Umunya-Zambia w’Umupolisi yavuze imyato Perezida Kagame mu ndirimbo

Yanditswe na Uwiduhaye Theos
Kuya 16 Mutarama 2021 saa 03:01
Yasuwe :
0 0

Umusore witwa Rufus Mkandawire wo muri Zambia usanzwe ari umupolisi ariko akaba n’umuhanzi wibanda ku ndirimbo z’ubumwe n’ubwiyunge, yakoze indirimbo avugamo imyato Perezida Kagame.

Mu kiganiro yagiranye na IGIHE, yavuze ko iyi ndirimbo yitwa ‘Mtendere’. ‘Mtendere’ ni ijambo ry’ururimi ruzwi nka Nyanja rukoreshwa muri Zambia n’ibindi bihugu bihana imbibi, bivuze amahoro mu Kinyarwnada.

Avuga ko impamvu yamenye igisobanuro cy’amahoro mu rurimi rw’iwabo ari uko muri Gicurasi 2019 yagize amahirwe yo kuza mu Rwanda, mu mahugurwa n’ubundi yayavugagaho. Icyo gihe yari ahagarariye abandi banyeshuri bo muri Kaminuza ya Zambia yigagamo icyiciro cya gatatu cya kaminuza.

Ati “Icyo gihe byari inzozi zibaye impamo kuza muri uru ruzinduko. U Rwanda ni isomo ry’ubuzima bwose, rero naravuze nti nize kuri Jenoside yabereye mu Rwanda ndetse n’ingengabitekerezo yagejeje u Rwanda kuri aya marorerwa yakorewe Abatutsi. Mpereye k’u Rwanda nabonye ko amahoro ariryo shingiro ryo kugira iterambere rirambye. Ndetse, ni imwe mu nzira leta nyinshi cyane muri Afurika zakwifashisha mu kugera ku ntego z’iterambere rirambye mu 2030.”

Yavuze ko yashatse guhimba indirimbo yigisha abantu amahoro, ndetse muri iyi ndirimbo hari aho aririmba ati “Tewelako kwa Kagame etipunzitsa mtendere” bisobanuye mu Kinyarwanda ngo Nyakubahwa Perezida Kagame yatwigishije ubumwe n’amahoro”. Mpa amahoro.”

Yavuze ko ashaka kuba yakorana n’abahanzi bo mu Rwanda nabo bafite intego yo gusakaza amahoro mu bantu bakoresheje umuziki nk’intwaro yo guhindura imitekerereze.

Yavuze ko guhimba iyi ndirimbo byaturutse ku mateka y’u Rwanda ashaririye, ariko ataratumye abantu baheranwa nayo, igihugu kigatera imbere mu buryo bwihuse bigizwemo uruhare na Perezida Kagame.

Ati “Nahisemo gushyiramo Perezida Kagame mu ndirimbo yanjye kubera ko afite umwihariko ndetse n’uko yahinduye u Rwanda nyuma y’amateka akomeye rwanyuzemo. Akagira igihugu cye, icy’iterambere rirambye n’umudendezo muri Afurika.”

Avuga ko yabashije kugera mu bice bitandukanye birimo Gishari mu Ntara y’Iburasirazuba ndetse na Murambi mu Majyepfo akishimira uburyo igihugu cyose kiba cyuzuyemo umudendezo.

Yifuriza Perezida w’u Rwanda Paul Kagame n’abaturage be ubuzima bwiza n’umwaka mwiza wa 2021.

Rufus Mkandawire yavukiye mu Mujyi wa Lusaka muri Zambia mu muryango w’abana batanu, niwe bucura.

Nyuma yo gusoza amashuri yisumbuye, mu 2009 yahisemo kujya mu gipolisi cyo muri Zambia. Mu 2013 yize ibijyanye n’ubuganga muri kaminuza ya Lusaka Apex Medical University, aza kwiga icyiciro cya gatatu cya kaminuza mu bijyanye n’ubumenyi, amahoro, kuyobora ndetse no gukemura amakimbirane. Aya masomo yayasoreje muri University of Zambia.

Yatangiye kugaragaza impano yo kuririmba mu 2004 ubwo yari akiga mu mashuri yisumbuye aza kubishimangira ubwo yajyaga mu gipolisi.

Ati “Nakomeje kwita ku kamaro ubuhanzi bwanjye bwagira nk’ingaruka nziza ku buzima bw’abanya-Zambia. Natangiye gukora umuziki, nk’igikoresho cyo kwifashisha mu guhindura imyitwarire y’abantu ndetse n’imitekereze.”

Avuga ko ibi byatumye ahimba indirimbo zirimo GBV-Abash, Mtendere n’izindi avuga ko zizagaragaraho abandi bahanzi b’iwabo ndetse n’abo hanze barimo uwitwa Joe Kellz wo muri Malawi.

Indirimbo uyu musore yakoze arata ubutwari bwa Perezida Kagame

Rufus yavuze ko Perezida Kagame ari icyitegererezo ku banyafurika b'ingeri zose
Uyu musore ni umupolisi muri Zambia aho akomoka

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .