00:00:00 IGIHE NETWORK KN KINYARWANDA EN ENGLISH FR FRANCAIS

Umuririmbyi Adekunle Gold yahaye umukoro itangazamakuru ryo mu Rwanda

Yanditswe na Uwiduhaye Theos
Kuya 4 Ugushyingo 2021 saa 02:50
Yasuwe :
0 0

Umuririmbyi w’Umunya-Nigeria Adekunle Kasoko wamenyekanye nka Adekunle Gold cyangwa AG Baby yatangaje ko itangazamakuru rikwiriye kugira uruhare rukomeye mu gufasha abahanzi bo mu Rwanda kugira ngo bamenyekane ku ruhando mpuzamahanga.

Yabivugiye mu kiganiro n’itangazamakuru cyabaye kuri uyu wa Kane tariki 4 Ugushyingo 2021, gitegura igitaramo uyu muhanzi azahuriramo na Kenny Sol na Gabiro Guitar kizabera muri Canal Olympia kuri uyu wa Gatanu tariki 5 Ugushyingo 2021. Iki gitaramo cyiswe ‘M*ovember Fest’.

Yabanje kuvuga ko yishimiye gutumirwa muri iki gitaramo kigiye kuba icya mbere kirimo umuhanzi mpuzamahanga nyuma ya Guma mu rugo.

Yagize ati “Nishimiye kuba hano. Ni byiza kuba ndi imbere y’itangazamakuru nka gutya. Ni ku nshuro ya mbere ngeze i Kigali ntegereje igitaramo cy’ejo no kuririmbira abantu bashya batari basanzwe bataramana nanjye.”

Adekunle yabajijwe niba hari umuhanzi yari azi mbere yo kugera mu Rwanda, avuga ko uwo yamenye ari Bruce Melodie ndetse na Kenny Sol kubera indirimbo ye yitwa ‘Say my name’.

Ati “Nzi umuhanzi Bruce Melodie kubera igitaramo ari gutegura, namenye n’indirimbo ‘Say my name’ ya Kenny Sol mbere ho gato y’uko nza mu Rwanda.”

Yahise abazwa n’umunyamakuru impamvu avuze ko hari abahanzi azi bo mu Rwanda nimugoroba agera ku kibuga cy’indege yavuze ko ntabo azi, amusubiza ko yavuze ko yari yabibagiwe.

Muri iki kiganiro uyu muhanzi mu bibazo yabajijwe harimo ikintu abahanzi bo mu Rwanda bakora kugira ngo umuziki wabo umenyekane mu ruhango mpuzamahanga, asubiza ko itangazamakuru ariryo rizabigiramo uruhare.

Ati “Hari umukoro ku itangazamakuru. Mwe ni gute muri kubafasha? Ni inshuro zingahe mukina indirimbo zabo kuri televiziyo cyangwa kuri radiyo? Niba mukina indirimbo mpuzamahanga ntabwo aribyo. Mukureho imipaka ariko muhere hano mu Rwanda mubafasha. Ikindi ariko habeho gufatanya hagati y’abahanzi n’itangazamakuru. Umurimo ukomeye cyane ni uw’itangazamakuru.”

Kenny Sol yavuze ko yiteguye igitaramo neza kandi atekereza ko abantu bazitabira bazishima. Gabiro Guitar na we yavuze amaze igihe yitegura igitaramo asaba abantu kuzaza kubashyigikira muri iki gitaramo kuko kizaba ari icy’amateka.

Remmy Rubega uhagarariye RG Consult yateguye igitaramo yavuze ko bishimye kandi bashima Imana uba bagiye gukora igitaramo kirimo umuhanzi mpuzamahanga nyuma ya Guma mu rugo.

Ati “Turishimye kuba tugiye gukora umuhanzi mpuzamahanga ku nshuro ya mbere nyuma ya Guma mu Rugo. Ntabwo ndi hano kuvuga kuri COVID-19 ahubwo nshaka kubabwira ko twagarutse kandi dufite imbaraga zidasanzwe.”

Umuyobozi wa Canal Olympia, Aimée Umutoni, izaberamo iki gitaramo yavuze ko ari ishema kuri bo kuba bagiye kwakira igitaramo nk’iki gikomeye.

Ati “Ntewe ishema kandi nishimiye kuba turi bamwe mu bafatanyabikorwa by’iki gitaramo kinini kigiye kuba nyuma ya Guma mu Rugo. Twizeye ko abazaza bazishima mu gitaramo kizabera muri Canal Olympia kuko ari ahantu hanze kandi hisanzuye.”

Uretse aba bahanzi bazaririmba muri iki gitaramo abazitabira bazasusurutswa na Nep Djs na Neptunez Band.

Adekunle yahuje urugwiro na Gabiro na Kenny Sol bazahurira ku rubyiniro
Adekunle yafashe ifoto na Remmy Rubega uhagarariye RG Consult yateguye iki gitaramo
Adekunle Gold afata ifoto n'abahanzi bagiye kuririmbana, abateguye igitaramo ndetse n'abafatanyabikorwa
Adekunle ni ubwa mbere agiye gutaramira mu Rwanda
Iki kiganiro cyatumiwemo abanyamakuru bo mu bitangazamakuru bitandukanye mu Rwanda
Kenny Sol ni bwo bwa mbere agiye gutaramira mu gitaramo gikomeye
Remmy Rubega yavuze ko bagiye kugarukana imbaraga nyuma ya Guma mu rugo
RG Consult ni cyo gitaramo cya mbere iteguye nyuma yo kubikomorera
Uyu muhanzi yavuze ko itangazamakuru n'abahanzi bakwiriye gufashanya bakazamura umuziki Nyarwanda

Amafoto: Landry Shema


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .