicumbi kuri Radio Ishingiro, akomereza kuri Flash Fm na Flash Tv ahakora igihe kitari gito aza gusezera muri Kanama 2018 ubwo yatekerezaga kwinjira mu muziki.

Clarisse Karasira umaze umwaka mu muziki afite ibyo yishimira amaze kugeraho
Usibye ibyamugoye nabyo adatinya kuvuga, uyu muhanzikazi ahamya ko umuziki umaze kumuhindurira ubuzima

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza