Uko umuhanzi Kevin Skaa yize gitari ngo ayitereteshe akivumburamo impano ikomeye yo kuririmba

Yanditswe na Muvunyi Arsène
Kuya 16 Nyakanga 2019 saa 09:31
Yasuwe :
0 0

Aracyari muto mu myaka ndetse benshi ntibaramumenya ariko yifitiye icyizere cy’uko impano ye yo kuririmba izatuma Isi yose imumenya.

Yitwa Shema Kananura Kevin nk’amazina yiswe n’ababyeyi be, nawe yiyita Kevin Skaa ngo arikoreshe nk’umunyamuziki.

Skaa byaturutse mu mazina abiri y’ikinyarwanda S ituruka kuri Shema K ni kuri Kananura naho A ebyiri ni iziheruka aya mazina yombi.

Ku myaka 22 ari kurangiza amasomo ye y’icyiciro cya Kaminuza muri Creative Design muri Kaminuza y’u Rwanda.

Amaze gushyira hanze indirimbo ebyiri harimo iyitwa “Down Slow” yakoze mu 2018 na “Special” nshya zose zakozwe na Dany Beats. Ucyumva ijwi ry’uyu musore ntushidikanya ku buhanga afite.

Mu kiganiro yagiranye na IGIHE uyu musore yavuze ko ibyo kuririmba yatangiye kubikunda akiri umwana muto ndetse iyi mpano ifite imizi mu muryango dore ko afite mushiki we witwa Umurerwa Linda uri mu bitwaye neza mu irushanwa rya Art Rwanda-Ubuhanzi, akaba na mubyara wa Derek Sano wo muri Active.

Kevin avuga ko amasoni menshi yagiraga ubwo yari atangiye kugimbuka yiga mu mashuri yisumbuye, yamubijije gukomeza kujya mu bikorwa byo kuririmba nubwo yabikundaga.

Yize gitari ashaka gutereta abakobwa

Ubwo yari yinjiye muri Kaminuza, uyu musore yaciye umuvuno wo gutereta abakobwa akoresheje gitari, birangira akanguye impano ye yo kuririmba yasaga n’iyasinziriye.

Ati “Natangiye kwiga gitari mvuga nti ‘niyo nzajya nteretesha abakobwa. Ntangiye kuyimenya rimwe ndi gucuranga turi mu ishuri, bagenzi banjye barabikunda, mbonamo n’abandi bakunda umuziki gutyo dutangira kujya twihuza tugacuranga.”

Nubwo umugambi wari ukwigarurira imitima y’abakobwa, Kevin Skaa byarangiye ibyo gutereta abiretse ahubwo ahanga amaso guteza imbere impano ye.

Ati “Ntabwo nigeze nyiteretesha. Natangiye ari yo ntego mfite bituma mbona ko impano yanjye ishobora gukora cyane. Nahise mpugira mu kwagura impano yanjye no kuyibyaza umusaruro.”

Mu gihe cyo kwita ku mpano ye, Kevin yaririmbiraga ahantu hatandukanye harimo no kuri Kigali Arts Centre ndetse akanandika indirimbo zitandukanye.
Producer Danybeats ukorera muri Studio ya Madebeats ari mu bashimye impano y’uyu musore amufasha gukora indirimbo ye ya mbere yise “Down Slow.”

Ati “Kwa kundi naririmbiraga ahantu hatandukanye naririmbye iyitwa “Down Slow” icyo gihe Danybeats yari yaje arayikunda nk’ejo mu gitondo numva arampamagaye arambwira ngo ni producer yifuzaga ko twakora akantu.”

Iyi ndirimbo yongereye uyu musore icyizere bitewe n’uburyo yakunzwe n’abantu batari bake, gusa ngo bamwe ntibari bazi ko ari umunyarwanda bitewe n’uko iri mu rurimi rw’icyongereza.

Kuri ubu yamaze gushyira hanze indirimbo ya kabiri yise Special, imeze nk’urufunguzo rumwijiza ku isoko rya muzika nyarwanda kuko agiye gukora ubutarahuka.

Ati “Buri ndirimbo uko isohotse ntabwo izajya imara igihe kinini hanze. Ikipe turi gukorana yamaze kumva intumbero mfite, mfite indirimbo nyinshi nanditse kugira ngo zigere mu bantu ni uko tuzajya dusohora nyinshi mu gihe gito.”

Uyu muhanzi ukiri muto ntabwo ashaka kwamamara mu Rwanda ngo birangirere aho, ahubwo yifuza ko umuziki we wazarenga imbibi z’igihugu ku buryo mu myaka itanu yaba ari ku rwego rwo kwegukana ibihembo mpuzamahanga.

Ati “Mu myaka itanu ndashaka ko mba ndi hanze y’u Rwanda nkaba najya muri BET Awards niho hantu nshaka kuba ndi kuko nkunda gukora ibintu nkiri muto. Ubu mfite imyaka 22 mba numva nshaka kugera muri 30 mfite wa muziki abantu baba bubashye.”

Kevin Skaa yizeza abakunzi b’umuziki kutazabatenguha, abakorera ibihangano bifite umwihariko kandi byiza.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza