Umunyakoreya yagizwe Miss Supranational, Habiba ntiyabonetse muri 25 ba mbere (Amafoto)

Yanditswe na Dusabimana Aimable
Kuya 2 Ukuboza 2017 saa 01:55
Yasuwe :
0 0

Ingabire Habiba wari uhagarariye u Rwanda mu irushanwa rya Miss Supranational ntiyabonetse mu bakobwa 25 ba mbere mu birori byarangiye ikamba ryambitswe umukobwa wo muri Korea y’Epfo iritwaye ku nshuro ya mbere.

Jenny Kim wagizwe Miss Supranational ni umukobwa w’imyaka 24 y’amavuko, areshya na metero 1.73, yiga indimi n’ubuvanganzo ndetse asanzwe ari umunyamideli. Yambitswe ikamba mu birori bikomeye byabereye ahitwa Municipal Sports and Recreation Center mu Mujyi wa Krynica-Zdroj muri Pologne.

Uyu mukobwa akimara kumenya ko ari we watsinze yarize amarira menshi y’ibyishimo nyuma ahozwa na bagenzi be bose bamuguyemo. Yambitswe ikamba na Srinidhi Ramesh Shetty waryegukanye mu mwaka ushize.

Jenny Kim wegukanye ikamba amaze kwigaragaza mu marushanwa y’ubwiza atandukanye ndetse yanaserukiye igihugu cye muri Miss Universe mu mwaka ushize agirwa igisonga cya mbere anatorwa na bagenzi be nka Miss Congeniality. Yabaye Nyampinga wa Korea muri 2015.

Mu birori byo kwimika Miss Supranational uyu mukobwa wahembwe ibihumbi 30 by’amadolari ya Amerika, yakurikiwe n’uwitwa Martha Martinez wo muri Colombia, igisonga cya kabiri yabaye Bianca Tirsin wo muri Romania, Umunya-Ethiopia Bitaniya Josef yabaye igisonga cya gatatu akurikirwa n’umukobwa witwa Larissa Santiago wo muri Puerto Rico.

Habiba wari uhagarariye u Rwanda ntiyabonetse mu bakobwa 25 ba mbere nubwo ari umwe mu bahawe amahirwe inshuro nyinshi n’ibinyamakuru bitandukanye byandika kuri iri rushanwa ndetse agashyirwa muri 20 bashoboraga gutungurana muri Miss Supranational 2017.

Abakobwa batanu ba mbere muri Miss Supranational

Abakobwa babonetse muri 25 ba mbere harimo uwo muri Indonesia wotowe kurusha abandi kuri porogaramu ya Vodi, uwo muri Vietnam wakunzwe cyane kuri Facebook, Albania, Ethiopia, Brazil, Poland, Korea, Thailand, Portugal, South Sudan, India, Serbia, Mexico, Colombia, Costa Rica, Australia, Italy, Philippines, Romania, Wales, Peru, Japan, Jamaica, Bolivia na Puerto Rico.

Ni ku nshuro ya Karindwi u Rwanda rwitabiriye Miss Supranational, muri 2011 rwaserukiwe na Simbi Sabrina wabaye Miss Personality; 2012 hagiyeyo Uwamahoro Yvonne, Miss Mutesi Aurore[2013], Umwali Neema Larissa [2014], Gisa Sonia[2015], Akiwacu Colombe[2016] na Habiba Ingabire[2017].

Abakobwa mu rwambariro
Ingabire Habiba uri mu bahabwaga amahirwe ntiyabonetse muri 25 ba mbere

Niba ushaka kuduha inkuru waduhamagara kuri 4546
Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza