Uko umuririmbyi w’umuhinde witwa Ross Nathan yakunze injyana yo ku Nkombo

Yanditswe na Muvunyi Arsène
Kuya 22 Kamena 2019 saa 04:14
Yasuwe :
0 0

Umuririmbyi w’umuhinde witwa Ross Nathan yashimishijwe n’injyana yo ku Nkombo iririmbwa n’umusore uhakomoka witwa Marchal Ujeku, birangira amusabye ko bakorana indirimbo.

Mu Mpera z’umwaka wa 2017 nibwo umuhanzi ukomoka ku kirwa cya Nkombo, Marchal Ujeku ufite umwihariko wo kuririmba mu rurimi rw’Amahavu, yataramiye muri Marriott Hotel ahari hari kwizihirizwa umunsi mpuzamahanga w’Impunzi.

Mu bari aho hari n’umuhinde utuye mu Rwanda witwa Ross Nathan wakunze bikomeye iyi njyana yo mu kirwa giherereye mu kiyaga cya Kivu.

Mu kiganiro IGIHE yagiranye n’uyu muhinde usanzwe asubiramo indirimbo z’abandi [cover], yatubwiye ko uburyo Marchal Ujeku yaririmbye byamushimishije cyane bituma amushaka ko ngo bakorane indirimbo.

Ati “Nabonye Marchal aririmba neza, nakunze indirimbo ye yitwa Bombole kandi nabonye akunze guteza imbere umuco nyarwanda imbere y’abanyamahanga benshi, nyuma ndamushaka musaba ko twakorana indirimbo.”

Nk’uko Ross yari arasanzwe asubiramo indirimbo z’abahinde, we na Marchal Ujeku bahisemo gukora indirimbo yakunzwe cyane yitwa “Kutch Kutch Hota Hai” bahurizamo umuco nyarwanda n’uw’abahinde.

Ross yongeyeho ko ukwihuza kwe na Marchal Ujeku ari uburyo bwo gusangira imico y’u Rwanda n’u Buhinde.

Ati “ Twashatse guhuriza hamwe imico y’ibihugu byombi mu muziki, kuko buri gihugu gifite umwihariko wacyo. Iyi ni nkunga yacu dushyizeho kandi twizeye ko tuzakomeza gukorana.”

Intego ye ngo ni uguteza imbere umuziki w’abanyarwanda mu Buhinde n’abaho bakamenywa n’abanyarwanda. Ibi azabigeraho akorana indirimbo n’abanyarwanda benshi ndetse akanatumira abahinde gutaramira mu Rwanda.

Marchal Ujeku yabwiye IGIHE ko imikoranire ye na Ross ayitezeho kuzamenyekanisha izina rye n’injyana ye mu Buhinde.

Ati “Iwabo hari abantu bamuzi, hari abandi bantu ba hariya mu Buhinde bazamenya bakamenya na muzika nyarwanda n’ubwo muzika yabo iri ku rwego rwo hejuru cyane, twese tuzabigiriramo inyungu.”

Iyi ndirimbo yakorewe muri Culture Empire yumvikanamo ijwi ry’umuhanzikazi Mutima uzi kwigana amajwi y’abahindekazi, ikazajya hanze mu cyumweru gitaha iri kumwe n’amashusho yayo.

Marchal Ujeku kandi afite gahunda yo gukorana indirimbo n’undi muhinde witwa Suhail Zargar, bishoboka ko bazahurira mu Buhinde aho ateganya gukorera n’ibitaramo.

Reba imwe mu ndirimbo Ross Nathan yaririmbyemo.

Reba Bombole indirimbo yakunzwe n’umuhinde Ross Nathan

Ross Nathan asanzwe aririmba indirimbo z'abandi
Marchal Ujeku na Ross Nathan wakunze umuziki we

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza