Kwamamaza

Ubwiganze bw’abakobwa b’ikimero mu gitaramo Wizkid yakoreye i Kigali (Amafoto)

Yanditswe kuya 28-08-2016 saa 13:15' na Munyengabe Murungi Sabin


Abantu ibihumbi bitabiriye ibirori bya Mützig Beer Fest, abiganjemo abakobwa bakibyiruka bagaragaje ko bishimiye cyane umuhanzi Wizkid wo muri Nigeria mu gitaramo yakoreye i Kigali.

Igitaramo cya Mützig Beer Fest cyitabiriwe n’ibihumbi by’abantu bari bahuriye i Rugende mu ijoro ryo kuri uyu wa 27 Kanama 2016. Ubwitabire bwari ku rwego rukomeye, abari bacyereye igitaramo bari biganjemo abakobwa bakibyiruka bagaragaje ko bakunda bikomeye Wizkid wo muri Nigeria.

Mu byo yavugaga byose, Wizkid na we yagarukaga ku bwiza bw’Abanyarwandakazi akavuga ko ‘yizeye neza ko bashyigikiye umuziki’. Igitaramo kigitangira kugeza gisojwe, abiganjemo abakobwa ni bo bazamuraga amajwi y’ibyishimo berekana ko ‘umutima ukunda umuziki bawumuhariye’.

Igitaramo cyabereye mu gace kameze nk’igishanga ahantu hari imbeho ikomeye cyane ku buryo abatari bafite ibyo kwifubika bakomanyaga amenyo. Nubwo hari hakonje ariko, mu bafana hari harimo abakobwa batagerwaho n’imbeho bari abambaye utwenda tugufi nk’imwe mu myambaro igezweho y’ikirori.

Wizkid agitangira kuririmba yavuze ko ashaka kwishimana n’abakobwa beza baje kumureba. Ati “Abakobwa beza ba Kigali murahari? Ndaje ngo tubyinane bantu nkunda…” Aba bakobwa na bo bahitaga bazamura amajwi bamwereka ko bamuri inyuma.

Yari ategerezanyijwe amatsiko menshi n’abari bitabiriye iki gitaramo ngarukamwaka cya Mützig Beer Fest cyabereye mu busitani bw’ahitwa Rugende Training Center, ahantu ubusanzwe abasohokera bakunze kujyayo bakurikiranye kwigirayo uko bagendera ku mafarashi.

Abantu bari bakubise buzuye, bafata icyo kurya n’icyo kunywa cyiganjemo Mützig byose bigaherekezwa n’umuziki w’inyuramatwi.

Umuhanzi Wizkid akigera ku rubyiniro, abantu bamweretse ko bamwishimiye cyane, batera hejuru bamwakiriza amashyi menshi baririmbana na we ubona bose batwawe.

Bari babategereje igihe kinini, kuko igitaramo cyatangiye mu ma saa kumi z’umugoroba abafana bakomeza guteguzwa ko hari umuhanzi ukomeye muri Afurika ugiye kuza kubasusurutsa. Uwaje kureba igitaramo wese yiyumvishaga ko byibuze Wizkid aririmba nka saa moya ariko yahageze saa sita n’iminota 15.

Mbere ye haririmbye abahanzi barimo umuhanzi w’umuhanga mu njyana ya Jazz Tito Al Uribe wo muri Chile, itsinda rya Nubian Gypsies na Liquideep yo muri Afurika y’Epfo.

Ababimburiye Wizkid bishimiwe ku rwego rwabo gusa uyu Munya-Nigeria agihamagarwa igitaramo cyahinduye isura abafana bajya mu bicu abandi babyiganira kwigira imbere ngo barebe igitaramo batari kure.

Wizkid [Ayodeji Ibrahim Balogun] yaririmbye indirimbo zose akunzwemo muri iki gihe mu ndirimbo zakunzwe na benshi nka One Dance yahuriyemo na Drake, Ojuelegba, Final (Baba Nla), Show You the Money, In My Bed n’izindi nyinshi.

Wizkid yababajwe roho…

Ibyuma ntibyavugaga neza, amajwi ntiyasohokaga uko bikwiye ndetse mu gitaramo hagati byazimaga umuziki ugahagarara ariko Wizkid ntacike intege. Amaze kuririmba indirimbo eshanu za mbere, ibyuma byazimye abwira abafana ko ‘atari butahe adakoze ibyo yabateguriye’.

Yagize ati “Ibi byuma biri kutwica roho!” Byongeye bisubiro ku murongo gusa mu minota mike birongera birazima ndetse bimara umwanya ugera ku minota ine nta muziki ariko abafana bakomeza guhuza amajwi bagira bati “Star Boy! Star Boy!”

Na we yahise ababwira ko atari butahe igitaramo kitarangiye nk’uko yabiteguye. Yagize ati “Bantu banjye, ntabwo nataha ntabaririmbiye, ibi byuma bagomba kubanza kubikora neza ngakomeza kubashimisha! Ndabakunda!”

Yaririmbaga abakobwa bakamwereka ibimenyetso by'urukundo

Iki kibazo cyaje gukemuka bitari ibya burundu, Wizkid yaririmbaga ijwi rigasohoka bigoranye gusa abitaruye ahaberaga igitaramo ni bo bagerwagaho n’umuziki kubera uburyo ibyuma byari bicometsemo butanoze.

Yaririmbye kugeza saa saba n’igice z’ijoro ari nabwo abafana batangiye gusohoka ahabereye igitaramo ariko ukumva muri bo benshi barijujuta bavuga ko ‘Wizkid yagerageje gukora ibishoboka ariko sound ibabuza kwishima’.

Impanuka nyinshi ku muhanda Rugende-Kanombe

Mu nzira igana i Kigali mu rukerera rwo kuri wa 28 Kanama 2016, habaye impanuka nyinshi zishobora kuba zahitanye ubuzima bw’umuntu umwe wagonzwe n’imodoka y’abafana bari bavuye mu gitaramo.

Abanyamakuru ba IGIHE babashije kubona impanuka zigera ku munani zabereye mu bice bitandukanye ku muhanda uva i Rugende werekeza ahitwa kuri 15 i Kanombe. Mu birometero bike uvuye i Rugende, hari imodoka zagonganye hanyuma abashoferi bazo n’abo zari zitwaye bavamo baterana ibipfunsi.

Mu bice bimwe, Polisi y’u Rwanda yari yakajije umutekano wo mu muhanda mu kurinda ko izi mpanuka zaba ariko ntibyabujije ko hari abashoferi bamwe barenze ku mategeko biteza ibibazo.

Itsinda rya Nubian Gypsies
Albert Rudatsimburwa yagaragaje ubuhanga mu gukirigita gitari
itsinda rya Nubian Gypsies ryacuranze indirimbo za Jazz na Blues
Lion Imanzi yaririmbanye na Nubian Gypsies
Mighty Popo na we ni umucuranzi ukomeye wa gitari
Umuhanzi w’umuhanga mu njyana ya Jazz Tito Al Uribe wo muri Chile
Navio wo muri Uganda yatunguranye yitabira iki gitaramo
Umuririmbyi wo mu itsinda Liquideep ryo muri Afurika y'Epfo
Iri tsinda ryaje ryitwaje umu-Dj waryo
Abakobwa b'i Kigali bari baje gushyigikira Wizkid
Ange na Uncle Austin ni bo bari bayoboye igitaramo
Umuhanzi Jack B yari yaje kureba igitaramo
Abayobozi bakuru ba Bralirwa bari baje kwihera ijisho
Abakobwa bari bambariye ikirori
Muri Beer Fest hari abakobwa babyambariye nta gutinya imbeho
Aba bose bagaragaza ko bashaka cyane kubona Wizikid
Inkumi zari zabucyereye mu myambaro y'ikirori
Umunyamakuru Eugene Anangwe yari mu baryohewe n'umuziki
Kugera mu bwiherero byasabaga gutonda umurongo utari mugufi
Wizkid agihamagarwa bamwe wabonaga basa n'ababonekewe
Bralirwa yamuritse icupa rishya rya Mutzig
Aba bose ni abafana bakomeye ba Wizkid
Wizkid yaririmbye mu buryo bwa playback agaherekezwa n'abacuranzi be
Wizkid ni mugufi cyane...Yaririmbaga ahagaze hejuru ya speakers
Ni ubwa mbere akoreye igitaramo mu Rwanda
Inkweto yaje ya mbere...
Mbere yo kuririmba One Dance yakoranye na Drake yagize ati "Niwumva iyi ndirimbo icurangwa kuri Radio cyangwa mu kabyiniro ujya umenya ko ndi guhembwa"
Mu ndirimbo 'Final"
STAR BOY amaze kwerekana itandukaniro mu bahanzi ba Afurika
Umugore wa Jay Polly yageragezaga kubyina shoki
Ubwitabire bwari bushimishije
Umuraperi Navio wo muri Uganda yari yaje kureba inshuti ye Wizkid
Weasel wo muri Good Life na we yari yaje kureba mugenzi wabo Wizkid

Amafoto: Mahoro Luqman


Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 25 September 2016
Copyright © 2009 -2014 - IGIHE Ltd - All Rights Reserved