Imanizabayo arifuza guca agahigo ko kuba Miss Rwanda 2021 atararangije amashuri abanza

Yanditswe na Nsengiyumva Emmy
Kuya 11 Gashyantare 2021 saa 07:58
Yasuwe :
0 0

Imanizabayo Angelique,umudozi w’imyenda wabigize umwuga arasaba ko habaho irengayobora akemererwa guhatanira ikamba rya Miss Rwanda 2021 nubwo atabashije kurangiza amashuri yisumbuye nka kimwe mu bisabwa abahatanira iri kamba.

Uyu mukobwa w’imyaka 25 avuka mu karere ka Rutsiro, akaba uwa kabiri mu bana barindwi.

Gukurira mu buzima bushaririye, kugerageza kwirwanaho n’ibindi yanyuzemo ni amwe mu masomo yumva yasangiza abandi bakobwa mu gihe yaba agiriwe ubuntu bwo kwitabira irushanwa rya Miss Rwanda yizeye ko azegukana.

Hejuru y’uburanga, Imanizabayo avuga ko ubwenge n’umuco birebwaho muri iri rushanwa yumva yiyizeye ku buryo aramutse ahawe amahirwe yahatana neza.

Mu kiganiro cyihariye yahaye IGIHE, yahishuye ko yamaze kwiyandikisha ndetse yahawe ibibazo nk’ibyo abandi bahawe, nyuma yo kubisubiza no kubyoherereza abategura irushanwa azategereza ko yemererwa kwitabira.

Nubwo yiyandikishije, hari kimwe mu bisabwa atujuje cyo kuba agomba kuba yararangije amashuri yisumbuye.

Atii “Ni byo koko sinarangije amashuri yisumbuye nkuko babisaba, nibaza ko bashyiraho irengayobora kuko kutarangiza kwiga ntiyari amahitamo yanjye. Byarangoye nyuma nza gushakisha uko nakwiga imyuga kandi impamyabumenyi nahakuye niyo nanifashishije niyandikisha.”

Uyu mukobwa ahamya ko kuba atararangije amashuri yisumbuye nkuko bisabwa abakobwa bose bitabira iri rushanwa, bitavuze ko adafite ibitekerezo n’imishinga byakubaka umuryango nyarwanda.

Yongeyeho ko aramutse agiriwe ubuntu akemererwa kwitabira iri rushanwa yazaba urugero rwiza ku banyarwandakazi bakitinya kubera impamvu zitandukanye.

Ati “Nk’umwana wakuriye mu buzima bubi, kwigirira icyizere nkaba nakwitabira Miss Rwanda ndetse Imana ikamfasha nkagira aho ngera nibaza ko byaba isomo kuri benshi.”

Uyu mukobwa yavuze ko impamyabushobozi yahawe arangije amashuri y’imyuga yize umwaka umwe, yakarebeweho igahabwa agaciro bityo akemererwa guhatana.

Icyakora nubwo uyu mukobwa asaba ibi, biragoye ko yabyemererwa cyereka habaye irengayobora nyine nkuko abyivugira, kuko kimwe mu bisabwa umukobwa wifuza guhatana muri Miss Rwanda ni ukuba yararangije amashuri yisumbuye.

Uyu mukobwa yanyuze mu buzima bushaririye bwamuviriyemo kureka ishuri akiri muto

Imanizabayo yahishuye ko ubwo yigaga mu mwaka wa gatatu w’amashuri abanza aribwo ubuzima bwamuhindukiyeho.

Iki gihe ngo nibwo yatangiye ubuzima bwo gukura atabana n’ababyeyi be kuko bafunzwe, bituma akurana inshingano zo kwita kuri barumuna be batanu.

Yishyizemo akanyabugabo akomeza ishuri kugeza mu wa gatanu w’amashuri abanza. Mu 2010 nibwo yabuze ubushobozi burundu bituma afata icyemezo cyo kureka ishuri, ayoboka iyo gushakisha ubuzima akiyitaho anita ku bavandimwe be.

Mu 2012 yafashe inzira ajya mu mujyi wa Kigali, aho yagombaga gushakira ubuzima, akazi yabonye kari ako gukora mu rugo. Aka kazi yagakoze imyaka ine kugeza mu 2016 ubwo yari amaze kubona ubushobozi, yigira inama yo kujya kwiga imyuga.

Kudoda niwo mwuga waje imbere, mu 2017 asubira iwabo mu karere Rutsiro aba ariho yihugurira iby’uyu murimo.

Nyuma yo kurangiza kwihugura umwaka wose, Imanizabayo yahise agaruka mu mujyi wa Kigali yongera gusubira mu kazi ko mu rugo. Nubwo yari asubiye mu kazi yigeze gukora, yifuzaga kugwiza ubushobozi ngo yigurire imashini abashe gukora ibyo yize.

Mu mezi ane akora akazi ko mu rugo, uyu mukobwa yari amaze kugwiza amafaranga yatuma yigurira imashini yo kudoda ahita atangira kwikorera.

Yagize ati “Iki gihe ndabyibuka niguriye imashini y’ibihumbi 80. Byari ibyishimo bikomeye kuri njye icyo gihe.”

Kugeza ubu uyu mukobwa atunzwe n’umwuga yize wo kudoda, ndetse usibye kwihaza mu buzima bwa buri munsi ngo imashini ituma afasha abavandimwe be.

Mu mabwiriza ya Miss Rwanda basaba ko umukobwa witabiriye iri rushanwa aba yarujuje ibisabwa, birimo kuba yararangije amashuri yisumbuye.

Kuba uyu mukobwa atarabashije kurangiza n’amashuri abanza, biragoye ko yakwemererwa nubwo yasabye ko habaho irengayobora.

Ibi bivuze ko haramutse hatabayeho irengayobora uyu mukobwa byagorana ko yemererwa kwitabira irushanwa rya Miss Rwanda 2021.

Irushanwa rirarimbanyije

Kwiyandikisha byarangiye kuri uyu wa 8 Gashyantare mu gihe ibikorwa by’amajonjora y’ibanze byo bizatangira kuva kuya 9 Gashyantare kugeza ku ya 18 Gashyantare. Kuva ku ya 19 Gashyantare, abategura bazatangira kwerekana abahagarariye intara zitandukanye bazaba batsinze amajonjora y’ibanze.

Gutora kuri murandasi na SMS bizatangira ku ya 22 Gashyantare kugira ngo hamenyekane abazaba batsindiye imyanya ya mbere 20. Abahatana bazinjira mu muhezo ku ya 3 Werurwe mu gihe ‘pre-selection’ yo gutoranya izaba ku ya 6 Werurwe.

Abahatana 20 ba mbere bazagera mu cyiciro cya nyuma, bazajya mu mwiherero uzatangira kuya 6 Werurwe kugeza ku ya 20 Werurwe, ubwo hazaba ari ku munsi wa nyuma w’irushanwa. Gusoza irushanwa bizabera muri Kigali Arena kandi bizatambuka kuri Televiziyo y’u Rwanda.

Imanizabayo wifuza kwitabira Miss Rwanda 2021 yasabye ko habaho irengayobora
Imanizabayo kugeza ubu asigaye ari umudozi wabigize umwuga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .