Umunyarwanda wa mbere yasezerewe muri East Africa’s Got Talent biteza umwiryane mu bakemurampaka

Yanditswe na Muvunyi Arsène
Kuya 26 Kanama 2019 saa 09:49
Yasuwe :
0 0

Ku nshuro ya mbere Umunyarwanda yasezerewe mu irushanwa rya East Africa’s Got Talent bituma bamwe mu bakemurampaka baterana amagambo ku bwo kutumvikana.

Ku Cyumweru, tariki ya 25 Kanama 2019 herekanywe agace ka kane k’irushanwa rya East Africa’s Got Talent rihuza abanyempano bakomoka mu Rwanda, Tanzania, Uganda na Kenya.

Nk’ibisanzwe impano zerekanywe ni ukuririmba, kubyina, imikino ngororamubiri. Mu baserutse abenshi biganjemo abo muri Uganda n’u Rwanda.

Umwana w’umukobwa w’imyaka 10 ukomoka mu Rwanda yemeje abagize akanama nkempurampaka ubwo yerekanaga impano ye yo kubyina ari kumwe n’umwarimu we witwa Niyonkuru Rachid bakaba bafite itsinda bise Urban Song.

Bamaze kubyina abagize akanama nkempurampaka n’abari mu cyumba cy’irushanwa bakomye amashyi y’urufaya, Umunya-Kenya Jeff Koinange we avuga ko umwana arusha umwarimu we.

Shyaka Jean Luc w’imyaka 21 uririmba mu buryo bwa ‘Opera’ ntiyishimiwe n’abagize akanama nkempurampaka kuko batatu muri bo bagaye impano ye atararangiza no kuririmba.

Uyu musore yaririmbye indirimbo Ave Maria ikoranywe amajwi y’ubuhanga.

Vanessa Mdee uri mu bagize akanama nkemurampaka yamubwiye ko yahisemo indirimbo ikomeye kandi akayiririmba nabi. Ibi byatumye aterana amagambo n’Umugande Gaetano wari washimye imiririmbire ya Shyaka.

Mu buryo busa no gutebya yamubwiye ati “uri kuvuga ubusa” undi na we aramusubiza ati “ubusa ni wowe.”

Gaetano yavuze ko kubona umwana w’Umunyarwanda aririmba nk’uko Shyaka Jean Luc yabikoze bidakwiye gukerenswa.

Makeda we yavuze ko uyu musore ashobora kuzavamo umuririmbyi mwiza ariko agifite byinshi byo gukora na we amuha ‘No’.

Ibi bintu byababaje cyane Gaetano n’abari mu cyumba cy’irushanwa bamukomeye amashyi bamwereka ko bishimiye ibyo yakoze.

Abandi Banyarwanda banyuze imbere y’akanama nkemurampaka bagaragarijwe urukundo ndetse bemererwa gukomeza mu kindi cyiciro.

Aba barimo Kwizera Claudien wahoze ari umwana wo mu muhanda werekanye impano yo gukina Kung-fu yatangiye afite imyaka irindwi.

Uyu musore w’imyaka 22 yavuze ko yahize bagenzi be bo ku Mugabane wa Afurika bimuhesha amahirwe yo guhura Jack Chan.

Nyuma y’imyiyereko yahawe amahirwe yo gukomeza mu cyindi cyiciro byemejwe n’abakemurampaka bose.

Undi Munyarwanda witwaye neza ni Elisha The Gift werekanye impano yo kuririmba. Yaririmbye indirimbo ye yise “Nyiramwiza” iri mu njyana ya Kinyafurika ariko yiganjemo umudiho gakondo w’Abanyarwanda.

Uretse ijwi rye ryanyuze bose, imyambarire ye yakuruye Vanessa Mdee maze we na bagenzi be bamwemerera gukomeza mu kindi cyiciro.

Itsinda ry’ababyinnyi bo muri Uganda ryitwa IDT ryakoresheje indirimbo ya Meddy yitwa “Holy Spirit” naryo ryemerewe gukomeza mu kindi cyiciro.

Nibwo bwa mbere hasezerewe Umunyarwanda kuva iri rushanwa ryatangira. Uzaryegukana azahembwa ibihumbi $50.

-  Reba uko agace ka kane ka East Africa’s Got Talent kagenze

Shyaka Jean Luc uririmba Opera ni we Munyarwanda wa mbere wasezerewe muri East Africa’s Got Talent
Vanessa Mdee (uwa kabiri uturutse iburyo) ntabwo yumvikanye na Gaetano ku cyemezo bafatiye Umunyarwanda wasezerewe mu irushanwa
Itsinda ribyina rya Urban Song ryo mu Rwanda ryemerewe gukomeza
Abakemurampaka bishimiye impano y'umwana w'Umunyarwandakazi uzi kubyina cyane
Kwizera Claudien yerekanye impano y'umukino wa Kung-Fu, atangarirwa na benshi
Elisha The Gift yaririmbye indirimbo ye iri mu njyana ya Kinyafurika yemererwa gukomeza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza