Umucuranzi w’icyamamare muri Jazz yaje i Kigali

Yanditswe na Munyengabe Murungi Sabin
Kuya 27 Ukwakira 2016 saa 01:13
45 30

Isaiah Katumwa, umuririmbyi ubifatanya no gucuranga umwirongi wa kizungu[saxophone] yaje mu Rwanda kwitabira igitaramo gikomeye cya Jazz Junction kizabera muri Kigali Serena Hotel kuwa 28 Ukwakira 2016.

Uyu muhanzi akunzwe cyane iwabo muri Uganda aho akomoka ndetse afatwa nk’uwa mbere mu gucuranga umwirongi muri Afurika y’Uburasirazuba. Yageze i Kigali ku mugoroba wo kuri uyu wa Gatatu tariki ya 26 Ukwakira 2016.

Yabwiye IGIHE ko atari ubwa mbere aje mu Rwanda kuko yagiye ahaza atumiwe gucuranga mu bitaramo byihariye. Ati “Ntabwo ari ubwa mbere ngeze hano i Kigali nje gucuranga, nagiye nza ngacurangira abantu bake, ntabwo byabaga ari ibitaramo byemewe kwitabirwa n’abantu bose, ariko narazaga mbere.”

Mu gitaramo cya Jazz Junction, Isaiah Katumwa araririmba afatanyije n’abahanzi barimo Herbert Rock uzamurika album ye "Sax In the City”, Steve Keys wo muri Uganda, Moroots n’abandi bahanzi bagize itsinda Neptunez Band.

Katumwa yavuze ko abazitabira igitaramo cye i Kigali bazabona itandukaniro rya Jazz akora n’umuziki wo muri iyi njyana abandi bahanzi basanzwe bacuranga. Ati “Ntabwo nkora jazz nk’iyo wumva Abanyamerika bacuranga, nashyizemo umwihariko ku buryo umuntu wumva ibyo ndirimba yumva ko ntateruye iby’abandi, njyewe ntabwo nigana nkora ibyanjye byihariye. Nkeka ko nabyo biri mu bituma bankunda…”

Uyu muhanzi amaze imyaka igera kuri 21 akora umuziki, yavuze ko yigishije benshi mu bacuranga jazz ndetse by’umwihariko ‘yivuga nk’uwaharuye ikibuga ku bavuza umwirongi bamaze kumenyakana muri Afurika y’Uburasirazuba’.

Ati “Ntangira gucuranga njyewe ibintu byari bigoye, wumve ko ibya YouTube n’ubundi bubiko bw’umuziki ntibyabagaho, byari bigoye, twabikoraga bituruhije ariko ubu byaroroshye. Nanyuze mu bintu bigoye ku buryo no gutegura igitaramo ukumvisha umuterankunga ko yaguha amafaranga atumvaga impamvu y’umuziki wa Jazz, bayifataga nk’injyana itazwi.”

Aheruka gucurangira i Kigali mu birori bya ibirori bya Dîner en Blanc

Katumwa amaze gusohora album nyinshi za jazz ndetse zakunzwe cyane zirimo Will Worship You, Saxo Hymns, We three kings, Sax Worship, Celebrate Africa, Sinza, Coming Home and Another Step n’izindi.

Yacurangiye mu bihugu byinshi birimo u Budage, u Buholandi, u Bufaransa, u Bwongereza, u Bubiligi, Afurika y’Epfo, Nigeria, Mali n’ahandi hatandukanye. Aho yazengurutse acuranga yaririmbanye n’abahanzi bazwi ku Isi nka Jonathan Btler, Hugh Masekela, Jimmy Dludlu, Seweto Kinchyamong n’abandi.

Isaiah Katumwa, Remmy Lubega na Garuka Patricia umukozi wa Bralirwa yateye inkunga iki gitaramo
Garuka Patricia asobanura impamvu batera inkunga ibitaramo bya Jazz

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE