Umuyobozi wa BK yakiriye mu biro Miss Rwanda 2021 n’ufite umushinga wahize indi

Yanditswe na IGIHE
Kuya 31 Werurwe 2021 saa 11:23
Yasuwe :
0 0

Kuri uyu wa Gatatu tariki 31 Werurwe 2021, Umuyobozi wa Banki ya Kigali (BK) Dr Diane Karusisi yakiriye mu biro ba Nyampinga barimo Ingabire Grace wegukanye ikamba rya Miss Rwanda na Musana Teta Hense wegukanye iry’uwahize abandi kugira umushinga urimo agashya.

Nk’umwe mu baterankunga bakuru b’irushanwa rya Miss Rwanda, Banki ya Kigali yahembye umukobwa wagaragaje umushinga urimo agashya ariko by’umwihariko ikazanamufasha kuwushyira mu ngiro.

Ni ibiganiro byari bigamije kurebera hamwe iby’uyu mushinga w’uyu mukobwa ndetse n’uburyo uzashyirwa mu ngiro ku bufatanye n’iyi banki.

Babinyujije ku rukuta rwabo rwa Twitter, Ubuyobozi bwa Banki ya Kigali bwagize buti “Umuyobozi wa Banki ya Kigali yakiriye mu biro Miss Rwanda 2021 Ingabire Grace na Miss Musana Teta Hense wegukanye ikamba rya Nyampinga wahize abandi mu kugira umushinga urimo udushya. Baganiriye ku mushinga we n’uburyo Banki izabafasha kuwushyira mu ngiro.”

Musana Teta Hense afite umushinga wo gukora ibikombe mu mpapuro zitangiza ibidukikije atari mu Rwanda gusa ahubwo no mu Karere.

Nyuma y’uko umushinga we utoranyijwe nk’uhiga indi azajya ahabwa ibihumbi 500 by’amafaranga y’u Rwanda buri kwezi bingana na Miliyoni esheshatu mu gihe cy’umwaka.

Aya mafaranga yose azatangwa na Banki ya Kigali ikazaba ari nayo ikurikirana umushinga we akazanahabwa ubufasha mu by’imari.

Musana Teta Hense ufite umushinga wahize iy'abandi (ubanza ibumoso) na Dr Diane Karusisi umuyobozi wa BK
Nyampinga w'u Rwanda Ingabire Grace yashyikirije ishimwe Umuyobozi wa BK imwe mu baterankunga bakuru b'irushanwa
Dr Karusisi Diane yijeje Musana Teta Hense ubufatanye mu mushinga we
Musana Teta Hense afite umushinga wo gukora ibikombe mu mpapuro zitangiza ibidukikije atari mu Rwanda gusa ahubwo no mu Karere

Amafoto: Banki ya Kigali


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .