Umunyana Shanitah yagereranyije Miss Supranational n’andi marushanwa y’ubwiza yitabiriye mu Rwanda

Yanditswe na Nsengiyumva Emmy
Kuya 26 Ugushyingo 2019 saa 08:58
Yasuwe :
0 0

Umunyana Shanitah niwe mukobwa w’Umunyarwandakazi uhagarariye igihugu mu irushanwa rya Miss Supranational nyuma y’uko yari amaze gutsinda ku rwego rw’igihugu.

Tariki 18 Ugushyingo 2019 nibwo Umunyana Shanitah yerekeje muri Pologne yitabiriye irushanwa rya Miss Supranational nk’uhagarariye u Rwanda.

Nyuma y’iminsi agezeyo uyu mukobwa ahamya ko yamaze kumenyera ndetse anakomeje gukora cyane ngo aheshe ishema igihugu cye abe yanegukana ikamba rya Miss Supranational 2019.

Mu kiganiro yagiranye na IGIHE, abajijwe niba hari itandukaniro yari yabona hagati y’iri rushanwa n’andi yitabiriye y’ubwiza mu Rwanda, Umunyana yavuze ko ntaho bitandukaniye uretse icyiciro cya “One on One Interview”.

Umunyana yagize ati "Muri iki cyiciro abahatanira ikamba umwe ku wundi anyura imbere y’abagize akanama nkemurampaka akabazwa ku bibazo byateguwe, akenshi usanga babazwa ibibazo byiganjemo ibyo ku munsi wo gutanga ikamba [...] aha niho babonera niba umukobwa ashoboye cyangwa adashoboye.”

Miss Umunyana yavuze ko muri rusange ibindi ari bimwe. Ati “Usanga ari Boot Camp, ntaho bitaniye n’andi marushanwa buri wese wagira amahirwe akitwara neza ashobora kwegukana ikamba.”

Kugeza ubu Umunyana na bagenzi be batangiye gutorwa binyuze ku rubuga rw’iri rushanwa, kugira ngo uyu munyarwandakazi ahabwe amahirwe bisaba ko abantu bafite telefone zigezweho ‘Smart phone’ bashyiramo ‘application’ ya Miss Supranational bityo bakabasha gutora uyu mukobwa.

Miss Umunyana yegukanye ikamba rya Miss Supranational Rwanda 2019 muri Nzeri uyu mwaka rimuhesha itike yo guhagararira igihugu ku rwego mpuzamahanga anahembwa miliyoni 1 Frw.

Umunyana mu 2018 yari mu bakobwa bahataniye ikamba rya Miss University Africa ryabaye mu Ukuboza 2018 ndetse avuga ko ryamwunguye byinshi bizamufasha kwitwara neza muri Miss Supranational.

Uyu mukobwa w’imyaka 18 areshya na metero 1.84, agapima ibiro 55. Ni umwe mu bakobwa 20 bahataniye ikamba rya Miss Rwanda 2018, yahagarariye Intara y’Amajyepfo aba Igisonga cya Mbere.

Kuva mu 2011 nibwo u Rwanda rwinjiye mu bihugu bisaga 80 bikunze kwitabira irushanwa ngarukamwaka ry’ubwiza rya Miss Supranational.

Ku ikubitiro muri uwo mwaka hagiyeyo Uwamahoro Yvonne, mu 2012 hajyayo Kubwimana Simbi Sabrina, mu 2013 hajyayo Mutesi Aurore Kayibanda, mu 2014 hagenda Umwali Neema Larissa, Gisa Sonia ajyayo mu 2015, Akiwacu Colombe mu 2016 , Ingabire Habiba mu 2017 na Uwase Clementine uherukayo umwaka ushize.

Umunyana Shanitah yatorewe guhagararira u Rwanda muri Miss Supranational nyuma yo kwegukana ikamba ku rwego rw'Igihugu
Umunyana Shanitah niwe uhagarariye u Rwanda muri Miss Supranational

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza