Uko Guitar yarokoye umuhanzi Ngarambe François Xavier, umugore we akayita mukeba (Video)

Yanditswe na Uwiduhaye Theos
Kuya 1 Kanama 2019 saa 12:23
Yasuwe :
0 0

Umuhanzi Ngarambe François Xavier, wamamaye mu ndirimbo ‘Umwana ni umutware’ ashimangira ko Guitar yamubereye inshuti nziza mu buzima bwe ndetse ikaba yaragiye imucisha ahantu hakomeye.

Ngarambe yavutse tariki 3 Ukuboza 1962, mu yahoze ari Zaïre (Repubulika Iharanira Demokarasi ya Congo).

Uyu muhanzi yatangiye umuziki mu 1975 yibanda cyane mu ndirimbo zivuga ku burenganzira bw’abana n’uburyo bakwiye kwitabwaho. Ni umwe mu bahanzi nyarwanda begukanye ibihembo mpuzamahanga mu myaka yo hambere.

By’umwihariko ibihembo yabonye byamushimiraga ubwitange yagize mu guharanira uburenganzira bw’abana no kuba imbuto y’amahoro. Birimo icy’Indirimbo nziza mu marushanwa ya Découvertes 87 mu 1987 byari byateguwe na Radio y’Abafaransa (RFI).

Mu 1997, yitabiriye amarushanwa yari yateguwe na Centre International Martin Luther King maze indirimbo ye ‘Hamwe n’abana’ ibona igihembo cy’indirimbo nziza y’amahoro (meilleure chanson de la Paix).

Mu kiganiro na IGIHE, Ngarambe, yavuze ko mu muziki we yanyuzwe cyane no kuba inshuti ya Guitar kuko yagiye imwambutsa ibihe bibi byinshi ikamucisha kuri za bariyeri, ku buryo hari aho yayicurangaga bigatuma abatutsi babaga bafashwe barekurwa.

Ati “Guitar niyo yamperekeje mu bihe bikomeye by’agahinda, igahinda agahinda kari kanteye. Nabanye nayo ndi umusore ahantu hose nkaba nyifite. Ndibuka mu 1990 nahuraga n’abasirikare kuri bariyeri, icyo gihe hari intambara hagati ya 1990 na 1994 noneho nkaba nyifite, abasirikare bampagarika bati ese uraririmba nti ‘yego’ bakandekura ariko bakarekura n’abandi bantu babaga bafashe”.

“Murumva ko yarampitishaga. Ikindi ni uko aho twari twarahungiye muri Jenoside yakorewe Abatutsi mu 1994 nacurangiraga abandi tukabana neza, kugera i Nairobi aho twageze tukimara kurokoka Jenoside nahuye n’umunyamuziki wo mu Rwanda witwaga Alphonse Munyaneza antiza guitar hamwe n’abandi banyarwanda twari twarahungiye tugatarama, hanyuma ngeze mu Bubiligi nkigera mu rugo rw’ahantu batwakiriye impano ya mbere bampaye ni Guitar. Nkayikoresha mu bihe binyuranye.”

Yakomeje avuga ikindi kintu cyamutunguye cyane agatangarira guitar ye ari uburyo yagiye abona ibihembo bitandukanye ku rwego mpuzamahanga ariyo abikesha.

Umugore we ngo yangaga guitar kubera ko yatumaga atamubonera umwanya ndetse akayita umukeba ariko nawe aza kugenda ayikunda nyuma yo kwegukana igihembo.

Ati “Ikindi kintu cyantangaje hari indirimbo yanjye yitwa ‘Hamwe n’abana’ naririmbye mu irushanwa mu 1997 iba iya mbere bampemba amafaranga na guitar. Yari ikomeye cyane mu buzima ku buryo n’umugore wanjye aje byamugoye kuko ahantu nabaga ndi kumwe nayo akayita mukeba. Twaje kwiyunga n’umugore wanjye nyuma y’uko muri iryo rushanwa ryo mu 1997 naririmbyemo bakayimpemba njye nawe. Njye nawe na guitar tubana neza.”

Mu bantu afata nk’intwari harimo ababyeyi be na Rugamba Sipiriyani n’umubyeyi Daphrose Mukansanga babanye imyaka ine ya nyuma y’ubuzima bwabo bakamubera ababyeyi inshuti ndetse n’abavandimwe, ku buryo mu buzima bwe hari byinshi akibigiraho.

Yanabahimbiye indirimbo yitwa ‘Umurage w’Urukundo’ yasabwe gukorana n’umwuzukuru wa Rugamba witwa Tania Rugamba, iyi ndirimbo ni nk’igisubizo ku ndirimbo ya Rugamba yitwa ‘Urukundo’.

Ngarambe avuga ko guitar yamubereye inshuti nziza mu buzima bwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza