Umuhanzi Papi Clever yasabye anakwa Ingabire Dorcas (Amafoto)

Yanditswe na Ishimwe Israel
Kuya 1 Ukuboza 2019 saa 10:11
Yasuwe :
0 0

Umuhanzi Tuyizere Papi Clever yasabye anakwa Ingabire Dorcas bamaze igihe bakundana mu birori biryoshye byabaye ku wa 30 Ugushyingo 2019.

Umuhango wo gusaba no gukwa wabereye mu Ishuri ribanza rya St Marc riherereye mu Karere ka Musanze aho uyu mukobwa avuka. Ni ibirori byitabiriwe n’inshuti n’abavandimwe b’imiryango yombi.

Papi Clever yaherekejwe n’abantu benshi baturutse mu Mujyi wa Kigali barimo abapasiteri nka Nsabayesu Aimable, Ndayizeye Isaïe, Niyonshuti Théogène na Nkuranga Aimable. Abahanzi bamuherekeje barimo Danny Mutabazi, Jado Sinza, Bosco Nshuti, Nishimwe Jonathan uri mu bakizamuka n’abandi.

Uyu muhanzi ukunzwe cyane mu ndirimbo zo mu gitabo yari agaragiwe n’abasore biganjemo abo bafatanya (band) mu kuramya no guhimbaza Imana.

Parrain we ni Pasiteri Nsenga Emmanuel wo muri Eglise Vivante mu gihe umukunzi we yari agaragiwe (Marraine) n’umugore w’umuhanzi Alexis Dusabe. Umuvugizi wa ADEPR mu Rwanda, Rev Karuranga Ephraïm, ari mu basaza batanze umugeni.

Papi Clever yasabye anakwa Ingabire nyuma yo guhamya isezerano ryo kubana nk’umugabo n’umugore byemewe n’amategeko ya Repubulika y’u Rwanda. Ni umuhango wabereye mu Murenge wa Muhoza ku wa Gatandatu.

Tuyizere n’umukunzi we berekanywe bwa mbere imbere y’abakirisitu ku wa 15 Nzeri 2019 muri ADEPR Paruwasi ya Muhoza mbere yo kwerekanwa i Ntora aho uyu musore asengera ku wa 22 Nzeri 2019.

Uyu muhanzi yabengutse Ingabire bahuje umuhamagaro we na we ari umuramyi. Uyu mukobwa ufite ijwi ryiza yanyuze muri Korali Goshen ikorera ivugabutumwa muri ADEPR Musanze. Nyuma yo kwimukira i Kigali, Ingabire ashobora gusanga umukunzi we muri Ntora Worship Team abereye umuyobozi.

Papi Clever azasezerana imbere y’Imana ku wa 7 Ukuboza 2019 mu birori bizabera muri Kigali.

Umuhanzi Papi Clever yasabye anakwa Ingabire Dorcas

 Amateka avunaguye y’umuhanzi Papi Clever

Izina rya Papi Clever uyobora Ntora Worship Team ibarizwa muri ADEPR rimaze igihe ryumvikana mu bakunzi b’ibihangano byahimbiwe Imana.

Yakoze indirimbo nyinshi zirimo “Ugendane Nanjye”, ‘‘Narakwiboneye’’, ‘‘Uburyohe’’, ‘‘Ahari Kurira’’, “Utwumvire”, "Uvuze Yego", "Uri uwo Kwizerwa" na “Impamvu z’Ibifatika’’ aheruka gushyira hanze.

Muri iyi minsi akunzwe cyane kubera umushinga w’indirimbo zo mu Gitabo yatangiye gusubiramo ateganya no kuzisoza uko ari 547. Album ya mbere y’izi ndirimbo yayise “Amakuru y’Umurwa” ikubiyeho indirimbo 12 zo mu gitabo.

Papi Clever yavukiye i Rusizi ku wa 18 Nzeri 1992; avuka kuri Nzeyimana Elie na Mushonganono Jeanne. Se yaje gupfa muri Jenoside yakorewe Abatutsi ubwo yari afite imyaka ibiri gusa. Yasigaranye na nyina, amurerana n’abandi bavandimwe babiri; mukuru we na murumuna we.

Uyu musore nubwo yakuriye mu buzima bugoye n’umuryango we, yakuze akunda gusenga Imana cyane, byaje kuvamo kuririmba muri korali zitandukanye zo mu itorero rya ADEPR.

Yatangiye kuririmba yiga mu wa Gatanu w’amashuri abanza muri korali y’abakuze baramurera akuriramo atyo.

Papi Clever amashuri abanza yayize ahantu henshi ku bigo bigera kuri birindwi bitewe n’uko umuryango we wakundaga kwimuka. Mu Cyiciro Rusange yize mu Rutobwe mu Karere ka Kamonyi, asoreza ayisumbuye muri Aparude Ruhango aho yakurikiye Ishami rya Computer & Electronics. Kaminuza yayize mu Ishuri rikuru ry’Imyuga n’Ubumenyingiro rya Kigali (IPRC).

Yarangije amashuri yisumbuye ajya kwiga umuziki muri Kigali Music School mu 2012 ariho yanatangiriye umuziki nk’umwuga mu 2014. Yagiye yandika indirimbo nyinshi zirimo n’iza Hyssop Choir yo muri ADEPR Kiruhura aho yazamukiye, nyuma aza no gutangira kwandika ize bwite.

Barebanye akana ko mu jisho...
Bagwanye mu byano bishyira kera...
Umuvugizi wa ADEPR mu Rwanda, Rev Karuranga Ephraïm, ari mu basaza batanze Ingabire Dorcas
Pasiteri Nsabayesu Aimable wigisha umuziki mu Ishuri ryo ku Nyundo riri mu Karere ka Muhanga ari mu batashye ubukwe
Pasiteri Nkuranga Aimable wahoze muri Biro Nyobozi ya ADEPR na we yaherekeje Papi Clever i Musanze
Pasiteri Ndayizeye Isaïe usengera i Ntora yagaragiye umuhanzi Papi Clever usengera mu itorero abereye umwe mu bayobozi
Papi Clever yazamuye ikiganza ahamiriza imbaga ko yemerewe Ingabire ku mugaragaro
Papi Clever yambariwe n'abasore bagize band isanzwe imufasha gucuranga no kuririmba

Papi Clever yasezeranye imbere y’amategeko na Ingabire

Papi Clever n'umukunzi we Ingabire Dorcas bari banezerewe
Ingabire Dorcas yemeye ko Papi Clever amubera umugabo imbere y'amategeko ya Repubulika y'u Rwanda
Bahawe icyemezo kigaragaza ko babaye umugabo n'umugore byemewe
Papi Clever na Ingabire nyuma yo gusezerana mu mategeko

Amafoto: Asher Portraits


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza