Umunyarwanda yavuze inzira y’umusaraba yanyuzemo muri Uganda ashinjwa kuba maneko (Video)

Yanditswe na Sekamana Mathias
Kuya 20 Nyakanga 2019 saa 10:19
Yasuwe :
0 0

Maniriho Saidi ni umusore w’imyaka 22 uvuka mu Murenge wa Ndera mu karere ka Gasabo. Yagiye muri Uganda muri Kamena 2018 ajyanwe no gushaka ubuzima, gusa ubuhamya bw’uko yavuyeyo ni ikimenyetso cyiyongera ku bindi by’uburyo abanyarwanda bakomeje gutoterezwayo.

Ageze i Kampala yatangiye gucuruza imbuto zirimo imyembe, amapapayi na watermelon mu Karere ka Wakiso.

Nk’uko yabibwiye itangazamakuru, Maniriho avuga ko tariki ya 3 Mutarama yashakaga kuza mu Rwanda, ajya kugura itike ndetse arayibona, ariko akiri aho abantu yajyaga ashyira imyembe baramuhamagara bamusaba amakarito ane, baramwishyura.

Agiye kuhava yahuye n’umugabo munini ufite uruhara, abanza kumuganiriza mu kigande ageze aho avuga Ikinyarwanda, ati “ko usa nk’abanyarwanda uri we?” Undi ngo yamusubije ko ari Umunyarwanda ukomoka i Ndera, nawe amubwira ko ari uwo mu Gatsata.

Ni uko ikiganiro cyatangiye, uwo mugabo amusaba ko bajyana gusali (gusenga) ariko Maniriho amusubiza ko atameze neza.

Muri ibyo biganiro, ngo uwo mugabo yamusabye kumwereka indangamuntu yo mu Rwanda ngo arebe ko isa nk’iya Uganda, ayikuyemo abona n’agakarita ka Tap&Go, amubaza niba ari ikarita ya gisirikare. Undi yamusubije ko ari ikarita yo gutegesha imodoka kuko mu Rwanda hatakibaho kwishyura mu ntoki.

Yakomeje amubaza ibibazo byinshi, aza kumubaza niba anywa inzoga amubwira ko abasha Skol kandi muri Uganda zitahaba, aza kwemera kumugurira Soda ya Melinda, arabyemera bajya gusangira, nawe amugurira ipilawu n’inyama.

Basoje mu gihe undi ashaka kugenda kubera ko yari afite itike agomba gutaha mu Rwanda, hahise haza imodoka y’umweru imbere ifite pulake yo muri Sudani imbere n’iya Uganda inyuma. Havuyemo abantu bambaye gisivile bafata uwo mugabo, ati “si njyewe mwanyibeshye ho ni uriya.” Ni uko Maniriho yafashwe.

Bamufunze igitambaro mu maso, bamwambika amapingu ku maboko n’umunyururu ku maguru, bamushyira mu modoka baramutwara. Bageze mu mahuriro y’imihanda ahitwa Busega baramubwira bati “zana imbunda Kagame yaguhaye.”

Maniriho ngo yasubije ko nta mbunda afite kuko nta n’umuntu wo mu muryango we wigeze ayitunga, ariko ngo bamubwira ko bamuzi “neza”. Bakomeje kumubita, banamubwira ko ari kapiteni mu gisirikare ndetse ko afite abasirikare ayoboye.

Ngo bamwitaga maneko, bamusatse bamusangana imitwaro mirongo itandatu y’amashilingi ya Uganda na 550,000 Frw, ibyo nabyo babyita ibimenyetso kuko ngo ba maneko bagendana amafaranga menshi.

Yafashwe saa yine za mu gitondo, ariko bamugejeje mu nzu bagombaga kumufungiramo saa yine z’ijoro, ayo masaha yose bakimucunaguza, bamuhinduranya mu modoka.

Kubera uburyo yari aboshywe, bamufunguye iminyururu n’amapingu yatangiye kuva amaraso, babanza kumujyana kwa muganga, bamugarura aho. Bamujyanye aho agomba gufungirwa ahasanga abanyarwanda batatu n’abanya-Uganda benshi.

Nyuma y’ibyumweru bitatu bamujyanye mu kindi cyumba bitaga “garage”, asanga mo umunyarwanda umwe ndetse nyuma y’iminsi mike hazanwa abandi babiri.

Muri iyo minsi ngo haje gutoroka Umunya-Uganda umwe, bituma batangira kubafata nabi cyane kuko babahaga indobo ngo bihagarikemo banitumemo ari abantu mirongo irindwi, kandi ari naho barira, nyuma n’ibyo kurya biza kubura.

Maniriho avuga ko bahakuye indwara zikomeye igitsina kikenda gucika kubera uwo mwanda, ababafunze bakabaha ifu ya kawunga ngo basigeho barakira.

Avuga ko ku wa 13 Gashyantare bahamagawe ku biro by’Umuyobozi w’Urwego Rushinzwe Iperereza ry’imbere mu gihugu (ISO) mu karere ka Wakiso witwa Kaka, ngo basanga yagiye mu Nteko Ishinga amategeko, babasaba gusubirayo mu gitondo cy’umunsi ukurikira.

Basubiyeyo ngo bahuye nyuma y’amasaha menshi bamutegereje, abasuhuza mu Kinyarwanda ati “Mwiriwe neza?” abaha karibu, ababwira imyirondoro yabo bose nk’ubazi neza.

Nyuma yahinduye ururimi avuga Ikigande, ati “Uriya musaza abaha udufaranga dukeya ngo muze kuneka Uganda kandi Uganda n’u Rwanda ari gato na gakuru… Kuki mutareka tukabaha amafaranga menshi mukajya kuneka abazungu niba mushoboye kuneka? Uganda ni gakuru, aho itari u Rwanda ntirwabaho, none bakabashuka mukaza kuneka Uganda ku dufaranga dukeya?”

Ngo babujijwe kugira icyo babaza ariko umwe azamura ukuboko abaza uburyo bamwita maneko atariyo, abaza niba azira gusa ko avuga Ikinyarwanda.

Nyuma ngo Kaka yahise avuga ati “Njyewe ndi umubyeyi sinifuza ko mufungwa, mutahe mujye kureba abana banyu, mufashe imiryango yanyu ndababariye.”

Bahise bishima cyane bumva ko batagisubiye aho bari bafungiwe, ariko Kaka ati “Mubanze musubireyo mbitegereze mbajonjoremo abanyarwanda ba Uganda basigare, n’abanyarwanda bo mu Rwanda batahe.” Ngo yahise abwira Major Amos gusubiranayo abantu be.

Kuva ubwo ngo ukwezi kwarashize, ukwa gatatu kurashira, ukwa kane kurarangira, ukwa gatanu kurashira, muri Kamena bajya inama yo gutuma kuri Kaka wababwiye ko abababariye, ngo barebe ko yabarekura.

Muri icyo gihe ngo basabye ko niba batarekuwe bajyanwa mu rukiko rukababuranisha, rugafata umwanzuro niba hari icyaha bashinjwa bagafungwa byemewe cyangwa se niba nta cyaha bakoze, bakarekurwa.

Ngo babasubije ko ibyihebe byinjiye muri Uganda, bityo Kaka ahuze badashobora kumubona. Batangiye kuvuga ko baziyahurira muri gereza, biza kugera kwa Kaka.

Hari ku wa Gatatu ubwo yasabaga ko barekurwa, bigeze ku Cyumweru saa tatu z’ijoro barababwira abati ‘Abanyarwanda mwambare muratashye.” Ngo basabye kuharara barabareka, mu gitondo babicazamu modoka.

Maniriho ngo yababajije indangamuntu ye n’amafaranga bafatiriye, bamubwira ko niba abishaka asubira aho yari afungiwe akazataha byabonetse, agiye gusubirayo bati “ca aha ngaha jya mu Rwanda iwanyu.”

Bageze mu nzira bahasanze indi modoka irimo abandi banyarwanda babiri, bababwira ko babajyanye ku mupaka i Gatuna, basabwa n’ibyishimo.

Nyamara ngo bakomeje urugendo ya modoka yakase umuhanda w’igitaka, batangira kwibaza uwo muhanda u Rwanda uganamo, impungenge ziba nyinshi ko bagiye kwicirwa aho batazi.

Nka saa sita n’igice z’ijoro bageze ahantu hari igishanga kinini imodoka irahagarara, ababarinze babategeka gusohoka, abo basirikare bategura imbunda zabo, babashyira hagati.

Babategetse ko ufite ibyangombwa byo mu Rwanda yigira imbere, havamo babiri barimo na Maniriho. Uyu yabajije uko abyifatamo kuko ibyangombwa bye byafashwe ubwo yafungwaga bakahamukura batabimusubije, baramubwira ngo abe agiye ku ruhande.

Bageze aho babanyuza muri icyo gishanga, hashize umwanya bati “Aha ni mu Rwanda, nimwambuke mugende. Twari dufite itegeko ryo kubica ariko dusanze nta byaha mufite, nimwigendere.”

Mu gukomeza imbere batungutse Rwempasha muri Nyagatare. Baje kubona umuntu muri Uganda ari kuri moto afite imbunda, bakeka ko yaba ashaka kubarasira ku butaka bw’u Rwanda, kubera ko byari bigeze saa saba z’ijoro. Bigiriye inama yo kwicara ahantu hamwe, hashize umwanya baza gukomeza urugendo.

Maniriho ngo yabwiye mugenzi we ati “Reka rero tugende niba bari baduteze umutego ubwo wapfubye.” Ni uko batungutse muri Nyagatare.

Uyu musore avuga ko inkoni yakubiswe muri Uganda zamugizeho ingaruka ku buryo aho bagiye babakubita hajya habyimba ndetse hari n’ahakigaragara imibyimba ku mubiri.

Arasaba abanyarwanda gutuza bakaguma mu rwababyaye kuko muri Uganda nta mutuzo uri yo, kuko umuntu ahorwa gusa ko ari umunyarwanda agafungwa, agakorerwa itotezwa n’iyicarubozo rikomeye.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza