Umunyana Shanitah yajyanye icyizere muri Miss Supranational (Video)

Yanditswe na Uwiduhaye Theos
Kuya 18 Ugushyingo 2019 saa 10:51
Yasuwe :
0 0

Umunyana Shanitah wegukanye ikamba ryo guhagararira u Rwanda mu irushanwa rya Miss Supranational International 2019 yerekeje muri Pologne aho risanzwe ribera.

Uyu mukobwa yahagurutse ku Kibuga Mpuzamahanga cy’Indege cya Kigali mu masaha ya mbiri ashyira saa tatu zo kuri uyu wa Mbere, tariki ya 18 Ugushyingo 2019.

Mu magambo make yabwiye itangazamakuru ko afite icyizere cyo kwitwara neza mo guserukira igihugu bikwiye.

Ati “Imyiteguro yaranzwe n’uburyo bwo gutambuka, inama zuko nzasubiza n’umuco wacu. Icyizere ni kiruta ibindi mu byo njyanye. Ni ugukora uko nshoboye nkahesha ishema u Rwanda.’’

Ibirori bya nyuma bya Miss Supranational igiye kuba ku nshuro ya 11, biteganyijwe kubera mu Mujyi wa Silésia ku wa 6 Ukuboza 2019.

Miss Supranational yitabirwa n’abakobwa baturuka mu bihugu bigera kuri 80, irebwa mu bihugu 180 ku Isi aho nibura abagera kuri miliyoni 600 barihanga amaso utabariyemo abakoresha imbuga nkoranyambaga.

Nsengiyumva Alphonse ukuriye KS Ltd itegura iri rushanwa mu Rwanda mu kiganiro yahaye IGIHE yavuze ko bagerageje ibishoboka byose kugira ngo Umunyana Shanitah azabashe kwitwara neza.

Ati “Twabanje kumufasha kwitegura neza ahereye mu mutwe kuno kwezi kwa nyuma yabikozeho. Ukwezi kose yagiye afata amasomo atandukanye ajyanye n’uko agomba kwitwara. Irushanwa rimara ibyumweru bitatu ntabwo tuba duteganya ko umukobwa azitwara neza ku munsi wa nyuma, ibanga ryo muri iri rushanwa guhera ku munsi wa mbere kugeza ku munsi wa nyuma witwara neza.”

“Hari amanota bagenda babaha, ibyo byose twagiye tumutegura mu mutwe noneho ku munsi wa nyuma kubera ko hagiye hagaragara ko iyo umwana atsinzwe atabyakira neza , twabashije kumutegura kugira ngo nabyo azamenye uko yitwara.”

Ubundi mu myaka yabanje ntabwo habagaho gutora ku rwego rw’igihugu Nsengiyumva yavuze ko nka sosiyete igiye kohereza umukobwa ku nshuro ya mbere ikintu bakwizeza abanyarwanda cyerekana ko azitwara neza ari uko yavuye mu matora yabaye ku rwego rw’igihugu ikindi akaba yaragiye ahabwa amasomo atandukanye n’abandi bakobwa bagiye mu irushanwa mbere ye.

Ku kijyanye na Bikini yavuze ko hari iyo bamuhaye ya Made in Rwanda yakozwe na sosiyete yitwa ‘Mpinga’ azambara mu byiciro bibanza ariko na none hakaba hari indi yateguwe n’irushanwa azasangayo agomba kuzambara ku munsi wa nyuma.

Naho ku kibazo cy’ururimi rw’Icyongereza cyagiye kigaruka ku bakobwa bamwe bitabiriye iri rushanwa mu myaka yatambutse yatangaje ko Umunyana yavuze ko yumva Ikinyarwanda n’Icyongereza ndetse aribyo azakoresha.

Ikamba rya Miss Supranational Rwanda 2019 ryegukanywe na Umunyana Shanitah muri Nzeri 2019 rikamuhesha itike yo guhagararira igihugu ku rwego mpuzamahanga ryatumye ahembwa miliyoni 1 Frw.

Umunyana mu 2018 yari mu bakobwa bahataniye ikamba rya Miss University Africa ryabaye mu Ukuboza 2018 ndetse avuga ko ryamwunguye byinshi bizamufasha kwitwara neza muri Miss Supranational.

Uyu mukobwa w’imyaka 18 areshya na metero 1.84, agapima ibiro 55. Ni umwe mu bakobwa 20 bahataniye ikamba rya Miss Rwanda 2018, yahagarariye Intara y’Amajyepfo aba Igisonga cya Mbere.

Kuva mu 2011 nibwo u Rwanda rwinjiye mu bihugu bisaga 80 bikunze kwitabira irushanwa ngarukamwaka ry’ubwiza rya Miss Supranational.

Ku ikubitiro muri uwo mwaka hagiyeyo Uwamahoro Yvonne, mu 2012 hajyayo Kubwimana Simbi Sabrina, mu 2013 hajyayo Mutesi Aurore Kayibanda, mu 2014 hagenda Umwali Neema Larissa, Gisa Sonia ajyayo mu 2015, Akiwacu Colombe mu 2016 , Ingabire Habiba mu 2017 na Uwase Clementine uherukayo umwaka ushize.

Umunyana Shanitah yajyanye icyizere muri Miss Supranational izabera muri Pologne

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza