Umunyarwandakazi yahawe igihembo cya filime cyitiriwe Thomas Sankara

Yanditswe na Munyengabe Murungi Sabin
Kuya 7 Werurwe 2017 saa 04:01
Yasuwe :
2 1

Marie Clémentine Dusabejambo yahawe igihembo cya sinema cyitiriwe Thomas Sankara, inkingi ya mwamba mu baharaniye impinduramatwara muri Burkina Faso.

Filime ‘A place for myself’ ya Marie Clémentine Dusabejambo niyo yashimwe n’abari bagize akanama nkemurampaka mu bihembo bya FESPACO (Festival panafricain du cinéma et de la télévision de Ouagadougou) biherutse gutangirwa muri Burkina Faso.

Muri ibi bihembo byatanzwe ku nshuro ya 25, Dusabejambo yahawe icyitiriwe intwari ya Burkina Faso Thomas Sankara, cyaherekejwe n’ibahasha irimo miliyoni eshatu z’amafaranga ya CFA [akabakaba miliyoni enye z’amafaranga y’u Rwanda]. Yanahawe igikombe giherekejwe n’urupapuro rw’ishimwe.

Muri ibi bihembo byatangiwe mu Mujyi wa Ouagadougou hahembwe abandi bahanga mu bya sinema muri Afurika mu byiciro cumi na bitatu, bane muri bo bakomoka muri Burkina Faso ndetse buri gihembo cyari giherekejwe n’amafaranga atari munsi ya miliyoni ebyiri.

Mu kiganiro Dusabejambo yagiranye n’ikinyamakuru Burkina24, yasobanuye ko ‘A Place For Myself’ yayihimbye afatiye ku bugome n’itotezwa ryakorewe abafite ubumuga bw’uruhu mu bihe bitandukanye muri Tanzania. Yavuze ko iki kibazo atigeze akibona mu Rwanda nk’uko cyagiye kigaragara mu bihugu byo mu karere gusa abo mu gihugu yasanze bafite ibibazo bishingiye ahanini ku mitekerereze.

Yagize ati “Ndishimye kandi binkoze ku mutima, ni ishimwe rikomeye kuri njyewe kuba njyanye iki gihembo mu Rwanda. Ngituye urubyiruko rwose rukora sinema mu Rwanda, ubu natwe dufite umwanya muri sinema.”

Mu ncamake yashyizwe ku rubuga rw’iri serukiramuco, basobanura ko filime ‘A Place For Myself’ ikubiyemo inkuru y’umwana w’umukobwa ufite ubumuga bw’uruhu witwa Elikia uhura n’ibibazo bikomeye agiye mu mashuri abanza. Abanyeshuri bagenzi be bamuteragirana bamuziza uko asa na we bikamutera kwiyanga no kwanga urunuka ishuri ku bwo kubura agahenge muri bagenzi be.

Muri iyi filime imara iminota 20, nyina wa Elikia agerageza kumwihanganisha no kumwumvisha ko akwiye gukomeza guhatana ndetse akiga ashyizeho umwete atitaye ku bamunena n’abamwereka ko nta gaciro afite.

Ibyo wamenya kuri filime ‘A Place for Myself’

Ikubiyemo inkuru y’umwana w’umukobwa ufite ubumuga bw’uruhu witwa Elikia uhura n’ibibazo bikomeye agiye mu mashuri abanza. Abanyeshuri bagenzi be bamuteragirana bamuziza uko asa na we bikamutera kwiyanga no kwanga urunuka ishuri ku bwo kubura agahenge muri bagenzi be.

Iyi filime yibanda ku buzima bw'abana bafite ubumuga bw'uruhu

Muri iyi filime imara iminota 21, nyina wa Elikia agerageza kumwihanganisha no kumwumvisha ko akwiye gukomeza guhatana ndetse akiga ashyizeho umwete atitaye ku bamunena n’abamwereka ko nta gaciro afite.

‘A Place for Myself’ ikinnye mu Cyongereza, yatangiye gutunganywa mu mwaka wa 2015, yayobowe na Dusabejambo Marie Clementine. Abakinnyi bayigaragaramo harimo Jacqueline Umubyeyi, Fabiola Ndihokubwayo na Akimana Rizik.

Dusabejambo Marie Clementine yinjiye cyane mu byo gukora filime mu mwaka wa 2010 ubwo yasohoye iyitwa ‘Lyiza’, iyi yanayerekanye mu iserukiramuco rikomeye rya Tribeca Film Festival mu Mujyi wa New York mu mwaka wa 2011. Iyi filime yanerekanwe mu yandi maserukiramuco akomeye mu bihugu bitandukanye inahabwa ibihembo mu Rwanda no hanze.

Iyi filime iherutse gutoranywa mu zifite ubuhanga bwihariye zerekanwe mu iserukiramuco rya sinema rya Toronto Black Film Festival (TBFF) riherutse kubera muri Canada.

Iserukiramuco Toronto Black Film Festival (TBFF) riri mu maserukiramuco ya mbere akomeye muri Canada, ryibanda cyane kuri filime zakozwe n’abirabura zinakubiyemo inkuru zivuga ku buzima bwabo.

Dusabejambo Marie Clementine yahawe igihembo cyitiriwe Thomas Sankara
Muri FESPACO batanze ibihembo bitandukanye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza